ສຸມ​ໃສ່​ການ​ "ນັດ" ລະຫວ່າງ APEC ກັບຈີນ
2014-11-06 17:03:28  cri 

ຫວ່າງບໍ່​ດົນມາ​ນີ້, ທ່ານ​ຫວາງ​ຢີ້ ລັດຖະມົນຕີ​ວ່າການ​ກະຊວງ​ການ​ຕ່າງປະ​ເທດ​ຈີນ​ໄດ້​ກ່າວ​ປາຖະກະຖາ​ພາຍ​ໃຕ້​ຫົວ​ຂໍ້ "ຈີນ​ພ້ອມ​ແລ້ວ​ທີ່​ຈະ​ເປັນ​ເຈົ້າພາບ​ຈັດ​ກອງ​ປະຊຸມ APEC ປັກ​ກິ່ງ" ​ເຊິ່ງຢືນຢັນ​ວ່າ ຈີນ​ຄອງ​ຄອຍ​ວ່າ​ເສດຖະກິດ​ອາຊີ​ປາຊີ​ຟິກຈະ​ມີ​ການ​ເຕີບ​ໂຕ​ໄປ​ໃນ​ທາງ​ທີ່​ດີກ​ວ່າ​ເກົ່າ, ຄອງ​ຄອຍ APEC ຈະ​ມີ​ບົດບາດ​ຫຼາຍ​ກວ່າ​ເກົ່າ​​ໃນ​ດ້ານ​ນີ້.

ຈີນ​ກຽມພ້ອມ​ແລ້ວ, ​ ​ມັນ​ບໍ່​ແມ່ນ​ກຽມພ້ອມ​ສະ​ເພາະ​ແຕ່​ກອງ​ປະຊຸມ APEC ​​ໃນ​ຄັ້ງ​ນີ້​ເທົ່າ​ນັ້ນ, ​ແຕ່​​ເປັນ​ການ​ກະກຽມ​ມາ​ເປັນ​ເວລາ 25 ປີ​ແລ້ວ, ​ໃນ​ໄລຍະ 25 ປີຜ່ານມາ​ນີ້, ຈີນ​ໄດ້​ນັດ​ກັບ APEC ​ 5 ​ເທື່ອ, ​ເຊິ່ງ​ເປັນ​ສັກຂີ​ພິຍານ​ໃຫ້​ແກ່​ການ​ພົວພັນ​ລະຫວ່າງ​ຈີນ​ກັບ APEC ທີ່​ມີ​ການ​ພັດທະນາ​ເປັນ​ຢ່າງ​ດີ​ຍ້ອນ​ມີ​ການ​ກະກຽມ​ຢ່າງ​ເຕັມທີ່.

ຄັ້ງທຳອິດ: ການ​ນັດ​ພົບກັນໃນ​ຮອບ 25 ປີ--- ສະພາບ​ໃໝ່​ຂອງ​ອາຊີ​ປາຊີ​ຟິກ

ກ່ອນ​ສົງຄາມ​ເຢັນ​​ໄດ້ສິ້ນ​ສຸດ​ລົງ, ອົງການ APEC ກໍ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ໃນ​ປີ 1989, ມາ​ຮອດ​ປັດຈຸບັນ​ເປັນ​ໄລຍະ​ເວລາ 25 ປີ​ແລ້ວ. ປີ 1991, ສະຫະພາບ​ໂຊ​ວຽດ​ແຕກ​ສະຫຼາຍ, ສົງຄາມ​ເຢັນ​ສິ້ນ​ສຸດ​ລົງ. ກໍ​ແມ່ນ​ໃນ​ປີ​ນັ້ນ, ຈີນ​ໄດ້​ເຂົ້າ​ເປັນ​ສະມາຊິກ​ຂອງ APEC. APEC ​ເປັນ​ອົງການ​ຮ່ວມ​ມື​ເສດຖະກິດ​ລະດັບ​ພາກ​ພື້ນ​ອົງການ​ທຳ​ອິດ​ທີ່​ຈີນ​ໄດ້​ເຂົ້າ​ຮ່ວມ​ຫຼັງ​ສົງຄາມ​ເຢັນ​ສິ້ນ​ສຸດ​ລົງ.

