ເວທີປຶກສາຫາລືຜູ້ພິພາກສາໃຫຍ່ຈີນ-ອາຊຽນທີ່ໄດ້ດຳເນີນເປັນເວລາ 2 ວັນໄດ້ສຳເລັດວາລະປະຊຸມຕ່າງໆພາຍຫຼັງໄດ້ຮ່ວມກັນຜ່ານ "ຖະແຫຼງການນານນິງ"ລະຫວ່າງຜູ້ເຂົ້າຮ່ວມປະຊຸມ, ແລະໄດ້ອັດລົງຢູ່ນະຄອນນານນິງເຂດກວາງຊີຂອງຈີນ. ທ່ານໂຈ່ວສຽງ, ຫົວໜ້າຜູ້ພິພາກສາໃຫຍ່, ປະທານສານປະຊາຊົນສູງສຸດຂອງຈີນໄດ້ເຂົ້າຮ່ວມພິທີອັດທີ່ຈັດຂຶ້ນໃນວັນທີ 17 ກັນຍານີ້ແລະກ່າວຄຳປາໄສໃນພິທີ. ທ່ານໂຈ່ວສຽງກ່າວວ່າ, ການຈັດເວທີປຶກສາຫາລືຢ່າງສຳເລັດຜົນເປັນຂີດໝາຍສະແດງໃຫ້ເຫັນວ່າການຮ່ວມມືທີ່ຕິດແທດຕົວຈິງລະຫວ່າງຈີນກັບບັນດາປະເທດອາຊຽນໃນຂົງເຂດຕຸລາການໄດ້ເຂົ້າສູ່ໄລຍະໃໝ່ໃນປະຫວັດສາດ.
ຖະແຫຼງການນານນິງກ່າວເນັ້ນວ່າ, ສານສູງສຸດຂອງຈີນແລະບັນດາປະເທດອາຊຽນມີຄວາມຈຳເປັນໃນການຜ່ານການລົງເລິກການປະຕິຮູບດ້ານຕຸລາການ, ຊຸກຍູ້ການພັດທະນາແລະການປັບປຸງລະບອບຕຸລາການຂອງປະເທດຕົນໃຫ້ອຸດົມສົມບູນຂຶ້ນ, ສະໜອງການຄ້ຳປະກັນທາງກົດໝາຍໃຫ້ແກ່ການສ້າງໂຄງປະກອບລົງທຶນທີ່ມີຄວາມເສລີ, ຄວາມສະດວກສະບາຍ, ຄວາມໂປ່ງໃສແລະມີການແຂ່ງຂັນ, ສຸມໃສ່ການສ້າງສະພາບແວດລ້ອມດ້ານລະບຽບກົດໝາຍທີ່ມີຄວາມເສລີ, ຄວາມສະເໝີພາບ, ຄວາມຍຸດຕິທຳແລະມີຄວາມຊອບທຳໃຫ້ແກ່ການສ້າງເຂດການຄ້າເສລີຈີນ-ອາຊຽນ.
ຫົວໜ້າຜູ້ພິພາກສາໃຫຍ່ຂອງສານສູງສຸດບຼູໄນ, ທ່ານຄຳພັນ ສິດທິດຳພາ, ປະທານສານປະຊາຊົນສູງສຸດລາວ, ຫົວໜ້າຜູ້ພິພາກສາໃຫຍ່ຂອງສານສູງສຸດສິງກະໂປແລະທ່ານອື່ນໆໄດ້ກ່າວຄຳປາໄສໃນພິທີອັດເວທີປຶກສາຫາລືຄັ້ງນີ້ດ້ວຍ.
ພວກທ່ານກ່າວເນັ້ນວ່າ, ຜ່ານການປຶກສາຫາລືແລ້ວ, ເວທີປຶກສາຫາລືໄດ້ບັນລຸຄວາມຮັບຮູ້ທີ່ເປັນເອກະສັນກັນໃນການຮ່ວມມືດ້ານຕຸລາການ, ການປະຕິຮູບດ້ານຕຸລາການ, ການຄ້າຂ້າມຊາດ, ການຄຸ້ມຄອງດ້ານຕຸລາການແລະດ້ານອື່ນໆ. ພວກທ່ານຍັງໄດ້ສະເໜີໃຫ້ສ້າງກົນໄກຮ່ວມມືທີ່ມີປະສິດຜົນໃນໄລຍະຍາວນານ.
 |
