ກອງປະຊຸມເຈົ້າໜ້າອາວຸໂສຂອງງານວາງສະແດງສິນຄ້າຈີນ-ອາຊຽນໄດ້ຈັດຂຶ້ນຢູ່ນະຄອນນານນິງເຂດປົກຄອງຕົນເອງເຜົ່າຈ້ວງກວາງຊີຂອງຈີນໃນວັນທີ 18 ກັນຍາຜ່ານມານີ້. ກອງປະຊຸມໄດ້ຂໍ້ຕົກລົງເບື້ອງຕົ້ນວ່າງານວາງສະແດງສິນຄ້າຈີນ-ອາຊຽນຄັ້ງທີ 12 ຈະຈັດຂຶ້ນໃນວັນທີ 18 ຫາວັນທີ 21 ກັນຍາຂອງປີ 2015, ແລະໄທເປັນປະເທດກິຕິມະສັກ.
ທ່ານເຈີ້ງຈຸ່ນຈ້ຽນ, ເລຂາທິການໃຫຍ່ກອງເລຂາຂອງງານວາງສະແດງສິນຄ້າຈີນ-ອາຊຽນໄດ້ປະກາດແຈ້ງການໂດຍກ່າວວ່າ, ງານວາງສະແດງສິນຄ້າຈີນ-ອາຊຽນຄັ້ງທີ 11 ໄດ້ຖືການຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21 ເປັນຫົວຂໍ້ຕົ້ນຕໍທີ່ພົ້ນເດັ່ນ, ເປີດກວ້າງຂົງເຂດແລະພາກພື້ນຂອງການຮ່ວມມື, ການຮ່ວມມືດ້ານເສດຖະກິດການຄ້າໄດ້ມີປະສິດທິຜົນຕົວຈິງສູງຂຶ້ນຢ່າງຈະແຈ້ງ, ອັນໄດ້ສ້າງພື້ນຖານທີ່ດີໃຫ້ແກ່ການຍົກລະດັບຂອງງານວາງສະແດງສິນຄ້າຈີນ-ອາຊຽນ. ໃນໄລຍະຈັດງານວາງສະແດງ, ຍັງໄດ້ຈັດໃຫ້ມີກິດຈະກຳແລກປ່ຽນຕ່າງໆທີ່ມີໄມຕີຈິດມິດຕະພາບຂັ້ນສູງ, ສິງກະໂປເຊິ່ງເປັນປະເທດກິຕິມະສັກກໍ່ໄດ້ຈັດກິດຈະກຳທີ່ອຸດົມສົມບູນ. ງານວາງສະແດງສິນຄ້າຈີນ-ອາຊຽນຄັ້ງນີ້ໄດ້ໃຫ້ບໍລິການແບບປະດິດສ້າງໃໝ່, ຍົກລະດັບຂອງການຈັດງານ, ໄດ້ຮັບປະສິດທິຜົນໃໝ່, ພ້ອມທັງໄດ້ຮັບການຕີລາຄາສູງຈາກຜູ້ນຳຂອງປະເທດຕ່າງໆແລະໄດ້ຮັບຄວາມເຫັນດີຢ່າງກວ້າງຂວາງຈາກວົງການການຄ້າຂອງສອງຝ່າຍ.