ວັນທີ 25 ກັນຍານີ້ ທ່ານກ່ວນຮວາປິ່ງ ເອກອັກຄະລັດຖະທູດຈີນປະຈຳລາວ ໄດ້ຈັດກອງປະຊຸມຂ່າວກ່ຽວກັບວັນຊາດຈີນ 2014 ຢູ່ສະຖານທູດຈີນປະຈຳລາວ. ຂ່າວສານປະເທດລາວ, ໜັງສືພິມປະຊາຊົນ ແລະສື່ມວນຊົນຕົ້ນຕໍອື່ນໆຂອງລາວ ພ້ອມດ້ວຍສື່ມວນຊົນຂອງຈີນປະຈຳລາວ ໄດ້ເຂົ້າຮ່ວມກອງປະຊຸມຂ່າວດັ່ງກ່າວ.
ໃນກອງປະຊຸມຂ່າວຄັ້ງນີ້, ທ່ານເອກອັກຄະລັດຖະທູດກ່ວນຮວາປິ່ງ ໄດ້ແນະນຳໃຫ້ຮູ້ສະພາບການພັດທະນາຂອງຈີນໃນປັດຈຸບັນ. ທ່ານຍັງກ່າວຕື່ມວ່າ, ການພົວພັນລະຫວ່າງສອງພັກ, ສອງລັດຈີນກັບລາວ ພວມກ້າວເຂົ້າສູ່ໄລຍະພັດທະນາໃໝ່ໃນປະຫວັດສາດ, ການທີ່ເຮັດໃຫ້ການພົວພັນລະຫວ່າງສອງຝ່າຍມີເນື້ອໃນອຸດົມສົມບູນຍິ່ງໆຂຶ້ນ, ພັດທະນາການພົວພັນຍຸດທະສາດຮອບດ້ານທີ່ໄວ້ເນື້ອເຊື່ອໃຈກັນໃນລະດັບສູງ, ຊ່ວຍເຫຼືອເຊິ່ງກັນແລະກັນ ແລະຕ່າງຝ່າຍຕ່າງມີຜົນປະໂຫຍດໃນໄລຍະໃໝ່ນັ້ນ ແມ່ນຄວາມປາຖະໜາຮ່ວມຂອງປະຊາຊົນສອງຊາດ.
ໃນເວລາຕອບຄຳຖາມທີ່ສົນໃຈຂອງສື່ມວນຊົນລາວກ່ຽວກັບບັນຫາທາງລົດໄຟຈີນ-ລາວນັ້ນ ທ່ານເອກອັກຄະລັດຖະທູດກ່ວນຮວາປິ່ງກ່າວວ່າ, ທາງລົດໄຟຈີນ-ລາວ ແມ່ນໂຄງການຮ່ວມມືທີ່ມີຄວາມໝາຍຍຸດທະສາດແລະມີຄວາມໝາຍທາງປະຫວັດສາດທີ່ໃຫຍ່ຫຼວງລະຫວ່າງສອງປະເທດ, ເຊິ່ງໄດ້ຮັບຄວາມເອົາໃຈໃສ່ໃນລະດັບສູງຈາກລັດຖະບານແລະການນຳຂອງສອງປະເທດຈີນ-ລາວ. ປັດຈຸບັນ, ພາກສ່ວນທີ່ກ່ຽວຂ້ອງຂອງສອງປະເທດຈີນ-ລາວ ພວມດຳເນີນວຽກງານກ່ຽວກັບບັນຫາລະອຽດ, ແລະຝ່າຍຈີນຫວັງຢາກພະຍາຍາມຮ່ວມກັນກັບຝ່າຍລາວ ເພື່ອລົງມືກໍ່ສ້າງໂຄງການດັ່ງກ່າວໂດຍໄວເທົ່າທີ່ຈະໄວໄດ້.