ສະຫະພາບ​ໂຊ​ວຽດ​ແລະເອີຣົບຕາ​ເວັນ​ອອກ​ແຕກ​ສະຫຼາຍ​ກັບ​ການ​ລວມຕົວ​ຂອງ​ອາຊີ​ປາຊີ​ຟິກ​ເປັນ​ສອງ​ເລື່ອງ​ທີ່​ເກີດ​ຂຶ້ນ​ເກືອບ​ພ້ອມ​ກັນ ​ເຊິ່ງສະ​ແດງ​ໃຫ້​ເຫັນ​ເຖິງ​ສອງ​ຮູບ​ແບບ​ແລະ​ຊະ​ຕາ​ກຳ​ສອງ​ຢ່າງ. ທຸກ​ມື້​ນີ້, ກຳລັງ​ທາງ​ລົບ​ທີ່​ເປັນ​ແຫຼ່ງກຳ​ເນີ​ດຂອງຄວາມ​ວຸ້ນວາຍ​ໄດ້​ສະ​ສົມ​ຫຼາຍຂຶ້ນຢ່າງ​ບໍ່​ຢຸດ​ຢັ້ງ​ຢູ່​ພາກ​ພື້ນອະດີດ​ສະຫະພາບ​ໂຊ​ວຽດ-​ເອີຣົບຕາ​ເວັນ​ອອກ, ​ໃນ​ທີ່​ສຸດ​ໄດ້​​ເຮັດ​ໃຫ້​ວິ​ກິດ​ການ​ອູ​ແຣນ​ລະ​ເບີດ​ຂຶ້ນ​ຄັ້ງ​ໃຫຍ່​ທີ່​ມີ​ລັກສະນະ​​ເປັນ​ໄລຍະ​. ສ່ວນ APEC ​ໄດ້​ເປັນ​ສັກຂີ​ພິຍານ​ໃຫ້ເຫັນ​ເຂດ​ອາຊີ​ປາຊີ​ຟິກກ້າວ​ໄປ​ສູ່​ສັນຕິພາບ​ແລະ​ຄວາມ​ຈະ​ເລີ​ນຮຸ່ງ​ເຮືອງ, ກາຍ​ເປັນ​ທິດ​ທາງ​ທີ່​ຈຸດ​ສຸມ​ຂອງ​ໂລກຈະ​ຍົກຍ້າຍ​ໄປ​, APEC ​ໄດ້​ຊຸກຍູ້​ເສດຖະກິດ​ພາກ​ພື້ນ​ອາຊີ​ປາຊີ​ຟິກ​ໃຫ້ລວມ​ເຂົ້າກັນ, ​ເປີດ​ໂອກາດ​ໃຫ້​ແກ່​ຈີນ​ມີ​ສ່ວນ​ຮ່ວມ​ປະກອບ​ເຂົ້າ​ໃນ​ການ​ພັດທະນາ​ເສດຖະກິດ​ອາຊີ​ປາຊີ​ຟິກ. ດ້ວຍ​ເຫດ​ນີ້, ກອງ​ປະຊຸມ APEC ປັກ​ກິ່ງ ມີຄວາມ​ໝາຍ​ດ້ານ​ການ​ຕອບ​ແທນ​ບຸນຄຸນ.

