ວັນທີ 23 ຕຸລານີ້, ກິດຈະກໍາປີແຫ່ງການແລກປ່ຽນໄມຕີຈິດມິດຕະພາບແລະວັດທະນະທໍາຈີນ-ອາຊຽນ ແລະພິທີມອບລາງວັນຂອງການແຂ່ງຂັນການຂຽນບົດຂັນສູນຈີນ-ອາຊຽນທີ່ມີຫົວຂໍ້ວ່າ"ການພົວພັນຈີນ-ອາຊຽນໃນສາຍຕາຂອງຂ້ອຍ" ໄດ້ຈັດຂຶ້ນຢູ່ສູນຈີນ-ອາຊຽນທີ່ນະຄອນຫຼວງປັກກິ່ງຂອງຈີນ.
ໃນເວລາກ່າວຄໍາປາໄສໃນພິທີຄັ້ງນີ້, ທ່ານມາໝິງສຽງ, ເລຂາທິການໃຫຍ່ສູນຈີນ-ອາຊຽນກ່າວວ່າ: "ກິດຈະກໍາຄັ້ງນີ້ມີຄວາມໝາຍທີ່ສຸດ ເຊິ່ງມີຜົນດີຕໍ່ການຍົກລະດັບຄວາມເຂົ້າໃຈຂອງລຸ້ນໜຸ່ມຕໍ່ການພົວພັນຈີນ-ອາຊຽນ, ລຸ້ນໜຸ່ມບໍ່ພຽງແຕ່ເປັນອະນາຄົດຂອງຈີນເທົ່ານັ້ນ, ຍັງເປັນອະນາຄົດຂອງການພົວພັນຈີນ-ອາຊຽນອີກດ້ວຍ, ສະນັ້ນ, ມີແຕ່ໄດ້ຮັບຄວາມເຂົ້າໃຈແລະການສະໜັບສະໜູນຈາກລຸ້ນໜຸ່ມເທົ່ານັ້ນ, ການພົວພັນຈີນ-ອາຊຽນຈຶ່ງຈະສາມາດພັດທະນາແບບຍືນຍົງ. ຜ່ານການແຂ່ງຂັນຂຽນບົດຄັ້ງນີ້ ພວກເຮົາໄດ້ຮັບຜົນປະໂຫຍດຢ່າງຫຼວງຫຼາຍ ແລະໄດ້ເຫັນພື້ນຖານດ້ານສັງຄົມທີ່ແໜ້ນແຟ້ນຂອງການພົວພັນຈີນ-ອາຊຽນ ເຊິ່ງໄດ້ເຮັດໃຫ້ພວກເຮົາເພີ່ມທະວີຄວາມເຊື່ອໝັ້ນຕໍ່ອະນາຄົດຂອງການພົວພັນຈີນ-ອາຊຽນ ແລະຄວາມຕັດສິນໃຈໃນການເພີ່ມທະວີ, ສະໜັບສະໜູນແລະໃຫ້ການບໍລິການແກ່ການພົວພັນຈີນ-ອາຊຽນໃນບາດກ້າວຕໍ່ໜ້າ. ຫວັງວ່າຈະມີຄົນສະໜັບສະໜູນແລະເຂົ້າຮ່ວມກິດຈະກໍາຈີນ-ອາຊຽນໃຫ້ຫຼາຍກວ່າເກົ່າ, ຮ່ວມກັນຊຸກຍູ້ການພົວພັນຈີນ-ອາຊຽນພັດທະນາໃຫ້ກ້າວໄປຂ້າງໜ້າ ເພື່ອສັນຕິພາບ, ສະເຖຍລະພາບແລະຄວາມຈະເລີນຂອງພາກພື້ນນີ້."
ນັກສຶກສາ 21 ຄົນທີ່ມາຈາກມະຫາວິທະຍາໄລໃນທົ່ວປະເທດໄດ້ຮັບລາງວັນໃນກິດຈະກຳຄັ້ງນີ້. ບົດຄວາມທີ່ພາດຫົວເລື່ອງວ່າ "ການພັດທະນາແລະຄວາມຈະເລີນຮຸ່ງເຮືອງຮ່ວມກັນດ້ານການທ່ອງທ່ຽວຈີນ-ອາຊຽນ" ທີ່ຂຽນໂດຍນາງເຮີຢູເຈ່ຍ ຈາກມະຫາວິທະຍາໄລຊີ່ນານໄດ້ຮັບລາງວັນທີໜຶ່ງ, ນາງຈ່າງຢູຫານ ທີ່ມາຈາກມະຫາວິທະຍາໄລສ້າງຄູນານກິ່ງແລະນາງລູຊົງຈີ່ ທີ່ມາຈາກມະຫາວິທະຍາໄລຈ່ຽວທົ່ງຕ້າລຽນໄດ້ຮັບລາງວັນທີສອງ, ເຟີງກ່າວລິນ ທີ່ມາຈາກວິທະຍາໄລວິສະວະກຳນິງໂປໄດ້ຮັບລາງວັນທີສາມ, ນາງເສິນເຟີຍເຟີຍ ທີ່ມາຈາກມະຫາວິທະຍາໄລສື່ສານຈີນແລະນັກສຶກສາອີກ 14 ຄົນທີ່ມາຈາກມະຫາວິທະຍາໄລແຫ່ງອື່ນໆໄດ້ຮັບລາງວັນດີເດັ່ນ.
ກິດຈະກຳໃນຄັ້ງນີ້ຍັງໄດ້ຈັດໃຫ້ນັກສຶກສາທີ່ເຂົ້າຮ່ວມງານຕັ້ງຄຳຖາມຕໍ່ຜູ້ຕາງໜ້າເຈົ້າໜ້າທີ່ອາຊຽນໂດຍສະເພາະເພື່ອເປັນໂອກາດໃຫ້ນັກສຶກສາທັງຫຼາຍມີຄວາມຮັບຮູ້ຕໍ່ວັດທະນະທຳຈີນ-ອາຊຽນໃຫ້ຫຼາຍຂຶ້ນກວ່າເກົ່າ.