ຜົນງານຂອງປະເທດຈີນໃໝ່: ລົດບັນທຸກຍີ່ຫໍ້ "ເຈຟ້າງ" ຄົ້ນຄວ້າຜະລິດອອກຢ່າງສຳເລັດຜົນ
2014-10-03 16:01:22 cri
ໃນໄລຍະທີ່ສະຫາຍເໝົາເຈີຕົງຢ້ຽມຢາມຢູ່ສະຫະພາບໂຊວຽດເມື່ອປີ 1950, ຈີນກັບໂຊວຽດໄດ້ປຶກສາຕົກລົງກັນໂດຍໃຫ້ໂຊວຽດຊ່ວຍຈີນສ້າງໂຮງງານຜະລິດລົດບັນທຸກແຫ່ງທຳອິດ. ເມື່ອໄດ້ການວາງແຜນຢ່າງລະອຽດຮອບຄອບແລ້ວ, ຄະນະກຳມະການການເງິນສູນກາງຈີນໄດ້ອະນຸມັດໃຫ້ສ້າງໂຮງງານຜະລິດລົດຍົນເລກ 1 ຢູ່ເມືອງຊາງຊຸນແຂວງຈີຫຼິນ. ເດືອນມິຖຸນາປີ 1953, ສະຫາຍເໝົາເຈີຕົງໄດ້ເຊັນ "ຄຳຊີ້ນຳຂອງສູນກາງພັກກອມມູນິດຈີນກ່ຽວກັບການທຳຄວາມພະຍາຍາມເພື່ອສ້າງໂຮງງານຜະລິດລົດຍົນຊາງຊຸນໃຫ້ສຳເລັດຜົນພາຍໃນເວລາ 3 ປີ", ເດືອນກໍລະກົດໄດ້ຈັດພິທີວາງສີລາເລີກການສ້າງໂຮງງານດັ່ງກ່າວຢູ່ບ້ານເມິ້ງເຈ່ຍທີ່ຢູ່ເບື້ອງຕາເວັນຕົກສຽງໃຕ້ຂອງເມືອງຊາງຊຸນ, ສະຫາຍເໝົາເຈີຕົງໄດ້ຂຽນຄຳຈາລຶກໄວ້ວ່າ: ລະລຶກພິທີວາງສີລາເລີກການສ້າງໂຮງງານຜະລິດລົດຍົນເລກ 1.
ການສ້າງໂຮງງານດ່ັງກ່າວແຍກອອກຈາກການສະໜັບສະໜູນແລະການຊ່ວຍເຫລືອຂອງປະຊາຊົນທົ່ວປະເທດບໍ່ໄດ້, ພະນັກງານແລະກຳມະກອນວິຊາການຈຳນວນຫຼວງຫຼາຍຈາກແຫ່ງຕ່າງໆທົ່ວປະເທດໄດ້ໄປຊ່ວຍວຽກຢູ່ໂຮງງານດັ່ງກ່າວ. ໂຊວຽດໄດ້ສະໜອງເອກະສານອອກແບບຄົບຊຸດ, ແລະໄດ້ສົ່ງວິຊາການທີ່ມີບົດຮຽນໄປຊີ້ນຳວຽກງານຢູ່ໂຮງງານ. ວັນທີ 13 ກໍລະກົດ 1956, ລົດຍີ່ຫໍ້ " ເຈຟ້າງ" ງວດທຳອິດໄດ້ສຳເລັດການຜະລິດແລະອອກຈາກໂຮງງານຜະລິດລົດຍົນເລກ 1, ແລະສະຫາຍເໝົາເຈີຕົງຕັ້ງຊື່ເປັນ" ເຈຟ້າງ"(ມີຄວາມໝາຍວ່າ: ປົດປ່ອຍ), ນີ້ໄດ້ເປັນການສິ້ນສຸດປະຫວັດສາດທີ່ຈີນບໍ່ສາມາດຜະລິດລົດຍົນ.
