ຕາມຂ່າວCRI: ວັນທີ24ຕຸລານີ້, ງານມະໂຫລານກາເຟລາວຄັ້ງທີ1ໄດ້ຈັດຂຶ້ນຢູ່ນະຄອນປາກເຊ, ເທສະບານແຂວງຈຳປາສັກຢ່າງຄຶກຄື້ນ. 69ບໍລິສັດທັງພາຍໃນແລະຕ່າງປະເທດໄດ້ເຂົ້າຮ່ວມງານກາເຟຄັ້ງນີ້, ເຊິ່ງໄດ້ຕັ້ງຫ້ອງວາງສະແດງ178ຫ້ອງ, ເພື່ອວາງສະແດງຜະລິດຕະພັນກາເຟຊະນິດຕ່າງໆກໍ່ຄືຜະລິດຕະພັນອ້ອມຂ້າງ.
ໃນພິທີໄຂງານ, ທ່ານດຣ.ບຸນຖອງ ດີວິໄຊ, ເຈົ້າແຂວງແຂວງຈຳປາສັກທີ່ເປັນເຈົ້າພາບຈັດງານກາເຟຄັ້ງທີ1ໜຶ່ງກ່າວວ່າ, ຈຸດປະສົງແລະເປົ້າໝາຍຂອງການຈັດງານບຸນຄັ້ງນີ້ແມ່ນເພື່ອໂຄສະນາແລະເຜີຍແຜ່ແຜນຍຸດທະສາດການສົ່ງເສີມກາເຟລາວຮອດປີ2025, ເປັນການໂຄສະນາເຜີຍແຜ່ຊື່ສຽງຂອງກາເຟລາວ, ເພື່ອເປັນການເປີດກວ້າງການຕະຫຼາດອອກສູ່ເວທີສາກົນ.
ແຫຼ່ງກຳເນີດຕົ້ນຕໍຂອງກາເຟກາງຂອງລາວຢູ່ເຂດພູພຽງບໍລະເວນ, ເນື້ອທີ່ປູກກາເຟປະມານ77,220ເຮັກຕາ. ປິ2013, ປະເທດລາວໄດ້ສົ່ງອອກກາເຟໄປຈຳໜ່າຍຢູ່ຕ່າງປະເທດທັງໝົດ30,180ໂຕນ, ຕົກເປັນມູນຄ່າປະມານ70ລ້ານໂດລາ, ເຊິ່ງເປັນສິນຄ້າສົ່ງອອກອັນສຳຄັນຂອງປະເທດລາວ.