ກະຊວງການເງິນຈີນໄດ້ປະກາດຕໍ່ພາຍນອກໃນວັນທີ 20 ຕຸລານີ້ວ່າ, ກອງປະຊຸມລັດຖະມົນຕີການເງິນຂອງອົງການຮ່ວມມືດ້ານເສດຖະກິດອາຊີປາຊີຟິກຫຼື APEC ຄັ້ງທີ 21 ຈະຈັດຂຶ້ນຢູ່ໃນຫໍຮັບແຂກເມືອງຕ້ຽວຢີໄຖທີ່ນະຄອນຫຼວງປັກກິ່ງໃນວັນທີ 22 ຕຸລານີ້, ກອງປະຊຸມຄັ້ງນີ້ຈະສຸມໃສ່ການຮ່ວມມືແລະການພັດທະນາດ້ານເສດຖະກິດຂອງພາກພື້ນອາຊີປາຊີຟິກໂດຍປິ່ນອ້ອມຫົວຂໍ້ໃຫຍ່ 4 ຂໍ້.
ຕາມຂ່າວແຈ້ງວ່າ, ລັດຖະມົນຕີການເງິນ, ຜູ້ຮັບຜິດຊອບຂອງອົງການສາກົນແລະຜູ້ຕາງໜ້າລະດັບສູງຂອງພາກສ່ວນເອກະຊົນທີ່ມາຈາກສະມາຊິກອົງກອນເສດຖະກິດ 21 ແຫ່ງຈະເຂົ້າຮ່ວມກອງປະຊຸມໃນຄັ້ງນີ້. ຕາມຕາຕະລາງວາລະປະຊຸມ, ຈະມີການຈັດພິທີໄຂໃນຕອນເຊົ້າວັນທີ 22 ຕຸລານີ້, ຫຼັງຈາກນັ້ນ, ຜູ້ຕາງໜ້າທີ່ເຂົ້າຮ່ວມກອງປະຊຸມຈະດຳເນີນການປຶກສາຫາລືຢ່າງເປັນທາງການກ່ຽວກັບຫົວຂໍ້ 4 ຂໍ້ຄື: "ສະຖານະການແລະການເບິ່ງເສດຖະກິດມະຫາພາກຂອງພາກພື້ນ", "ການຮ່ວມມືດ້ານການລົງທຶນແລະການລະດົມທຶນໃນການກໍ່ສ້າງພື້ນຖານໂຄງລ່າງ", "ນະໂຍບາຍດ້ານການເງິນແລະພາສີອາກອນແລະການປະຕິຮູບໃນການຊຸກຍູ້ການສັບຊ້ອນອົງປະກອບເສດຖະກິດ" ແລະ "ການສະໜັບສະໜູນການພັດທະນາເສດຖະກິດຕົວຈິງຂອງພາກພື້ນໂດຍຜ່ານການເງິນ",ແລະຈະຜ່ານຖະແຫຼງການຮ່ວມຂອງລັດຖະມົນຕີການເງິນກໍ່ຄືໝາກຜົນທີ່ກ່ຽວຂ້ອງ. ພາຍຫຼັງກອງປະຊຸມສິ້ນສຸດລົງແລ້ວຍັງຈະຈັດງານຖະແຫຼງຂ່າວຮ່ວມກັນນຳອີກ.
ອົງການຮ່ວມມືດ້ານເສດຖະກິດອາຊີປາຊີຟິກຫຼື APEC ສ້າງຕັ້ງຂຶ້ນເມື່ອປີ 1989, ຈີນໃນຖານະເປັນປະເທດເຈົ້າພາບໃນການຈັດກອງປະຊຸມຂອງອົງການ APEC ປີ 2014, ຈະຈັດເປັນກອງປະຊຸມສຸດຍອດຂອງ APEC ທີ່ມີຫົວຂໍ້ຕົ້ນຕໍຄື "ຮ່ວມກັນສ້າງການພົວພັນຄູ່ຮ່ວມອາຊີປາຊີຟິກທີ່ອວ່າຍໜ້າໄປສູ່ອະນາຄົດ".
 |