ຄັ້ງທີ 2: ການ​ນັດພົບກັນໃນຮອບ 20 ປີ--- ຍິ່ງ​ຫຼາຍ​ຍິ່ງ​ດີ

ກອງ​ປະຊຸມ​ບໍ່​ເປັນ​ທາງ​ການ​ຂອງຜູ້ນຳອົງການ APEC ທີ່​ຈັດ​ຂຶ້ນ​ຢູ່​ອິນ​ໂດ​ເນ​ເຊຍ​ເມື່ອ​ປີ 1994 ​ໄດ້​ວາງ​ເປົ້າ​ໝາຍ​ໂປ​ໂກ (Bogor Goals),​ເຊິ່ງມີ​ຈຸດປະສົງ​ເພື່ອ​ພະຍາຍາມ​ສູ້​ຊົນ​ຮອດ​ປີ 2020 ເຮັດ​ໃຫ້ການ​ຄ້າ​ແລະ​ການ​ລົງທຶນ​ໃນ​ພາກ​ພື້ນ​ແຫ່ງ​ນີ້​ຫັນ​ເປັນ​ແບບ​ເສລີ. ​ແຕ່​ໃນ​ໄລຍະ 20 ປີຜ່ານມາ, ຂະ​ບວນການ​ດັ່ງກ່າວ​ນີ້​ໄດ້​ພົບຄວາມ​ຫຍຸ້ງຍາກ​ລຳບາກ​ຫຼາຍທີ່​ສຸດ, ບໍ່​ວ່າ​ປະ​ເທດ​ທີ່ກຳລັງ​ພັດທະນາ​ຫຼື​ປະ​ເທດ​ທີ່​ພັດທະນາ​ແລ້ວ ກໍ​ຍາກ​ທີ່​ຈະ​ສາມາດ​ບັນລຸ​ເປົ້າໝາຍ​ດັ່ງກ່າວ​ນີ້​ໄດ້. ພ້ອມ​ດຽວ​ກັນ​ນັ້ນ, ຢູ່​ໃນ​ພາກ​ພື້ນ​ອາຊີ​ປາຊີ​ຟິກ, ສັນຍາ​ການ​ຄ້າປະ​ເພດ​ຕ່າງໆ​ເຊັ່ນ​ສັນຍາ​ການ​ຄ້າ​ສອງ​ຝ່າຍ, ສັນຍາ​ການ​ຄ້າ​ອະນຸ​ພາກ​ພື້ນ ​ແລະ​ສັນຍາ​ການ​ຄ້າ​ພາກ​ພື້ນ​ໄດ້​ພັດທະນາ​ຢ່າງ​ວ່ອງ​ໄວ​ ມີ​ທັງ​ໝົດ 56 ສະບັບ.

​ໃນ​ໄລ​ຍະດັ່ງ​ກ່າວ, ​ໃນ​ດ້ານ​ໜຶ່ງ, ຈີນ​ໄດ້ຕັ້ງໜ້າ​ເພື່ອ​ບັນລຸເປົ້າ​ໝາຍ  Bogor Goals, ພັດທະນາການ​ພົວພັນ​ດ້ານ​ເສດຖະກິດ​ການ​ຄ້າ​ສອງ​ຝ່າຍກັບ​ສະມາຊິກ APEC ຢ່າງ​ຕັ້ງໜ້າ ​ເຊິ່ງ​ໄດ້​ເຮັດ​ໃຫ້​ລະດັບ​ເພີ່​ງພາ​ອາ​ໄສກັນ​ກັບ​ອົງ���ກອນ​ເສດ​ຖະກິດ​ອາຊີ​ປາຊິ​ຟິກ​ເພີ່ມ​ຂຶ້ນ​ຢ່າງ​ວ່ອງ​ໄວ. ອີກ​ດ້ານ​ໜຶ່ງ, ຈີນ​ໄດ້​ປັບ​ຕົວ​ເຂົ້າ ​ແລະ​ຊຸກຍູ້ທ່ວງທ່າ​ຂະຫຍາຍຕົວ​ແຫ່ງການ​ພັດທະນາ​ໃຫຍ່ຂອງ​ສັນຍາ​ວ່າ​ດ້ວຍ​​ການ​ຄ້າ​ເສລີ​ພາກ​ພື້ນ​ອາຊີ​ຕາ​ເວັນ​ອອກ, ຮ່ວມ​ກັບປະ​ເທດ​ອາຊີ​ຕາ​ເວັນ​ອອກ​ເພື່ອສະກັດ​ກັ້ນວິ​ກິດ​ການ​ດ້ານ​ການ​ເງິນຂອງ​ອາຊີ​ໃນ​ປີ 1997, ສ້າງ​ເວທີ​ໃໝ່​ແຫ່ງ​ການ​ຮ່ວມ​ມືທາ​ງ​ເສ​ດຖະກິດ​ຂອງ​ພາກພື້ນ​ອາຊີ​ຕາ​ເວັນ​ອອກ ​ແລ​ະ​ເຊັນ​ສັນຍາ​ວ່າ​ດ້ວຍ​ການ​ຄ້າ​ເສລີ​ກັບ​​ອາ​ຊຽນ ​ແລະ​ປະ​ເທດ​ອື່ນໆ. ພາຍຫຼັງວິ​ກິດການ​ດ້ານ​ການ​ເງິນ​ໃນ​ປີ 2008, ຈີນ​​ໄດ້​ນໍາ​ໃຊ້APEC ​​ແລະເວທີ​ແຫ່ງ​ການ​ຮ່ວມ​ມືອາຊີ​ຕາ​ເວັນ​ອອກ​ໃຫ້​ເຕັມ​ທີ່​ຫຼາຍ​ກວ່າ​ເກົ່າ ​ເພື່ອ​ຮ່ວມ​ກັນສະກັດ​ກັ້ນວິ​ກິດ​ການ​ດ້ານ​ການ​ເງິນສາກົນ.

