ວັນທີ 25 ກັນຍານີ້, ຢູ່ທີ່ປັກກິ່ງ, ທ່ານໂລລີມິງ, ຮອງປະທານຄະນະກຳມະການວຽກງານຊົນເຜົ່າແຫ່ງຊາດຈີນກ່າວວ່າ, ໃນ 10 ປີຜ່ານມາແມ່ນທົດສະວັດທີ່ມີການພັດທະນາໄວທີ່ສຸດຢູ່ເຂດຊົນເຜົ່າສ່ວນໜ້ອຍຂອງຈີນແລະກໍ່ແມ່ນທົດສະວັດທີ່ປະຊາຊົນຊົນເຜົ່າສ່ວນໜ້ອຍໄດ້ຮັບຜົນປະໂຫຍດຫຼາຍທີ່ສຸດ.
ໃນກອງປະຊຸມຂ່າວຂອງຫ້ອງການຖະແຫຼງຂ່າວຄະນະລັດຖະບານຈີນທີ່ຈັດຂຶ້ນໃນມື້ດຽວກັນ, ທ່ານໂລລີມິງຊີ້ອອກວ່າ, ເລີ່ມແຕ່ແຜນການ 5 ປີຄັ້ງທີ 11 ເປັນຕົ້ນມາ, ສູນກາງຈີນໄດ້ຈັດວາງທຶນເງິນປະເພດຕ່າງໆຂອງ 8 ແຂວງແລະເຂດຊົນເຜົ່າຄື: ເຂດປົກຄອງຕົນເອງມົງໂກໃນ, ເຂດປົກຄອງຕົນເອງເຜົ່າຫຸຍນິງເຊ້ຍ, ເຂດປົກຄອງຕົນເອງເຜົ່າອຸຍເກີຊິ່ນຈ່ຽງ, ເຂດປົກຄອງຕົນເອງຕິເບດ, ເຂດປົກຄອງຕົນເອງເຜົ່າຈ້ວງກວາງຊີ, ແຂວງກຸ້ຍໂຈ່ວ, ແຂວງຢຸນນານແລະແຂວງຊິ່ງໄຫຂອງຈີນໄລ່ລວມແລ້ວເປັນ 5.300 ຕື້ຢວນ, ໄດ້ຊຸກຍູ້ເສດຖະກິດ-ສັງຄົມຂອງເຂດຊົນເຜົ່າໃຫ້ພັດທະນາຢ່າງຕໍ່ເນື່ອງ, ວ່ອງໄວແລະປອດໃສຢ່າງແຂງແຮງ. ຜ່ານການສະໜັບສະໜູນມາເປັນເວລາຫຼາຍປີ, ລາຍຮັບສະເລ່ຍຕໍ່ຫົວຄົນຂອງຊົນເຜົ່າທີ່ມີປະຊາກອນໜ້ອຍບາງຊົນເຜົ່າໄດ້ຫຼາຍກວ່າຫຼືໃກ້ຈະຂຶ້ນຮອດລະດັບສະເລ່ຍຂອງທົ່ວປະເທດ.