ວັນທີ 15 ກັນຍານີ້, ທ່ານດາຕຸກ ລີ ຊີລຽງ, ລັດຖະມົນຕີຊ່ວຍວ່າການກະຊວງການຄ້າແລະອຸດສາຫະກຳສາກົນມາເລເຊຍທີ່ເຂົ້າຮ່ວມງານວາງສະແດງສິນຄ້າຈີນ-ອາຊຽນຄັ້ງທີ 11 ຢູ່ນະຄອນນານນິງເຂດກວາງຊີຂອງຈີນໄດ້ກ່າວວ່າ, ລັດຖະບານມາເລເຊຍສະໜັບສະໜູນຂໍ້ສະເໜີຂອງຈີນໃນການສ້າງເສັ້ນທາງສາຍໄໝທາງທະເລສະຕະວັດທີ 21, ຫວັງຢາກໃຫ້ສອງຝ່າຍເພີ່ມທະວີຄວາມໄວ້ເນື້ອເຊື່ອໃຈກັນ, ເພີ່ມທະວີການຮ່ວມມືໃນຂົງເຂດການສ້າງພື້ນຖານໂຄງລ່າງແລະການເຊື່ອມຈອດກັນ, ເສີມຂະຫຍາຍບົດບາດຂອງກົນໄກປຶກສາຫາລືໃນດ້ານເສດຖະກິດການຄ້າຂອງສອງຝ່າຍໃຫ້ດີ, ນຳໃຊ້ທ່າແຮງທາງດ້ານນະໂຍບາຍກ່ຽວກັບເຂດການຄ້າເສລີຈີນ-ອາຊຽນຢ່າງເຕັມສ່ວນ, ແລະພະຍາຍາມຢ່າງສຸດຂີດເພື່ອບັນລຸເປົ້າໝາຍມູນຄ່າການຄ້າສອງຝ່າຍໃນປີ 2017 ບັນລຸເຖິງ 160 ຕື້ໂດລາໂດຍໄວ.
ທ່ານດາຕຸກ ລີ ຊີລຽງກ່າວວ່າ, "ການສ້າງເສັ້ນທາງສາຍໄໝທາງທະເລສະຕະວັດທີ 21 ທີ່ຈີນສະເໜີຂຶ້ນແມ່ນສອດຄ່ອງກັບຜົນປະໂຫຍດຂອງປະເທດອາຊຽນ, ມີຜົນດີຕໍ່ການຊຸກຍູ້ການຮ່ວມມືລະຫວ່າງອາຊຽນກັບຈີນໃນດ້ານການກໍ່ສ້າງພື້ນຖານໂຄງລ່າງ, ການທະນາຄານ, ການຄ້າເອເລັກໂຕຼນິກແລະດ້ານອື່ນໆໃຫ້ໄດ້ຮັບການພັດທະນາແລະກ້າວເຂົ້າສູ່ລວງເລິກໃຫ້ຫຼາຍຍິ່ງຂຶ້ນ, ພ້ອມທັງກໍ່ມີຜົນດີຕໍ່ການຊຸກຍູ້ຂະບວນການເງິນຢວນຈີນເພື່ອຫັນເປັນແບບສາກົນ."