ເວທີປຶກສາຫາລືລະດັບສູງຂອງກອງປະຊຸມໃຫຍ່ການໂອນເຕັກໂນໂລຊີແລະການຮ່ວມມືທີ່ມີຫົວຄິດປະດິດສ້າງລະຫວ່າງຈີນ-ອາຊຽນຄັ້ງທີ 2 ໄດ້ຈັດຂຶ້ນຢູ່ນະຄອນນານນິງເຂດປົກຄອງຕົນເອງເຜົ່າຈ້ວງກວາງຊີຂອງຈີນໃນວັນທີ 16 ກັນຍານີ້, ທ່ານສາວຈ້ຽນລິນ, ລັດຖະມົນຕີຊ່ວຍວ່າການກະຊວງວິທະຍາສາດແລະເຕັກໂນໂລຊີຈີນກ່າວໃນກອງປະຊຸມວ່າ, ແຜນການຄູ່ຮ່ວມມືດ້ານວິທະຍາສາດແລະເຕັກໂນໂລຊີລະຫວ່າງຈີນ-ອາຊຽນໄດ້ຮັບຄວາມຄືບໜ້າໃນຫຼາຍດ້ານ, ໃນຂັ້ນຕອນຕໍ່ໜ້າ, ຈະເລັ່ງລັດສ້າງເຄືອຂ່າຍ ປະສານງານດ້ານວິທະຍາສາດແລະເຕັກໂນໂລຊີກະສິກຳລະຫວ່າງຈີນ-ອາຊຽນ, ຊຸກຍູ້ການເຄື່ອນໄຫວໃນດ້ານພະລັງງານໃໝ່ແລະພະລັງງານໝູນວຽນລະຫວ່າງຈີນ-ອາຊຽນ.
ທ່ານສາວຈ້ຽນລິນແນະນຳໃຫ້ຮູ້ວ່າ, ແຜນການຄູ່ຮ່ວມມືດ້ານວິທະຍາສາດແລະເຕັກໂນໂລຊີລະຫວ່າງຈີນ-ອາຊຽນມີຈຸດປະສົງເພື່ອແບ່ງເປັນບົດຮຽນຜົນສຳເລັດໃນດ້ານການພັດທະນາວິທະຍາສາດແລະເຕັກໂນໂລຊີ, ແລະລົງເລິກການຮ່ວມມືລະຫວ່າງຈີນ-ອາຊຽນໃນຂົງເຂດວິທະຍາສາດແລະເຕັກໂນໂລຊີແລະການພັດທະນາແບບຍືນຍົງໂດຍຜ່ານການດຳເນີນການຮ່ວມມືສອງຝ່າຍແລະການຮ່ວມມືຫຼາຍຝ່າຍ. ໃນແຜນການ, ໃນດ້ານການຮ່ວມກັນສ້າງຫ້ອງທົດລອງຮ່ວມ, ຮ່ວມກັນສ້າງສູນໂອນເຕັກໂນໂລຊີຈີນ-ອາຊຽນ, ແຜນການກ່ຽວກັບນັກວິທະຍາສາດຊາວໜຸ່ມທີ່ດີເດັ່ນຂອງປະເທດອາຊຽນມາເຮັດວຽກຢູ່ຈີນ, ຮ່ວມກັນສ້າງເວທີທີ່ແບ່ງປັນແລະໃຫ້ບໍລິການດ້ານຂໍ້ມູນຜ່ານດາວທຽມທີ່ຄວບຄຸມໄລຍະໄກຈີນ-ອາຊຽນແລະດ້ານອື່ນໆລ້ວນແຕ່ໄດ້ຮັບຄວາມຄືບໜ້າຫຼາຍສົມຄວນ.
ທ່ານສາວຈ້ຽນລິນຍັງກ່າວວ່າ, ພາກສ່ວນວິທະຍາສາດແລະເຕັກໂນໂລຊີຂອງຈີນແລະພາກສ່ວນຄຸ້ມຄອງທາງດ້ານວິທະຍາສາດແລະເຕັກໂນໂລຊີຂອງປະເທດທີ່ກ່ຽວຂ້ອງໄດ້ເລີ່ມດຳເນີນການສ້າງຫ້ອງທົດລອງຮ່ວມອຸດສາຫະກຳອາຫານຈີນ-ກຳປູເຈຍ, ການສ້າງສູນຄົ້ນຄວ້າຮ່ວມທາງລົດໄຟຄວາມໄວສູງຈີນ-ໄທ, ຫ້ອງທົດລອງຮ່ວມດ້ານລາດາແລະໂທລະຄົມຜ່ານດາວທຽມ, ຫ້ອງທົດລອງຮ່ວມພະລັງງານໃໝ່ແລະພະລັງງານໝູນວຽນຈີນ-ລາວແລະການສ້າງຫ້ອງທົດລອງທີ່ເປັນຈຸດສຸມອື່ນໆ.
 |
