ວັນທີ 16 ກັນຍານີ້, ຜູ້ຕາງໜ້າເຈົ້າເມືອງຂອງຈີນແລະປະເທດອາຊຽນໄດ້ເຂົ້າຮ່ວມກອງປະຊຸມໂຕະມົນເຈົ້າເມືອງເມືອງທີ່ສຳຄັນຕາມແລວເສດຖະກິດຈີນ-ສິງກະໂປທີ່ຈັດຂຶ້ນຢູ່ນະຄອນໜານໜິງ, ເທດສະບານຂອງເຂດປົກຄອງຕົນເອງເຜົ່າຈ້ວງກວາງຊີຈີນ, ໂດຍຮ່ວມກັນຄົ້ນຄວ້າແລະປຶກສາຫາລືກ່ຽວກັບການເພີ່ມທະວີການຮ່ວມມືລະຫວ່າງຕົວເມືອງທີ່ສຳຄັນເພື່ອຊຸກຍູ້ການກໍ່ສ້າງແລວເສດຖະກິດຈີນ-ສິງກະໂປ ພາຍໃຕ້ຂອບການຮ່ວມມືລະຫວ່າງຈີນ-ອາຊຽນ.
ພາຍຫຼັງກອງປະຊຸມໄດ້ສິ້ນສຸດລົງ, ຜູ້ແທນທີ່ເຂົ້າຮ່ວມກອງປະຊຸມໄດ້ຮ່ວມກັນຖະແຫຼງ "ຄວາມຮັບຮູ້ທີ່ເປັນເອກະພາບກັນໜານໜິງ", ໂດຍກ່າວວ່າຈະເສີມຂະຫຍາຍບົດບາດທີ່ສຳຄັນຂອງຕົວເມືອງທີ່ສຳຄັນຕາມແຕ່ລະຈຸດ, ສ້າງກົນໄກຮ່ວມມືລະຫວ່າງຕົວເມືອງເຫຼົ່ານີ້, ເຮັດແທ້ທຳຈິງ ເພື່ອຊຸກຍູ້ການກໍ່ສ້າງແລວເສດຖະກິດຈີນ-ສິງກະໂປ.
ແລວເສດຖະກິດຈີນ-ສິງກະໂປແມ່ນແລວເສດຖະກິດຂ້າມຊາດ ໂດຍຖືເອົານະຄອນໜານໜິງ ແລະ ນະຄອນຄຸນມິງເປັນຈຸດເລີ່ມຕົ້ນ, ຜ່ານແຫຼມອິນດູຈີນລົງໃຕ້ຈົນຮອດສິງກະໂປ, ເຊິ່ງກວມເອົາບັນດາປະເທດໃນແຫຼມອິນດູຈີນ ເຊັ່ນ: ລາວ, ຫວຽດນາມ, ກຳປູເຈຍ, ໄທ ແລະ ມາເລເຊຍ, ຖືກຖືເປັນຂົວທາງບົກທີ່ຕິດຕໍ່ຈີນ ແລະ ແຫຼມອິນດູຈີນ, ໃນອະນາຄົດຈະເປັນກະດູກສັນຫຼັງແຫ່ງການຮ່ວມມືລະຫວ່າງຈີນ-ອາຊຽນ.
