ວັນທີ 16 ກັນຍານີ້, ກອງປະຊຸມສຸດຍອດການຄ້າເອເລັກໂຕນິກຈີນ-ອາຊຽນຄັ້ງປະຖົມມະເລີກໄດ້ຈັດຂຶ້ນຢູ່ນະຄອນນານນິງ ເຂດປົກຄອງຕົນເອງເຜົ່າຈ້ວງກວາງຊີຂອງຈີນ. ເຈົ້າໜ້າທີ່ພາກສ່ວນການຄ້າແລະຜູ້ຕາງໜ້າຂອງວິສາຫະກິດການຄ້າເອເລັກໂຕນິກທີ່ມາຈາກຈີນແລະອາຊຽນ ໄດ້ປຶກສາຫາລືກັນໂດຍປິ່ນອ້ອມຫົວຂໍ້ຫຼັກຄື "ການຄ້າເອເລັກໂຕນິກຂ້າມຊາຍແດນ, ຕົວເມືອງແຫ່ງສະຕິປັນຍາ ແລະເສດຖະກິດທາງອິນເຕີເນັດ".
ທ່ານຫວາງໜາຍຊົວ, ຫົວໜ້າພະແນກການຄ້າເຂດກວາງຊີຈີນກ່າວວ່າ, ນີ້ແມ່ນຄັ້ງທໍາອິດທີ່ງານວາງສະແດງສິນຄ້າຈີນ-ອາຊຽນໄດ້ສ້າງຕັ້ງເວທີປຶກສາຫາລືກ່ຽວກັບການຄ້າເອເລັກໂຕນິກ ເຊິ່ງມີຈຸດປະສົງເພື່ອລວບລວມຊັບພະຍາກອນໃໝ່ແລະສົ່ງເສີມໂຄງການໃໝ່ໃຫ້ແກ່ການຮ່ວມມືດ້ານເອເລັກໂຕນິກລະຫວ່າງຈີນກັບອາຊຽນ ໂດຍຜ່ານການດໍາເນີນການສົນທະນາແລະການແລກປ່ຽນຂັ້ນສູງ.
ອິນໂດເນເຊຍ, ສິງກະໂປ ແລະປະເທດອື່ນໆ ໄດ້ສົ່ງເຈົ້າໜ້າທີ່ພາກສ່ວນການຄ້າເຂົ້າຮ່ວມກອງປະຊຸມຄັ້ງນີ້, ບໍລີສັດ Amazon , Alibaba, JD, Soufun, S.F. Express ແລະວິສາຫະກິດອື່ນໆທັງພາຍໃນແລະຕ່າງປະເທດ ກໍໄດ້ສົ່ງຜູ້ຕາງໜ້າໄປເຂົ້າຮ່ວມກອງປະຊຸມຄັ້ງນີ້ເຊັ່ນດຽວກັນ.