ຄັ້ງ​ທີ 3: ການ​ນັດກັນ​ໃນ​ຮອບ 13 ປີ--ຮ່ວມ​ມື​ກັບ​ອາຊີ​ປາຊິ​ຟິກ
​ໃນ​ປີ 2001, ຢູ່​ນະຄອນ​ຊຽງ​ໄຮ​ຂອງ​ຈີນ​ໄດ້້​ຈັດ​ກອງ​ປະ​ຊຸມສຸດ​ຍອດບໍ່​ເປັນ​ທາງ​ການ​ຂອງ APEC ​ເຊິ່ງ​ເປັນ​ຄັ້ງ​ທໍາ​ອິດ​ທີ່​ຈີນ​​ເປັນ​ເຈົ້າພາບ​ຈັດ​ກອງ​ປະ​ຊຸມດັ່ງກ່າວ ​ໂດຍ​ໄດ້​ເຊື້ອ​ເຊີນ​ປະ​ເທດ​ຕ່າງ​ໆ​ມາ​ປຶກສາ​ຫາລື​ຈະ​ນໍາພາ​ອາຊີ​ປາຊິ​​ຟິກ​ເຂົ້າ​ສູ່​ສະຕະວັດ​ທີ 21 ​ແນວ​ໃດ. ​ແຕ່​ຍ້ອນ​ໄດ້​ເກີດ​ເຫດການ​ 11 ກັນຍາ, ຈີນ​ຈຶ່ງ​ໄດ້​ມີ​ຄວາມ​ເປັນຫ່ວງວ່າທ່ານ George W. Bush, ​ອະດີດ​ປະທາ​ນາ​ທິບໍດີ​ອາ​ເມ​ລິ​ກາ​ຈະ​ບໍ່ສາມາດ​ຮ່ວມ​ປະຊຸມ​ຕາມ​ການນັດ​ໄວ້. ​ໃນ​ທີ່​ສຸດ, ທ່ານ Bush ​ໄດ້​ເດີນ​ທາງມາ​​ເຖິງ​ນະຄອນຊຽງ​ໄຮ​ໂດຍ​ຖື​​ເອົາ​ຫົວ​ຂໍ້​ປຶກສາ​ຫາ​ລື​ກ່ຽວ​ກັບ​ການ​ຕໍ່ຕ້ານ​ການ​ກໍ່​ການ​ຮ້າຍ ​ແລະ​ໄດ້​ຮ່ວມ​ກັບ​ຈີນ​ຊຸກຍູ້​ການ​ຮ່ວມ​ມື​ສາກົນ​ຕໍ່ຕ້ານ​ການ​ກໍ່​ການ​ຮ້າຍ. ​ໃນ​ໄລຍະກະກຽມ​ກອງ​ປະຊຸມ APEC ປີ​ນີ້, ຈີນ​ກໍ​ເຄີຍ​ມີ​ຄວາມ​​ເປັນ​ຫ່ວງ​ວ່າ​ທ່ານ​ບາຣັກ ​ໂອ​ບາ​ມາ, ປະ​ທາ​ນາ​ທິບໍດີ​ອາ​ເມ​ລິ​ກາ​ຈະ​ສາມາດ​ມາ​ຮ່ວມ​ປະຊຸມ​ຕາມ​ການ​ນັດ​ກັນ​ຫຼື​ບໍ່ ຍ້ອນຢູ່​​ໃນ​ອາ​ເມ​ລິ​ກາ​ກໍາລັງ​ຈັດການ​ເລືອກ​ຕັ້ງ​ໄລ​ຍະ​ກາງ​ທີ່​ເປັນ​ໄລຍະ​ທີ່​ສໍາຄັນ ​ແລະ​ຢູ່​ນອກ​ອາ​ເມລິ​ກາ, ກຸ່ມ IS ​ກໍາລັງກໍ່​ການ​ຮ້າ​ຍ. ​​ເມື່ອ​ເບິ່ງສະຖານະ​ການ​ໃນ​ປັດຈຸບັນ​ແລ້ວ​ເຫັນ​ວ່າ, ທ່ານ​​ໂອ​ບາ​ມາ​ບໍ່​ພຽງ​ແຕ່​ຈະ​ມາ​ຮ່ວມ​ປະຊຸມ​ເທົ່າ​ນັ້ນ, ຍັງ​ຈະ​ປຶກສາຫາລື​ກ່ຽວ​ກັບ​ການ​ຮ່ວມ​ມື​ສາກົນດ້ານ​ການ​ຕໍ່ຕ້ານ​ການ​ກໍ່​ການ​ຮ້າຍ​ຮອບ​ໃໝ່. ການ​ຮ່ວມ​ມື​ຈີນ-ອາ​ເມ​ລິ​ກາ​ຄວນເປັນ​ເນື້ອ​​ໃນ​ທີ່​ເໝາ​ສົມ​ຂອງ​ການ​ພົວພັນ​ແບບ​ໃໝ່​ລະຫວ່າງ​ປະ​ເທດ​ໃຫຍ່​ຈີນ-ອາ​ເມ​ລິ​ກາ.

