ທ່ານຫຼີເຄີ້ສຽງພົບປະກັບຫົວໜ້າຄະນະຜູ້ແທນອົງກອນເສດຖະກິດຕ່າງໆທີ່ເຂົ້າຮ່ວມກອງປະຊຸມລັດຖະມົນຕີການເງິນຂອງອົງການ APEC
ຕອນບ່າຍວັນທີ 21 ຕຸລານີ້, ຢູ່ຫໍສະພາປະຊາຊົນທີ່ນະຄອນຫຼວງປັກກິ່ງ, ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ພົບປະກັບບັນດາຫົວໜ້າຄະນະຜູ້ແທນອົງກອນເສດຖະກິດຈາກປະເທດຕ່າງໆທີ່ໄປເຂົ້າຮ່ວມກອງປະຊຸມລັດຖະມົນຕີການເງິນຂອງອົງການຮ່ວມມືດ້ານເສດຖະກິດອາຊີປາຊີຟິກຫຼື APEC ຄັ້ງທີ 21 ຢູ່ນະຄອນຫຼວງປັກກິ່ງຂອງຈີນ.
ທ່ານຫຼີເຄີ້ສຽງຊີ້ອອກວ່າ, ຈີນໄດ້ສຸມໃສ່ຊຸກຍູ້ການພັດທະນາແລະການຮ່ວມມືດ້ານເສດຖະກິດຂອງພາກພື້ນອາຊີປາຊີຟິກຢ່າງຕັ້ງໜ້າ, ຍິນດີຮ່ວມກັບສະມາຊິກອົງການ APEC, ຊຸກຍູ້ເສດຖະກິດຂອງພາກພື້ນແຫ່ງນີ້ແລະຂອງໂລກໃຫ້ເຕີບໂຕຢ່າງເຂັ້ມແຂງ, ແບບຍືນຍົງແລະມີຄວາມດຸ່ນດ່ຽງ. ຫວັງຢາກໃຫ້ກອງປະຊຸມລັດຖະມົນຕີການເງິນຂອງອົງການ APEC ຄົ້ນຄວ້າແລະສະແຫວງຫາເສັ້ນທາງແຫ່ງການພັດທະນາທີ່ມີການປັບປ່ຽນຮູບແບບໃນອະນາຄົດຂອງເສດຖະກິດອາຊີປາຊີຟິກຢ່າງຕັ້ງໜ້າ, ຊຸກຍູ້ການຮ່ວມມືທີ່ແທ້ຈິງໃນດ້ານເສດຖະກິດຂອງພາກພື້ນ, ເພີ່ມເນື້ອໃນແລະຄວາມມີຊີວິດຊີວາໃໝ່ເຂົ້າໃນການຮ່ວມມືຂອງອົງການ APEC.
ທ່ານໂຈ ຮອກກີ, ລັດຖະມົນຕີວ່າການກະຊວງການເງິນຂອງອົສຕຣາລີໄດ້ຕາງໜ້າອົງກອນເສດຖະກິດ 25 ແຫ່ງແລະອົງການຈັດຕັ້ງສາກົນທີ່ເຂົ້າຮ່ວມກອງປະຊຸມກ່າວວ່າ, ການພັດທະນາເສດຖະກິດ-ສັງຄົມຂອງຈີນໄດ້ຮັບຜົນສຳເລັດທີ່ໜ້າອັດສະຈັນ. ຜົນສຳເລັດທີ່ຈີນໄດ້ຮັບໃນການພັດທະນາເສດຖະກິດບໍ່ພຽງແຕ່ແມ່ນຂ່າວດີຂອງອາຊີປາຊີຟິກເທົ່ານັ້ນ, ແຕ່ຍັງມີຄວາມໝາຍທີ່ສຳຄັນຕໍ່ໂລກ. ອົງກອນເສດຖະກິດແຫ່ງຕ່າງໆຍິນດີຮ່ວມກັບຝ່າຍຈີນທຳຄວາມພະຍາຍາມຮ່ວມກັນເພື່ອເຮັດໃຫ້ກອງປະຊຸມ APEC ດຳເນີນໄປດ້ວຍຜົນສຳເລັດ.