ປ້າຍໂຄສະນາການທ່ອງທ່ຽວຂອງບິງຕວນຫວຽດນາມ
ຕາມຂ່າວCRI, ນັບແຕ່ງານວາງສະແດງສິນຄ້າຈີນ-ອາຊຽນຄັ້ງທີ 11 ແລະກອງປະຊຸມສຸດຍອດວ່າດ້ວຍການຄ້າແລະການລົງທຶນຈີນ-ອາຊຽນຄັ້ງທີ 11 ໄດ້ໄຂຂຶ້ນໃນວັນທີ 16 ກັນຍາທີ່ນະຄອນນານນິງເຂດປົກຄອງຕົນເອງເຜົ່າຈ້ວງກວາງຊີຈີນມານີ້, ກິດຈະກຳຕ່າງໆທີ່ປິ່ນອ້ອມງານວາງສະແດງແລະກອງປະຊຸມໄດ້ດຶງດູດການມີສ່ວນຮ່ວມຈາກນັກທຸລະກິດຈີນແລະຕ່າງປະເທດ, ເຊິ່ງໃນນັ້ນ ເຂດວາງສະແດງພາຍໃຕ້ຫົວຂໍ້ "ເມືອງແຫ່ງສະເໜ່"ຂອງຫວຽດນາມໄດ້ກາຍເປັນຈຸດເດັ່ນທີ່ດຶງດູດຄວາມສົນໃຈຂອງນັກທຸລະກິດຈຳນວນຫຼວງຫຼາຍ.
ໝາກມັງກອນຫວຽດນາມທີ່ນຳມາວາງສະແດງໃນງານ
ໃນງານວາງສະແດງຄັ້ງນີ້, "ເມືອງແຫ່ງສະເໜ່"ຂອງຫວຽດນາມກໍຄືແຂວງບິງຕວນ. ເຂດວາງສະແດງແຂວງບິງຕວນກວມເນື້ອທີ່ປະມານ 180 ຕາແມັດ, ເຊິ່ງໄດ້ໂຄສະນາຜະລິດຕະພັນທີ່ມີເອກະລັກສະເພາະຕົວແລະໂຄງການທ່ອງທ່ຽວຂອງແຂວງນີ້. ທ່ານຟາມຕວງທີ ຮອງປະທານສະມາຄົມສົ່ງເສີມການຄ້າແຂວງບິງຕວນຫວຽດນາມແນະ ນຳໃຫ້ຮູ້ວ່າ, ບິງຕວນມີພູມອາກາດທີ່ດີ, ທິວທັດທຳມະຊາດສວຍສົດງົດງາມ, ຊັບພະຍາກອນ ທ່ອງທ່ຽວ ມີຄວາມອຸດົມສົມບູນ, ເຊິ່ງມີລູກຄ້າຈຳນວນຫຼວງຫຼາຍໄດ້ມາສອບຖາມຂໍ້ມູນ ທີ່ກ່ຽວຂ້ອງ ຢູ່ເຂດວາງສະແດງ.