ຕາມຂ່າວ CRI, ງານວາງສະແດງສິນຄ້າຈີນ-ອາຊຽນຄັ້ງທີ 11 ແລະກອງປະຊຸມສຸດຍອດວ່າດ້ວຍການຄ້າແລະການລົງທຶນຈີນ-ອາຊຽນຄັ້ງທີ 11 ໂດຍມີຈີນແລະ 10 ປະເທດສະມາຊິກອາຊຽນຮ່ວມກັນເປັນເຈົ້າພາບໄດ້ອັດລົງດ້ວຍຜົນສຳເລັດອັນຈົບງາມໃນຕອນເຊົ້າວັນທີ 19 ກັນຍານີ້ທີ່ນະຄອນນານນິງເຂດປົກຄອງຕົນເອງເຜົ່າຈ້ວງກວາງຊີຈີນ. ງານວາງສະແດງທີ່ໄດ້ດຳເນີນມາເປັນເວລາ 4 ວັນໃນຄັ້ງນີ້ໄດ້ມີນັກທຸລະກິດແລະແຂກຄົນທີ່ມາເຂົ້າຮ່ວມງານບັນລຸເຖິງ 57.000 ຄົນ, ຄະນະນັກທຸລະກິດຈັດຊື້ສິນຄ້າມີຫຼາຍກວ່າ 80 ຄະນະ, ເຊິ່ງເພີ່ມຂຶ້ນ 14 %ເມື່ອທຽບໃສ່ງານວາງສະແດງຄັ້ງຜ່ານມາ.
ທ່ານເຈີ້ງຈຸ່ນຈ້ຽນ ເລຂາທິການກອງເລຂາງານວາງສະແດງສິນຄ້າຈີນ-ອາຊຽນກ່າວວ່າ, ໃນງານວາງສະແດງຄັ້ງນີ້ມີວິສາຫະກິດເຂົ້າຮ່ວມງານລວມທັງໝົດ 2330 ແຫ່ງ, ຮ້ານວາງສະແດງລວມທັງໝົດ 4600 ຮ້ານ, ໃນນີ້, ວິສາຫະກິດອາຊຽນແລະວິສາຫະກິດນອກເຂດແຄວ້ນມີ 1259 ຮ້ານ. ນອກນີ້, ງານວາງສະແດງຄັ້ງນີ້ຍິ່ງເນັ້ນໃສ່ການຄ້າແລະການລົງທຶນພ້ອມດ້ວຍຂົງເຂດທີ່ກ່ຽວຂ້ອງເພື່ອເຮັດໃຫ້ບົດບາດພື້ນຖານຂອງງານວາງສະແດງໃນດ້ານການຊື້ຂາຍສິນຄ້າແລະການຮ່ວມມືດ້ານການລົງທຶນຂະຫຍາຍໄປເຖິງຂົງເຂດທີ່ກ່ຽວຂ້ອງໃຫ້ຫຼາຍກວ່າເກົ່າຕື່ມອີກ, ເປີດກວ້າງບົດບາດໃນດ້ານການບໍລິການສັງລວມຂອງງານວາງສະແດງ, ສົ່ງເສີມໂຄງການອຸດສາຫະກຳໃຫ້ໄດ້ຮັບການປະຕິບັດຕົວຈິງ.
ກອງປະຊຸມເຈົ້າໜ້າທີ່ອາວຸໂສຂອງງານວາງສະແດງສິນຄ້າຈີນ-ອາຊຽນໄດ້ມີຂໍ້ຕົກລົງວ່າ, ງານວາງສະແດງສິນຄ້າຈີນ-ອາຊຽນຄັ້ງທີ 12 ຈະຈັດຂຶ້ນຢູ່ນະຄອນນານນິງເຂດປົກຄອງຕົນເອງເຜົ່າຈ້ວງກວາງຊີແຕ່ວັນທີ 18 ຫາວັນທີ 21 ກັນຍາປີ 2015, ແລະກຳນົດເອົາໄທເປັນປະເທດກິດຕິມະສັກຂອງງານວາງສະແດງຄັ້ງທີ 12 .
 |
