ວັນທີ 6 ພະຈິກນີ້, ໃນກອງປະຊຸມຖະແຫຼງຂ່າວຕໍ່ສື່ມວນຊົນຂອງຈີນແລະຕ່າງປະເທດທີ່ປັກກິ່ງ, ທ່ານລິວເຈີ້ນໝີນ, ລັດຖະມົນຕີຊ່ວຍວ່າການກະຊວງການຕ່າງປະເທດຈີນກ່າວວ່າ, ນັບແຕ່ວັນທີ 12 ຫາ 14 ພະຈິກນີ້, ທ່ານຫຼີເຄີ້ສຽງ, ນາຍົກລັດຖະມົນຕີຈີນຈະເຂົ້າຮ່ວມກອງປະຊຸມຕ່າງໆຂອງຜູ້ນຳກ່ຽວກັບການຮ່ວມມືໃນອາຊີຕາເວັນອອກຕາມຄຳເຊີນທີ່ຈະຈັດຂຶ້ນຢູ່ມຽນມາ, ທັງຈະຢ້ຽມຢາມມຽນມາຢ່າງເປັນທາງການຫຼັງຈາກກອງປະຊຸມສິ້ນສຸດລົງ.
ກອງປະຊຸມຕ່າງໆຂອງຜູ້ນຳກ່ຽວກັບການຮ່ວມມືໃນອາຊີຕາເວັນອອກ ແມ່ນກົນໄກທີ່ຈັດຂຶ້ນເພື່ອໃຫ້ 10 ປະເທດຂອງອາຊຽນກັບຈີນ,ຍີ່ປຸ່ນ,ສ.ເກົາຫຼີ,ອາເມລິກາ,ຣັດເຊຍແລະປະເທດອື່ນໆ ໄດ້ດຳເນີນການສົນທະນາແລະການຮ່ວມມືກັນ, ໂດຍໄດ້ຜັນປ່ຽນກັນຈັດຂຶ້ນຢູ່ປະເທດໃນອາຊຽນໃນໄຕມາດທີ 4 ທຸກໆປີ, ຊື່ງລວມມີກອງປະຊຸມຜູ້ນຳຈີນກັບອາຊຽນຫຼື 10+1 , ກອງປະຊຸມຜູ້ນຳລະຫວ່າງອາຊຽນກັບ ຈີນ,ຍິ່ປຸ່ນແລະສ.ເກົາຫຼີ ຫຼື 10+3 ແລະກອງປະຊຸມສຸດຍອດອາຊີຕາເວັນອອກ(EAS). ໃນກອງປະຊຸມ10+1 ປີກາຍນີ້, ທ່ານຫຼີເຄີ້ສຽງ,ນາຍົກລັດຖະມົນຕີຈີນໄດ້ສະເໜີຂອບກ່ຽວກັບການເອົາໃຈໃສ່ຄວາມຮູ້ຄືກັນທາງການເມືອງ 2 ຂໍ້, ແລະເພີ່ມທະວີການຮ່ວມມືກັນໃນ 7 ຂົງເຂດ,ຄື "ຂອບການຮ່ວມມື 2+7". ໃນກອງປະຊຸມ 10+1 ປີນີ້, ທ່ານຫຼີເຄີ້ສຽງຈະສະເໜີມາດຕະການໃໝ່ກ່ຽວກັບບັນຫານີ້ຕໍ່ອີກ. ທ່ານລີວເຈີ້ນໝີນກ່າວວ່າ:
"ຈີນຈະສົ່ງເສີມສອງຝ່າຍສືບຕໍ່ເພີ່ມທະວີຄວາມໄວ້ເນື້ອເຊື່ອໃຈກັນທາງການເມືອງ, ສືບຕໍ່ຊຸກຍູ້ໃຫ້ສອງຝ່າຍຮ່ວມກັນສ້າງເສັ້ນທາງສາຍໄໝທາງທະເລໃນສະຕະວັດທີ 21, ຕັ້ງໜ້າຈັດຕັ້ງປະຕິບັດ "ຂອບການຮ່ວມມື 2+7", ເພີ່ມທະວີການແລກປ່ຽນແລະຮ່ວມມືກັນໃນຂົງເຂດຕ່າງໆຄື: ການທະນາຄານ,ມະຫາສະໝຸດ,ຄວາມປອດໄພ,ວັດທະນະທຳ,ການຕິດຕໍ່ພົວພັນແລະການໄປມາຫາສູ່ກັນ ແລະອື່ນໆ."
ໃນຫຼາຍປີມໍ່ໆມານີ້, ການຮ່ວມມືທາງເສດຖະກິດການຄ້າລະຫວ່າງຈີນກັບອາຊຽນໄດ້ຮັບຜົນສຳເລັດຢ່າງພົ້ນເດັ່ນ. ຈີນໄດ້ກາຍເປັນຄູ່ການຄ້າທີ່ໃຫຍ່ກວ່າໝູ່ຂອງອາຊຽນໃນຫຼາຍປີຕິດຕໍ່ກັນ, ອາຊຽນກໍກາຍເປັນຄູ່ການຄ້າໃຫຍ່ອັນດັບ 3 ແລະແຫຼ່ງນຳເຂົ້າໃຫຍ່ອັນດັບ 2 ຂອງຈີນ. ທ່ານທົງຕ້າວສື, ຜູ້ຊ່ວຍລັດຖະມົນຕີວ່າການກະຊວງການຄ້າຈີນໃຫ້ຮູ້ວ່າ:
"ສອງຝ່າຍໄດ້ຮ່ວມກັນດຳເນີນໂຄງການງວດໃຫຍ່ໃນດ້ານພະລັງໄຟຟ້າ,ຂົວ,ກະສິກຳແລະການຜະລິດເປັນຕົ້ນ, ໂດຍສະເພາະແມ່ນຈີນໄດ້ສ້າງກອງທຶນຮ່ວມມືລົງທຶນລະຫວ່າງຈີນກັບອາຊຽນ ແລະໃຫ້ການສະໜັບສະໜູນດ້ານການລະດົມທຶນທີ່ມີບູລິມະສິດຕໍ່ອາຊຽນ, ຊຶ່ງໄດ້ຊຸກຍູ້ປະເທດອາຊຽນໃນການພັດທະນາເສດຖະກິດ, ແລະສ້າງຄວາມສຸກໃຫ້ປະຊາຊົນທ້ອງຖິ່ນ."
ໃນເດືອນກັນຍາປີນີ້, ຈີນກັບອາຊຽນໄດ້ລິເລີ່ມການເຈລະຈາຮອບທຳອິດກ່ຽວກັບການຍົກລະດັບຂອງເຂດການຄ້າເສລີໃຫ້ສູງຂຶ້ນ, ກອງປະຊຸມຜູ້ນຳຄັ້ງນີ້ຈະສືບຕໍ່ຊຸກຍູ້ໃຫ້ສອງຝ່າຍສິ້ນສຸດການເຈລະຈາດັ່ງກ່າວ ກ່ອນທ້າຍປີ 2015.