ຕາມຂ່າວສານຊິນຮວາ: ວັນທີ 15 ກັນຍານີ້ ທ່ານຮົງເຫຼີຍ, ໂຄສົກກະຊວງການຕ່າງປະເທດຈີນກ່າວວ່າ, ຫວັງວ່າ ງານວາງສະແດງສິນຄ້າຈີນ-ອາຊຽນຈະສາມາດຊຸກຍູ້ຄວາມຈະເລີນຮຸ່ງເຮືອງແລະການພັດທະນາຮ່ວມກັນຂອງຈີນແລະອາຊຽນຕື່ມອີກ.
ງານວາງສະແດງສິນຄ້າຈີນ-ອາຊຽນ ແລະ ກອງປະຊຸມສຸດຍອດການຄ້າແລະການລົງທຶນຈີນ-ອາຊຽນຄັ້ງທີ 11 ຈະຈັດຂຶ້ນຢູ່ນະຄອນນານນິງເຂດກວາງຊີປະເທດຈີນແຕ່ວັນທີ 16 ຫາວັນທີ 19 ກັນຍານີ້, ທ່ານຮົງເຫຼີຍ ໄດ້ແຈ້ງໃຫ້ຮູ້ສະພາບທີ່ກ່ຽວຂ້ອງໃນກອງປະຊຸມຂ່າວ.
ທ່ານກ່າວວ່າ, ນີ້ແມ່ນງານມະໂຫລານປະຈຳປີລະຫວ່າງຈີນກັບອາຊຽນ. ອາຊຽນແມ່ນທິດທາງບູລິມະສິດໃນການຕ່າງປະເທດຂອງຈີນ. ປີກາຍນີ້ ຈີນແລະອາຊຽນ ໄດ້ຮ່ວມກັນສະເຫຼີມສະຫຼອງວັນສ້າງຕັ້ງການພົວພັນຄູ່ຮ່ວມຍຸດທະສາດຈີນ-ອາຊຽນຄົບຮອບ 10 ປີ. ໃນ 10 ປີທີ່ຜ່ານມາ, ຈີນແລະອາຊຽນ ໄດ້ສ້າງເຂດການຄ້າເສລີທີ່ໃຫຍ່ທີ່ສຸດຂອງປະເທດພວມພັດທະນາ, ການພົວພັນຮ່ວມມືດ້ານເສດຖະກິດການຄ້າ ໄດ້ຜ່ານຜ່າ "ທົດສະວັດຄຳ", ແລະພວມສ້າງ "ທົດສະວັດເພັດພອຍ" ອັນໃໝ່. ຝ່າຍຈີນຈະສືບຕໍ່ສະໜັບສະໜູນການພັດທະນາຂອງອາຊຽນ, ສືບຕໍ່ຊຸກຍູ້ການຮ່ວມມືທາງຍຸດທະສາດລະຫວ່າງຈີນກັບອາຊຽນຢ່າງແຂງແຮງ ເພື່ອສ້າງປະຊາຄົມຊາຕາກຳແລະປະຊາຄົມຜົນປະໂຫຍດທີ່ແໜ້ນແຟ້ນກວ່າເກົ່າລະຫວ່າງຈີນກັບອາຊຽນ.
ທ່ານຮົງເຫຼີຍ ໂຄສົກກະຊວງການຕ່າງປະເທດຈີນຍັງກ່າວຕື່ມວ່າ, ຝ່າຍຈີນຈະສຸມກຳລັງເຂົ້າໃນການປຶກສາຫາລືກ່ຽວກັບການເຊັນສັນຍາມິດຕະພາບແລະຮ່ວມມືກັບບັນດາປະເທດອາຊຽນ, ສຸມກຳລັງເຂົ້າໃນການສ້າງເສັ້ນທາງສາຍໄໝທາງທະເລໃນສະຕະວັດທີ 21 ໂດຍຮ່ວມກັບບັນດາປະເທດອາຊຽນ, ຕັ້ງໜ້າຊຸກຍູ້ການແລກປ່ຽນທາງດ້ານວັດທະນະທຳລະຫວ່າງຈີນກັບອາຊຽນ, ເພີ່ມທະວີສາຍພົວພັນມິດຕະພາບລະຫວ່າງປະຊາຊົນສອງຝ່າຍຕື່ມອີກ, ແລະເຮັດໃຫ້ພື້ນຖານທາງສັງຄົມແຫ່ງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດນັ້ນໝັ້ນແກ່ນຍິ່ງຂຶ້ນ.