ຂົວແມ່ນ້ຳຢາງຊີກຽງອູຮັ້ນຖືກເອີ້ນວ່າ "ຂົວແຫ່ງທຳອິດຂອງແມ່ນ້ຳຢາງຊີກຽງ", ຂົວແຫ່ງນີ້ຂ້າມລະຫວ່າງພູເຊີຊ່ານອູຊ່າງກັບພູກຸ່ຍຊ່ານຮັ້ນຢາງຂອງແຂວງຫູເປີຍ, ເປັນຂົວທາງລົດໄຟ-ທາງຫຼວງ ແຫ່ງທຳອິດທີ່ຈີນສ້າງຂຶ້ນຢູ່ເທິງແມ່ນ້ຳຢາງຊີກຽງ.
ເດືອນເມສາປີ 1953, ກະຊວງທາງລົດໄຟຈີນໄດ້ສ້າງຕັ້ງກົມໂຄງການຂົວອູຮັ້ນສະເພາະຮັບຜິດຊອບການອອກແບບແລະກໍ່ສ້າງຂົວ, ແລະຍັງໄດ້ຈ້າງໜ່ວຍຊ່ຽວຊານໂຊວຽດເດີນທາງມາຈີນເພື່ອໃຫ້ການຊ່ວຍເຫຼືອ. ເດືອນມັງກອນປີ 1954, ທ່ານໂຈ່ວເອິນໄຫຼ ນາຍົກລັດຖະມົນຕີຈີນໄດ້ເປັນປະທານໄຂກອງປະຊຸມຄະນະລັດຖະບານໂດຍໄດ້ປຶກສາຫາລືແລະຮັບຮອງເອົາມະຕິວ່າດ້ວຍການກໍ່ສ້າງຂົວອູຮັ້ນ. ເດືອນກໍລະກົດ, ຄະນະລັດຖະບານຈີນໄດ້ອະນຸມັດແຜນອອກແບບດ້ານເຕັກນິກ, ແຜນປະຕິບັດການກໍ່ສ້າງແລະງົບປະມານລວມຂອງການກໍ່ສ້າງຂົວແມ່ນ້ຳຢາງຊີກຽງອູຮັ້ນ ແລະເລີ່ມລົງມືກໍ່ສ້າງຂົວດັ່ງກ່າວຢ່າງເປັນທາງການໃນວັນທີ 1 ກັນຍາ.
ພາຍໃຕ້ການສະໜັບສະໜູນຢ່າງແຂງແຮງຈາກປະຊາຊົນທົ່ວປະເທດ, ເມື່ອໄດ້ຜ່ານການສູ້ຊົນພະຍາຍາມບຸກທະລຸດ້ານວິທະຍາສາດເຕັກໂນໂລຊີ ດ້ວຍຄວາມລຳບາກເປັນໄລຍະເວລາ 2 ເດືອນ, ຂົວແມ່ນ້ຳຢາງຊີກຽງອູຮັ້ນຈິ່ງສ້າງສຳເລັດໃນວັນທີ 25 ກັນຍາ 1957, ວັນທີ 15 ຕຸລາໄດ້ຈັດພິທີເປີດການນຳໃຊ້ຂົວຢ່າງສະຫງ່າງາມ. ການສ້າງຂົວແມ່ນ້ຳຢາງຊີກຽງອູຮັ້ນສຳເລັດໄດ້ເປັນຂົວເຊື່ອມຕໍ່ພາກເໜືອແລະພາກໃຕ້ຂອງຈີນ,ເປັນການເປີດໜ້າໃໝ່ຂອງປະຫວັດການກໍ່ສ້າງຂົວຂອງຈີນ, ເຊິ່ງມີຄວາມໝາຍສຳຄັນຍິ່ງຕໍ່ການສ້າງສາເສດຖະກິດຂອງຈີນ.