ວັນທີ 1 ຕຸລາ ເປັນວັນທຳອິດແຫ່ງອາທິດພັກວັນຊາດຈີນ, ແຂວງກວາງຕຸ້ງກໍເຂົ້າສູ່ໄລຍະເວລາທີ່ມີນັກທ່ອງທ່ຽວອອກດ່ານເປັນຈຳນວນຫຼວງຫຼາຍ, ເມື່ອເບິ່ງຈາກຂໍ້ມູນຈາກບັນດາບໍລິສັດທ່ອງທ່ຽວໃຫຍ່ແລ້ວ ປາກົດວ່າ, ເຂດໄຕ້ຫວັນ, ໄທ, ຍີ່ປຸ່ນ ແລະ ສ. ເກົາຫຼີ ແມ່ນຈຸດໝາຍປາຍທາງທີ່ໄດ້ຮັບຄວາມນິຍົມທີ່ສຸດຈາກນັກທ່ອງທ່ຽວຂອງຈີນ. ໃນໄລຍະພັກວັນຊາດ, ນັກທ່ອງທ່ຽວຂອງແຂວງຢຸນນານຈຳນວນຫຼວງຫຼາຍ ໄດ້ເລືອກໄປທ່ຽວຢູ່ປະເທດອາຊີຕາເວັນອອກສຽງໃຕ້ແລະອາຊີໃຕ້.
ບໍລິສັດທ່ອງທ່ຽວຫຼາຍແຫ່ງຂອງແຂວງກວາງຕຸ້ງ ໄດ້ໃຫ້ຮູ້ວ່າ, ນອກຈາກໄປທ່ຽວເປັນຄອບຄົວແລ້ວ, ຊາວໜຸ່ມທີ່ເກີດຫຼັງປີ 1980 ໄດ້ກາຍເປັນກຸ່ມນັກທ່ອງທ່ຽວຕົ້ນຕໍທີ່ໄປທ່ຽວຢູ່ນອກແດນໃນໄລຍະພັກວັນຊາດ, ເສັ້ນທາງທ່ອງທ່ຽວຕາມອັດທະຍາໄສ ທີ່ໄປທ່ຽວຢູ່ໄທ, ສິງກະໂປ, ສ. ເກົາຫຼີ ແລະ ເຂດໄຕ້ຫວັນ ທີ່ລາຄາບໍ່ແພງ ໄດ້ຮັບຄວາມນິຍົມຫຼາຍ.
ດ່ານກວດຄົນເຂົ້າອອກເມືອງນະຄອນຄຸນມິງແຂວງຢຸນນານ ກ່າວວ່າ, ຕົວເລກທີ່ກ່ຽວຂ້ອງສະແດງໃຫ້ເຫັນວ່າ, ນັກທ່ອງທ່ຽວທີ່ຜ່ານດ່ານຄຸນມິງໄປທ່ຽວຢູ່ປະເທດອາຊີຕາເວັນອອກສຽງໃຕ້ ແລະ ປະເທດອາຊີໃຕ້ ໃນໄລຍະພັກວັນຊາດປີນີ້ ໄດ້ເພີ່ມຂຶ້ນເປັນຈຳນວນຫຼວງຫຼາຍເມື່ອທຽບກັບໄລຍະດຽວກັນຂອງທຸກປີຜ່ານມາ.