ງານວາງສະແດງສິນຄ້າຈີນ-ອາຊຽນຄັ້ງທີ 11 ແລະ ກອງປະຊຸມສຸດຍອດການຄ້າແລະການລົງທຶນຈີນ-ອາຊຽນຄັ້ງທີ 11 ໄດ້ຈັດຂຶ້ນຢູ່ນະຄອນໜານໜິງ ເຂດປົກຄອງຕົນເອງເຜົ່າຈ້ວງກວາງຊີຈີນໃນວັນທີ 16 ກັນຍານີ້. ທ່ານຈ່າງກ່າວລີ, ຮອງນາຍົກລັດຖະມົນຕີຈີນ, ທ່ານບຸນຍັງ ວໍລະຈິດ, ຮອງປະທານປະເທດລາວ, ທ່ານລີຊຽນລຸງ, ນາຍົກລັດຖະມົນຕີສິງກະໂປ, ທ່ານຮຸນແຊນ, ນາຍົກລັດຖະມົນຕີກຳປູເຈຍ, ທ່ານນຽນຕຸນ, ຮອງປະທານາທິບໍດີມຽນມາ, ທ່ານທະນາສັກ ປະຕິມາປຣະກອນ, ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງການຕ່າງປະເທດໄທ ແລະ ທ່ານຟາມບິງມິງ, ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງການຕ່າງປະເທດຫວຽດນາມ ໄດ້ເຂົ້າຮ່ວມກອງປະຊຸມ ແລະຕ່າງກໍໄດ້ກ່າວຄຳປາໄສໃນພິທີຄັ້ງນີ້, ເຊິ່ງຄຳປາໄສຂອງບັນດາທ່ານຕ່າງກໍໄດ້ປິ່ນອ້ອມຫົວຂໍ້ "ການຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21" ແລະການຍົກລະດັບເຂດການຄ້າເສລີຈີນ-ອາຊຽນ ເປັນຕົ້ນ.
ໃນພິທີຄັ້ງນີ້, ທ່ານຈ່າງກ່າວລີ, ຮອງນາຍົກລັດຖະມົນຕີຈີນກ່າວວ່າ: ເສັ້ນທາງສາຍໄໝທາງທະເລທີ່ມີຂຶ້ນກ່ອນໜ້ານີ້ 2000 ກວ່າປີ ໄດ້ສ້າງຊ່ອງທາງແຫ່ງການແລກປ່ຽນກັນດ້ານເສດຖະກິດການຄ້າ, ວັດທະນະທຳ ແລະ ຄວາມຮັກແພງ ລະຫວ່າງປະຊາຊົນຈີນແລະປະເທດອາຊີຕາເວັນອອກສຽງໃຕ້. ທ່ານສີຈິ້ນຜິງ, ປະທານປະເທດຈີນໄດ້ສະເໜີຂໍ້ລິເລີ່ມຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21 ໃນເວລາເດີນທາງຢ້ຽມຢາມອິນໂດເນເຊຍເມື່ອປີກາຍນີ້, ອັນໄດ້ຊີ້ທິດທາງແຫ່ງການພັດທະນາການພົວພັນລະຫວ່າງຈີນ-ອາຊຽນຕື່ມອີກ. ທ່ານຈ່າງກ່າວລີ ກ່າວວ່າ:"ອາຊຽນແມ່ນພາກພື້ນແຫ່ງເສັ້ນທາງສາຍໄໝທາງທະເລ, ແລະກໍແມ່ນພາກພື້ນທີ່ສຳຄັນໃນການສ້າງເສັ້ນທາງສາຍໄໝທາງທະເລສະຕະວັດທີ 21. ພວກຂ້າພະເຈົ້າຍິນດີເພີ່ມທະວີການຮ່ວມມືທາງທະເລກັບປະເທດອາຊຽນ, ເຮັດໃຫ້ການຮ່ວມມືທາງທະເລກາຍເປັນຈຸດຮຸ່ງໃສໃໝ່ ແລະ ພະລັງຊຸກດັນໃໝ່ແຫ່ງການຂະຫຍາຍການພົວພັນລະຫວ່າງຈີນ-ອາຊຽນ."
ທ່ານຈ່າງກ່າວລີ ໄດ້ວາງ 6 ຂໍ້ສະເໜີໃນການຊຸກຍູ້ການຂະຫຍາຍການພົວພັນລະຫວ່າງຈີນ-ອາຊຽນຕື່ມອີກ, ເຊິ່ງລວມທັງການສຸມກຳລັງສ້າງຄວາມໄວ້ເນື້ອເຊື່ອໃຈກັນຢ່າງເລິກເຊິ່ງດ້ານການເມືອງ, ສຸມກຳລັງຍົກຄຸນນະພາບແລະລະດັບຂອງເຂດການຄ້າເສລີຈີນ-ອາຊຽນໃຫ້ສູງຂຶ້ນ, ສຸມກຳລັງເພີ່ມທະວີການກໍ່ສ້າງດ້ານການເຊື່ອມຈອດກັນ, ສຸມກຳລັງດຳເນີນການຮ່ວມມືທາງທະເລ, ສຸມກຳລັງຊຸກຍູ້ການຮ່ວມມືໃນອະນຸພາກພື້ນ ແລະ ສຸມກຳລັງເພີ່ມທະວີການແລກປ່ຽນດ້ານວັດທະນະທຳ-ສັງຄົມ.
ຜູ້ນຳຂອງປະເທດອາຊຽນທີ່ເຂົ້າຮ່ວມກອງປະຊຸມ ຕ່າງກໍໄດ້ສະແດງຄວາມຍິນດີຕໍ່ຂໍ້ລິເລີ່ມ "ຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21". ທ່ານນຽນຕຸນ, ຮອງປະທານາທິບໍດີມຽນມາ ກ່າວວ່າ: ເສັ້ນທາງສາຍໄໝທາງທະເລ ຈະສ້າງໂອກາດໃໝ່ໃຫ້ແກ່ປະເທດອາຊຽນ ແລະ ຈີນໃນການຊຸກຍູ້ການພົວພັນມິດຕະພາບ ແລະ ການຮ່ວມມື ໃນຫຼາຍຂົງເຂດ.
ທ່ານທະນາສັກ ປະຕິມາປຣະກອນ, ຮອງນາຍົກລັດຖະມົນຕີ ທັງເປັນລັດຖະມົນຕີວ່າການກະຊວງການຕ່າງປະເທດໄທ ກ່າວວ່າ: ການເຈລະຈາກ່ຽວກັບການຍົກລະດັບເຂດການຄ້າເສລີຈີນ-ອາຊຽນ ຈະເປັນການຍົກລະດັບແລະເປີດກວ້າງການພົວພັນຄູ່ຮ່ວມມືລະຫວ່າງສອງຝ່າຍຕື່ມອີກ, ແລະກໍປັບປຸງຖານະຂອງອາຊີຕາເວັນອອກໃນເສດຖະກິດໂລກ.