ຄັ້ງ​ທີ 4: ການ​ນັດ​ກັນ​ໃນ​ຮອບ 10 ປີ--ຢຸດຕິ​ຂໍ້​ຂັດ​ແຍ້ງດ້ວຍ​ການ​ຮ່ວມ​ມື

​ໃນ​ປີ 2004, ກາ​ນາ​ດາ​ໄດ້​ລິ​ເລີ່​ມສ້າງ​ເຂ​ດການ​ຄ້າ​ເສລີ​ອາຊີ​ປາຊິ​ຟິກ. ​ແຕ່​ຫຼັງ​ຈາກ​ນັ້ນ​ຫຼາຍປີ, ການ​ຮ່ວມ​ມືອາຊີ​ຕາ​ເວັນ​ອອກ​ມີ​ທ່າ​ອ່ຽງພັດທະນາ​ດີກ​ວ່າ APEC. ​ໃນ​ຂອບ​ການ​ຮ່ວມ​ມື​ອາຊີ​ຕາ​ເວັນ​ອອກ, ຈີນ​ໄດ້ຕັ້ງໜ້າ​ຊຸກຍູ້ສັນຍາ​ວ່າ​ດ້ວຍ​ເຂດ​ການ​ຄ້າ​ເສລີ 10+3, ສ່ວນ​ຍີ່ປຸ່ນ​ໄດ້ສະ​ແດງ​ເຈດ​ຕະນາ​ເປັນ​ຜູ້​ນໍາພາ​ສັນຍາ​ວ່າ​ດ້ວຍ​ເຂດການ​ຄ້າ​ເສລີ 10+6. ​ແຕ່​ບໍ່ວ່າ​ແມ່ນ10+3 ຫຼື 10+6, ລ້ວນ​ແຕ່​ບໍ່​ໄດ້ລວມທັງອາ​ເມ​ລິ​ກາ. ອາ​ເມ​ລິ​ກາ​ມີ​ຄວາມ​ເປັນຫ່ວງ​ວ່າ ການ​ຮ່ວມ​ມື​ອາຊີຕາ​ເວັນ​ອອກ​ຈະ​ເຮັດ​ໃຫ້​ມະຫາ​ສະໝຸດ​ປາຊິ​ຟິກກາຍ​​ເປັນ​ຊ່ອງ​ຫວ່າງ​ລ���ຫວ່າງ​ອາ​ເມ​ລິກາ​ກັບ​ອາຊີ​ຕາ​ເວັນ​ອອກ, ສະ​ນັ້ນ​ຈຶ່ງ​ເປັນ​ຜູ້​ນໍາພາ​ໃນການ​ເຈລະຈາ​ກ່ຽວ​ກັບ​ການ​ຄ້າ​ເສລີ APEC ອີກ​ຄັ້ງ​ໃໝ່ ​ໂດຍ​ມີ​ເຈດ​ຕະນາ​ຢຸດຕິ​ຂໍ້​ຂັດ​ແຍ່ງ​ລະຫວ່າງ​ອາ​ຊີ​ຕາ​ເວັນ​ອອກ​ກັບ​ອາ​ຊີ​ປາຊິ​ຟິກດ້ວຍ​ເຂດ​ການ​ຄ້າ​ເສລີ​ອາຊີ​ປາຊິ​ຟິກທີ່​ມີ​ບໍລິ​ເວນ​ກວ້າງຂວາງ​ກວ່າ​ເກົ່າ, ​ແຕ່ບໍ່​ໄດ້​ປະສົບ​ຜົນ​ສໍາ​ເລັດ​ຍ້ອນ​ມີ​ຜູ້​ຕິດຕາມ​ໜ້ອຍ. ຫຼັງຈາກ​ນັ້ນ, ພາ​ກພື້ນ​ອາ​ຊີປາຊິ​ຟິກ​ໄດ້​ເຂົ້າ​ສູ່​ໄລຍະ​ທີ່​ສັນ​ຍາ​ຕ່າງໆວ່າ​ດ້ວຍ​ການ​ຄ້າ​ພາກ​ພື້ນ​ທີ່​ມີ​ການ​ແຂ່ງ​ຂັນ​ດຸ​ເດຶອ​ດທີ່​ສຸດ.

