ກອງປະຊຸມຄົບຄະນະຄັ້ງທີ 4 ສະໄໝທີ 18 ຂອງພັກກອມມູນິດຈີນທີ່ອັດລົງໃນວັນທີ 23 ຕຸລານີ້ ໄດ້ພິຈາລະນາ ແລະຜ່ານຂໍ້ຕົກລົງຂອງສູນກາງພັກກອມມູນິດຈີນກ່ຽວກັບບັນຫາຈໍານວນໜຶ່ງທີ່ສໍາຄັນໃນການຊຸກຍູ້ການບໍລິຫານປະເທດຕາມກົດໝາຍຢ່າງຮອບດ້ານ. ຫາງສຽງສາກົນເຫັນວ່າ, ຂໍ້ຕົກລົງສະບັບນີ້ໄດ້ຊີ້ແຈງເປົ້າໝາຍລວມຂອງຈີນໃນການຊຸກຍູ້ການບໍລິຫານປະເທດຕາມກົດໝາຍຢ່າງຮອບດ້ານ ແລະໄດ້ສະແດງໃຫ້ເຫັນເຖິງຄວາມຕັດສິນໃຈຂອງພັກກອມມູນິດຈີນໃນການຊຸກຍູ້ການບໍລິຫານປະເທດຕາມກົດໝາຍຢ່າງຮອບດ້ານ.
ໜັງສືພິມ The New York Times ຂອງອາເມລິກາໄດ້ລົງພິມບົດຄວາມຢູ່ເວັບໄຊຂອງຕົນ ໂດຍຂຽນວ່າ, ກອງປະຊຸມຄົບຄະນະຄັ້ງທີ 4 ສະໄໝທີ 18 ຂອງພັກກອມມູນິດຈີນໄດ້ຖື"ການບໍລິຫານປະເທດຕາມກົດໝາຍ"ເປັນຫົວຂໍ້ຫຼັກ ເຊິ່ງນີ້ເປັນຄັ້ງທໍາອິດໃນປະຫວັດສາດຂອງກອງປະຊຸມຄົບຄະນະຂອງພັກກອມມູນິດຈີນ. ການປະຕິຮູບດ້ານກົດໝາຍຕ່າງໆທີ່ໄດ້ຜ່ານໃນກອງປະຊຸມຄົບຄະນະຄັ້ງນີ້ຈະມີຜົນສະທ້ອນອັນເລິກເຊິ່ງຍາວໄກ ເຊິ່ງຈະເຮັດໃຫ້ລະບົບກົດໝາຍຂອງຈີນມີລະບຽບ ແລະທ່ຽງທໍາກວ່າເກົ່າ.
ໜັງສືພິມ The Wall Street Journal ຂອງອາເມລິກາໄດ້ລົງພິມບົດຄວາມຢູ່ເວັບໄຊຂອງຕົນ ໂດຍຂຽນວ່າ, ແຜນການທີ່ວາງອອກໃນກອງປະຊຸມຄົບຄະນະຄັ້ງທີ 4 ສະໄໝທີ 18 ຂອງພັກກອມມູນິດຈີນ ຈະເຮັດໃຫ້ລະບົບກົດໝາຍຂອງຈີນມີຄວາມເປັນເອກະລາດ ແລະຄວາມເປັນວິຊາການຫຼາຍກວ່າເກົ່າ. ລະບົບກົດໝາຍຈະມີການສະທ້ອນຄືນທີ່ໄວກວ່າເກົ່າ.
ສໍານັກຂ່າວສານ ITAR-TASS ຂອງຣັດເຊຍລາຍງານວ່າ, ເພື່ອສືບຕໍ່ລົງເລິກການປະຕິຮູບ, ຊຸກຍູ້ບາດກ້າວຂອງການກໍ່ສ້າງສັງຄົມອີ່ມໜໍາສໍາລານຢ່າງຮອບດ້ານ ແລະປະຕິບັດໜ້າທີ່ຟື້ນຟູຄວາມຈະເລີນຂອງຊາດ, ຕ້ອງສ້າງລະບົບກົດໝາຍສັງຄົມນິຍົມທີ່ສົມບູນຢູ່ຈີນ.
ໜັງສືພິມ Les Échos ຂອງຝຣັ່ງລາຍງານວ່າ, ກອງປະຊຸມຄົບຄະນະຄັ້ງທີ 4 ສະໄໝທີ 18 ຂອງພັກກອມມູນິດຈີນໄດ້ດໍາເນີນການປຶກສາຫາລືໂດຍປິ່ນອ້ອມຫົວຂໍ້ທີ່ວ່າ"ການບໍລິຫານປະເທດຕາມກົດໝາຍ"ເຊິ່ງລວມທັງຈະຫຼຸດຜ່ອນຄວາມບໍ່ເປັນລະບຽບໃນການຊໍາລະຄະດີ ໂດຍສະເພາະແມ່ນການຫຼຸດຜ່ອນການແຊກແຊງຄະດີຂອງເຈົ້າໜ້າທີ່ອົງການປົກຄອງທ້ອງຖິ່ນ ເຊິ່ງມາດຕະການເຫຼົ່ານີ້ໄດ້ສະແດງໃຫ້ເຫັນເຖິງຄວາມຕັດສິນໃຈຂອງພັກກອມມູນິດຈີນໃນດ້ານການປະຕິຮູບ.
ສໍານັກຂ່າວສານ Prensa Latina ຂອງກູບາລາຍງານໂດຍອີງໃສ່ຄໍາເວົ້າຂອງຊ່ຽວຊານວ່າ, ການສ້າງປະເທດທີ່ບໍລິຫານຕາມກົດໝາຍນັ້ນ ມີຄວາມສໍາຄັນທີ່ສຸດໃນການເສີມຂະຫຍາຍຄວາມບົ່ມຊ້ອນດ້ານເສດຖະກິດຂອງຈີນ ແລະການຊຸກຍູ້ການເຕີບໂຕຂອງເສດຖະກິດຈີນ.