ເນື່ອງໃນໂອກາດວັນຊາດຂອງສາທາລະນະລັດປະຊາຊົນຈີນຄົບຮອບ 65 ປີໃກ້ຈະວຽນມາເຖິງ, ນາງເລີຍຊີ່ຢິງ ນັກສຶກສາທີ່ກຳລັງຮຽນປະລິນຍາເອກຢູ່ມະຫາວິທະຍາໄລແຫ່ງຊາດອົສຕຣາລີ ໄດ້ລິເລີ່ມໃຫ້ຈັດກິດຈະກຳທີ່ມີຊື່ວ່າ "ຂ້ອຍຖ່າຍຮູບນຳທຸງຊາດ" ຢູ່ມີໂກຣບຣອກຂອງເວັບໄຊຊິນນາ(weibo.com), ໂດຍລິເລີ່ມໃຫ້ທຸກຄົນທີ່ເຂົ້າຮ່ວມຖ່າຍຮູບນຳທຸງແດງ 5 ດາວ ເຊິ່ງເປັນທຸງຊາດຂອງຈີນ ແລະ ຂຽນ ຄຳອວຍພອນຕໍ່ປະເທດຊາດໄວ້. ຂໍ້ລິເລີ່ມນີ້ໄດ້ຮັບການຕອບຮັບຢ່າງຟົດຟື້ນຈາກຊາວເນັດທັງຫຼາຍ.
ມາຮອດວັນທີ 23 ກັນຍານີ້, ກະທູ້ "ຂ້ອຍຖ່າຍຮູບນຳທຸງຊາດ" ຢູ່ມີໂກຣບຣອກ ໄດ້ມີຜູ້ອ່ານຫຼາຍກວ່າ 60 ລ້ານຄົນແລ້ວ, ແລະຍັງມີຜູ້ປະກອບຄຳຄິດຄຳເຫັນ 6 ໝື່ນກວ່າຄຳເຫັນ. ຊາວເນັດຈີນທີ່ມາຈາກແຫ່ງຕ່າງໆໃນທົ່ວໂລກ ໄດ້ສົ່ງຮູບທີ່ຕົນເອງຖ່າຍນຳທຸງຊາດ, ແລະໄດ້ກ່າວຄວາມຮັກປະເທດຊາດດ້ວຍສຽງທີ່ດັງອອກມາ.
ນາງເລີຍຊີ່ຢິງກ່າວວ່າ, ເມື່ອກິດຈະກຳນີ້ໄດ້ຮັບການຕອບຮັບຄືແນວນີ້ ເຊິ່ງເຮັດໃຫ້ນາງມີກຳລັງໃຈຫຼາຍ. ທັງນີ້ກໍສ່ອງແສງໃຫ້ເຫັນວ່າ, ປາກົດການຫຍໍ້ທໍ້ຢູ່ເທິງອິນເຕີເນັດນັ້ນ ບໍ່ສາມາດເປັນຕົວແທນໃຫ້ແກ່ຄວາມຄິດຄວາມເຫັນເນື້ອແທ້ຂອງປະຊາຊົນໄດ້. ຄົນທີ່ຮັກແພງປະເທດຊາດນັ້ນຈຶ່ງແມ່ນກະແສຕົ້ນຕໍຂອງສັງຄົມຈີນ.