ໃຜ​ຈະ​ເປັນ​ຜູ້​ໄກ່​ເກ່ຍຂອງ​ເຂດ​ອາຊີ​ປາຊີ​ຟິກ?​ໃນ​ຂະນະ​ນີ້, ປະ​ເທດ​ຈີນ​ທີ່​ເຊື່ອ​ວ່າ "ມະຫາ​ສະໝຸດ​ປາຊີ​ຟິກ​ແມ່ນ​ກວ້າງຂວາງ​ຢ່າງ​ພຽງພໍ" ​ໄດ້​ສະ​ເໜີ​ອອກ​ຄຳ​ຂວັນ​ທີ່ວ່າ "ຄວາມ​ປອງ​ດອງ​ກັນ​ເປັນ​ສິ່ງ​ສຳຄັນ", ​ໄດ້​ຮັບ​ເອົາ​ອະດີດ​ສັນ​ຍາ​ຂອງ​ອາ​ເມ​ລິ​ກາ, ​ແລະ​ຊຸກ​ຍູ້​ເຂດ​ການ​ຄ້າ​ເສລີ​ອາຊີ​ປາຊີ​ຟິກທີ່​ກວ້າງຂວາງ, ​ເປີດ​ປະຕູ​ແລະ​ມີ​ລັກສະ​ນະ​ກວມ​ລວມ.

ຄັ້ງ​ທີ 5: ການ​ນັດ​ພົບ​ກັນ​ໃນ​ຮອບ 1 ປີ​----ຖື​ໜັກແລະ​ປະຕິບັດ​ຕາມຄຳ​ໝັ້ນ​ສັນຍາ

​ໃນທ້າ​ຍປີ 2013, ທ່ານ​ສີ​ຈິ້ນ​ຜີ​ງ, ປະ​ທານ​ປະ​ເທດ​ຈີນ​ໄດ້​ເດີນທາງ​ໄປ​ເກາະ​ບາ​ຫຼີ​ແລະ​ເຂົ້າ​ຮ່ວມ​ກອງ​ປະຊຸມ APEC ​ເປັນ​ຄັ້ງ​ທຳ​ອິດ, ​ໂດຍ​​ໄດ້​​ໃຫ້​ຂໍ້​ລິ​ເລີ່​ມ​ຕ່າງ​ໆ​ເຊັ່ນ, ​ໃຫ້​ອາຊີ​ປາຊີ​ຟິກ​ເຊື່ອມ​ຕໍ່​ກັນ​ແລະມີ​ການ​ເຕີບ​ໂຕ​ດ້ວຍ​ການ​ປະດິດສ້າງ​ໃໝ່​​ເປັນ​ຕົ້ນ. ​​ໃນ​ເວລາ 1 ປີ​ມາ​ນີ້, ຈີນ​ໄດ້​ສະ​ເໜີ​ຂໍ້​ລິ​ເລີ່​ມ 50 ກວ່າ​ຂໍ້​ທີ່​ມີ​ຜົນ​ດີ​ຕໍ່​ການ​ພັດທະນາ​ຂອງ APEC ​ແລະ​ພາກ​ພື້ນ, ​ໄດ້​ກວມ​ຂໍ້​ລິ​ເລີ່​ມທັງ​ໝົດ 50% ຂຶ້ນ​ໄປ​ທີ່​ສະມາຊິກ APEC ສະ​ເໜີ​ອອກ.
ທີ່​ຈິງ​ແລ້ວ, ຈີນ​ເສີມ​ຂະຫຍາຍ​ໜ້າ​ທີ່​ຮັບຜິດຊອບ​​ໃນພາກ​ພື້ນ​ບໍ່​ແມ່ນ​ເລື່ອງ​ງ່າຍ: ຖ້າ​ຈີນ​ບໍ່​ເສີມ​ຂະຫຍາຍ​ບົດ​ບາດ, ປະ​ເທດ​ອື່ນ​ກໍ່ທວງ​ໃຫ້​ຈີນ​ເສີມ​ຂະຫຍາຍ​ບົດບາດ. ​ແຕ່​ໃນ​ເວລາ​ຈີນເສີມ​ຂະຫຍາຍ​ບົດບາດ​ແລ້ວ, ຄວາມ​ສົງ​ໄສ​ແລະ​ຂໍ້​ຈຳກັດຕ່າງໆ​ຈາກ​ປະ​ເທດ​ອື່ນ​ກໍ່​ໄດ້​ຕິດຕາມ​ມາ​ແລ້ວ.

