ຕາມຂ່າວCRI: ໃນເວລາໃຫ້ສຳພາດສະເພາະຂອງນັກຂ່າວ CRI ໃນງານວາງສະແດງສິນຄ້າຈີນ-ອາຊຽນຄັ້ງທີ 11 ແລະກອງປະຊຸມສຸດຍອດການຄ້າແລະການລົງທຶນຈີນ-ອາຊຽນຄັ້ງທີ 11 ທີ່ຈັດຂຶ້ນຢູ່ເມືອງນານນີງເຂດກວາງຊີຂອງຈີນ, ທ່ານພົງສະຫວັດ ບຸບຜາ, ລັດຖະມົນຕີປະຈຳທຳນຽບປະທານປະເທດຂອງລາວໄດ້ກ່າວວ່າ:ເຂດການຄ້າເສລີຈີນ-ອາຊຽນທີ່ຈີນກັບອາຊຽນກຳລັງຍົກລະດັບໃຫ້ສູງຂຶ້ນຢ່າງຕັ້ງໜ້າ ພ້ອມກັບແລວທາງຍຸດທະສາດກ່ຽວກັບຈີນ-ອາຊຽນຮ່ວມມືກັນສ້າງເສັ້ນທາງສາຍໄໝທາງທະເລໃນສະຕະວັດທີ 21 ທີ່ສະເໜີໂດຍທ່ານປະທານສີຈິ້ນຜີງນັ້ນ ມີຄວາມໝາຍສຳຄັນຕໍ່ການພັດທະນາເສດຖະກິດຂອງລາວ.
ທ່ານພົງສະຫວັດຊີ້ອອກວ່າ, ຫຼັງຈາກສ້າງຕັ້ງເຂດການຄ້າເສລີຈີນ-ອາຊຽນຢ່າງເປັນທາງການມານີ້, ການຮ່ວມມືລະຫວ່າງສອງຝ່າຍແລະລະຫວ່າງຫຼາຍຝ່າຍທີ່ນັບມື້ນັບຄົບຖ້ວນຂຶ້ນນັ້ນ ເຊິ່ງໄດ້ນຳເອົາຜົນປະໂຫຍດອັນໃຫຍ່ຫຼວງມາໃຫ້ແກ່ລາວ,ໄດ້ຊຸກຍູ້ການພັດທະນາເສດຖະກິດຂອງລາວຢ່າງວ່ອງໄວ. ປັດຈຸບັນ, ຈີນກັບອາຊຽນພວມຕັ້ງໜ້າສ້າງເຂດການຄ້າເສລີຈີນ-ອາຊຽນໃຫ້ຂຶ້ນໃນລະດັບໃໝ່, ນີ້ມີຜົນດີຍິ່ງຂຶ້ນຕໍ່ການພັດທະນາເສດຖະກິດຂອງລາວ. ພາຍໃຕ້ຄວາມເປັນມາດັ່ງກ່າວນີ້, ງານວາງສະແດງສິນຄ້າຈີນ-ອາຊຽນຍັງມີຄວາມໝາຍສຳຄັນຢ່າງຍິ່ງຕໍ່ການຊຸກຍູ້ການພັດທະນາທາງເສດຖະກິດລະຫວ່າງຈີນ-ອາຊຽນແລະລະຫວ່າງຈີນ-ລາວ.
ທ່ານພົງສະຫວັດຍັງກ່າວວ່າ, ເຖິງວ່າລາວແມ່ນປະເທດທີ່ບໍ່ມີທາງອອກສູ່ທະເລກໍຕາມ, ແຕ່ຈີນກັບອາຊຽນສ້າງເສັ້ນທາງສາຍໄໝທາງທະເລໃນໄລຍະໃໝ່ນັ້ນ ກໍຈະສ້າງໂອກາດແລະຜົນປະໂຫຍດໃຫ້ແກ່ປະເທດລາວໃນຫຼາຍດ້ານຄື:ດ້ານການຄ້າ, ດ້ານຄົມມະນາຄົມ, ດ້ານການທ່ອງທ່ຽວແລະດ້ານວັດທະນະທຳເປັນຕົ້ນເຊັ່ນກັນ, ແນ່ນອນວ່າລາວກໍຍອມເຂົ້າຮ່ວມຂະບວນດັ່ງກ່າວນີ້ຢ່າງຕັ້ງໜ້າເຊັ່ນດຽວກັນ.ຫຼັງຈາກສຳເລັດການສຳພາດແລ້ວ, ທ່ານພົງສະຫວັດ ບຸບຜາ ພ້ອມກັບສະມາຊິກອື່ນໆຂອງຄະນະຜູ້ແທນລາວໄດ້ຮ່ວມກັນເດີນທາງໄປຢ້ຽມຢາມເມືອງໄປເຊີ້ຂອງເຂດກວາງຊີຢ່າງໄມຕີຈິດມິດຕະພາບ.
 |
