ຕາມຂ່າວCRI: ງານວາງສະແດງສິນຄ້າຈີນ-ອາຊຽນທີ່ຖືເອົາການຮ່ວມກັນສ້າງເສັ້ນທາງສາຍໄໝທາງທະເລສະຕະວັດທີ 21 ເປັນຫົວຂໍ້ຕົ້ນຕໍໄດ້ຈັດຂຶ້ນຢູ່ນະຄອນນານນິງເຂດກວາງຊີຂອງຈີນແຕ່ວັນທີ 16 ຫາວັນທີ 19 ກັນຍານີ້. ການຄ້າແລະການລົງທຶນຫັນເປັນແບບສະດວກງ່າຍດາຍແມ່ນຂົງເຂດທີ່ເປັນບຸລິມະສິດໃນການສ້າງເສັ້ນທາງສາຍໄໝທາງທະເລສະຕະວັດທີ 21. ການຍົກຄຸນນະພາບແລະລະດັບຂອງເຂດການຄ້າເສລີຈີນ-ອາຊຽນສາມາດຊຸກຍູ້ການໄປມາຫາສູ່ດ້ານເສດຖະກິດການຄ້າລະຫວ່າງສອງຝ່າຍຈີນກັບບັນດາປະເທດອາຊຽນ. ເຈົ້າໜ້າທີ່ແລະນັກທຸລະກິດຂອງປະເທດອາຊຽນທີ່ເຂົ້າຮ່ວມງານວາງສະແດງສິນຄ້າຈີນ-ອາຊຽນໃນຄັ້ງນີ້ມີຄວາມປາຖະໜາອັນແຮງກ້າຕໍ່ການຍົກລະດັບເຂດການຄ້າເສລີຈີນ-ອາຊຽນ. ໃນພິທີເຊັນສັນຍາໃນງານວາງສະແດງສິນຄ້າຈີນ-ອາຊຽນຄັ້ງນີ້ໄດ້ມີການເຊັນສັນຍາໂຄງການຮ່ວມມືເສດຖະກິດສາກົນ 72 ໂຄງການ, ໃນນັ້ນ, ໂຄງການຮ່ວມມືທີ່ໄດ້ເຊັນລະຫວ່າງຈີນກັບບັນດາປະເທດອາຊຽນມີເຖິງ 22 ໂຄງການ.
ນາງສຸກັນຍາ ທຳວົງສາ, ນັກທຸລະກິດຂອງລາວຜູ້ໜຶ່ງບອກໃຫ້ນັກຂ່າວຮູ້ວ່າ, ພາຍຫຼັງການຍົກລະດັບເຂດການຄ້າເສລີຈີນ-ອາຊຽນແລ້ວຫວັງວ່າຈະສາມາດເຮັດໃຫ້ນັກທຸລະກິດຂອງລາວເຂົ້າສູ່ຕະຫຼາດຂອງຈີນຫຼາຍກວ່າເກົ່າ, ປະເພດສິນຄ້າທີ່ລາວນຳມາເຂົ້າຮ່ວມການວາງສະແດງຈະອຸດົມສົມບູນກວ່າເກົ່າ. ນາງກ່າວອີກວ່າ:
"ງານວາງສະແດງສິນຄ້າຈີນ-ອາຊຽນ, ເຂດການຄ້າເສລີຈີນ-ອາຊຽນລ້ວນແຕ່ໄດ້ເຮັດໃຫ້ໂລກເພີ່ມທະວີຄວາມເຂົ້າໃຈຕໍ່ກັບລາວ, ເຮັດໃຫ້ທົ່ວໂລກຮູ້ວ່າຢູ່ລາວມີຊັບພະຍາກອນທີ່ອຸດົມສົມບູນ. ໃນມື້ທີ່ຈັດງານວາງສະແດງ, ມີນັກທຸລະກິດຫຼາຍຄົນໄດ້ແລກປ່ຽນກັບພວກເຮົາເພື່ອຈັດຊື້ແລະຈອງຊື້ສິນຄ້າ,ເຊິ່ງກະເປົາທີ່ເປັນເຄື່ອງຫັດຖະກຳພື້ນເມືອງຂອງລາວເຫຼົ່ານີ້ກໍ່ໄດ້ຮັບຄວາມນິຍົມຊົມຊອບຫຼາຍຈາກຄົນທັງຫຼາຍ, ຫວັງວ່າພາຍຫຼັງການຍົກລະດັບເຂດການຄ້າເສລີແລ້ວສິນຄ້າຂອງພວກເຮົາສາມາດຂາຍໄດ້ດີກວ່າເກົ່າ."