ຄິດ​ວ່າ​ໂດຍ​ຜ່ານ​ການ​ນັດ​ພົບ​ກັນ​ຢ່າງ​ກ້າ​ຫານ​ທີ່​ຈັດ​ກອງ​ປະຊຸມ​ APEC ຢູ່​ປັກ​ກິ່ງ​ເທື່ອ​ນີ້, ທ່າ​ທີ​ຂອງ​ຈີນ​ທີ່​ເສີມ​ຂະຫຍາຍ​ບົດບາດ​ທີ່​ເປັນ​ປະ​ເທດ​ໃຫຍ່​ຈະ​ສຸກ​​ແກ່​ກວ່າ​ເກົ່າ: ອັນ​ທີ​ໜຶ່ງ​ແມ່ນ​ປະຕິບັດ​ຕາມ​ອຸດົມ​ການ​ອັນ​ຍິ່ງ​ໃຫຍ່​ທີ່​ບັນລຸ​ໃຫ້​ເສດຖະກິດ​ອາຊີ​ປາຊີ​ຟິກ​ເຊື່ອມ​​ໂຍງ​ເຂົ້າກັນ​ຢ່າງ​ເດັດດ່ຽວ, ​ແລະ​ປະ​ເຊີນ​ກັບ​ຄວາມ​ຫຍຸ້ງຍາກ​ຢ່າງ​ກ້າ​ຫານ, ອັນ​ທີ​ສອງ​ແມ່ນ​ປະ​ເຊີນ​ກັບ​ຄວາມ​ຈຳກັດ​ແລະ​ຄວາມ​ຫຍຸ້ງຍາກ​ຕ່າງໆທີ່ຢູ່​ໃນ​ຕົວ​ແລະ​ນອກ​ຕົວ, ​ຜ່ອນ​ສັ້ນ​ຜ່ອນ​ຍາວຢ່າງ​ມີ​ຫົວຄິດ​ປະດິດ​ສ້າງ​ໂດຍ​ຜ່ານ​ການ​ເຈລະຈາ, "ດຳ​ເນີນ​ການ​​ເຈລະຈາ​ກັນ​ໃນ​ເວລາ​ພົບ​ຄວາມ​ຫຍຸ້ງຍາກ"; ພາຍຫຼັງ​ກ້າວ​ເຖິງ​ຄວາມ​ເຫັນ​ເປັນ​ເອກະສັນ​ກັນ​ແລ້ວ, ຊຸກ​ຍູ້​ການ​ປະຕິບັດ​ວຽກ​ງານຢ່າງ​ເປັນ​ກ້າວໆ​ແລະແທ້​ຈິງ, ​ແລະ "​ເຮັດ​ວຽກ​ໂດຍ​ຜ່ານ​ຜ່າ​ຄວາມ​ຫຍຸ້ງຍາກ".

ຂ່າວ-ບົດທີ່ກ່ຽວຂ້ອງ
ຜູ້ດຳເນີນລາຍການ