ວັນທີ 15 ກັນຍານີ້ ທ່ານຈ່າງກ່າວລີ້ ຮອງນາຍົກລັດຖະມົນຕີຈີນ ໄດ້ພົບປະກັບທ່ານບຸນຍັງ ວໍລະຈິດ ຮອງປະທານປະເທດລາວ, ທ່ານລີຊຽນລົງ ນາຍົກ ລັດຖະມົນຕີສິງກະໂປ, ທ່ານຮຸນແຊນ ນາຍົກລັດຖະມົນຕີກຳປູເຈຍ, ທ່ານນຽນທູນ ຮອງປະທານາທິບໍດີມຽນມາ, ທ່ານທະນາສັກ ປະຕິມາປຣະກອນ ຮອງນາຍົກ ລັດຖະມົນຕີ ທັງເປັນລັດຖະມົນຕີວ່າການກະຊວງການຕ່າງປະເທດໄທ ແລະທ່ານຟາມບິງມິງ ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງການຕ່າງປະເທດຫວຽດນາມ ທີ່ມາເຂົ້າຮ່ວມວາງວາງສະແດງສິນຄ້າຈີນ-ອາຊຽນ ແລະ ກອງປະຊຸມສຸດຍອດການຄ້າແລະການລົງທຶນຈີນ-ອາຊຽນຄັ້ງທີ 11 ຢູ່ທີ່ນະຄອນນານນິງເຂດກວາງຊີປະເທດຈີນ.
ໃນເວລາພົບປະກັບທ່ານບຸນຍັງ ວໍລະຈິດ ຮອງປະທານປະເທດລາວ, ທ່ານຈ່າງກ່າວລີ້ ໄດ້ສະແດງຄວາມຂອບໃຈຕໍ່ວົງການຕ່າງໆຂອງລາວທີ່ໄດ້ບໍລິຈາກເງິນໃຫ້ແກ່ເຂດປະສົບໄພແຜ່ນດິນໄຫວເມືອງຫຼູຕ້ຽນແຂວງຢູນນານ. ທ່ານກ່າວວ່າ, ມິດຕະພາບອັນເປັນມູນເຊື້ອລະຫວ່າງຈີນກັບລາວ ມີປະຫວັດສາດມາແຕ່ດົນນານ ແລະນັບມື້ນັບໝັ້ນຄົງ, ສອງປະເທດກໍໄດ້ຄ່ອຍໆກາຍເປັນປະຊາຄົມຊາຕາກຳທີ່ມີປະໂຫຍດຮ່ວມກັນ ແລະພັດທະນາຮ່ວມກັນ. ປີນີ້ ທ່ານຈູມມາລີ ໄຊຍະສອນ ເລຂາທິການໃຫຍ່ສູນກາງພັກປະຊາຊົນປະຕິວັດລາວ ແລະທ່ານທອງສິງ ທຳມະວົງ ນາຍົກລັດຖະມົນຕີລາວ ຕ່າງກໍໄດ້ມາຢ້ຽມຢາມຈີນ, ແລະໄດ້ບັນລຸຄວາມເຫັນທີ່ເປັນເອກະສັນກັນທີ່ສຳຄັນກັບທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ ແລະ ທ່ານຫຼີເຄີ້ສຽງ ນາຍົກລັດຖະມົນຕີຈີນ ກ່ຽວກັບການຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ ພາຍໃຕ້ສະຖານະການໃໝ່. ຝ່າຍຈີນຍິນດີສືບຕໍ່ຮັກສາການໄປມາຫາສູ່ກັນລະຫວ່າງການນຳຂັ້ນສູງ, ຊຸກຍູ້ການຮ່ວມມືທີ່ຕິດແທດຕົວຈິງໃນຂົງເຂດທາງລົດໄຟ, ຊັບພະຍາກອນ, ພະລັງງານ, ເສດຖະກິດການຄ້າ ແລະທ້ອງຖິ່ນເປັນຕົ້ນ, ເພື່ອສ້າງຄວາມສຸກໃຫ້ແກ່ປະຊາຊົນສອງຊາດ.
ທ່ານບຸນຍັງ ວໍລະຈິດກ່າວວ່າ, ການຮ່ວມມືລະຫວ່າງລາວກັບຈີນໃນຂົງເຂດເສດຖະກິດການຄ້າແລະການລົງທຶນ ໄດ້ເສີມຂະຫຍາຍບົດບາດທີ່ສຳຄັນເພື່ອການພັດທະນາເສດຖະກິດແລະສັງຄົມຂອງລາວ, ພັກແລະລັດຖະບານລາວ ຍິນດີສືບຕໍ່ຊຸກຍູ້ການຮ່ວມມືທາງຍຸດທະສາດຮອບດ້ານລະຫວ່າງສອງປະເທດ ໃຫ້ພັດທະນາໄປສູ່ລະດັບທີ່ສູງກວ່າເກົ່າ.
 |
