ວັນທີ 12 ພະຈິກນີ້, ທ່ານລີເຄີ້ສຽງ, ນາຍົກລັດຖະມົນຕີຈີນໄດ້ເດີນທາງໄປມຽນມາເພື່ອເຂົ້າຮ່ວມກອງປະຊຸມຜູ້ນຳກ່ຽວກັບການຮ່ວມມືອາຊີຕາເວັນອອກແລະຢ້ຽມ ຢາມມຽນມາຢ່າງເປັນທາງການ.
ມີການວິເຄາະເຫັນວ່າ, ເນື່ອງໃນໂອກາດທີ່ປັກກິ່ງຈັດກອງປະຊຸມເອເປັກ, ການຢ້ຽມຢາມເທື່ອນີ້ຈະມີຄວາມໝາຍສຳຄັນຕໍ່ການລົງເລິກການພົວພັນລະຫວ່າງ ຈີນ-ອາຊຽນ, ການພົວພັນລະຫວ່າງຈີນ-ມຽນມາ, ການຊຸກຍູ້ການຮ່ວມມືຂອງພາກພື້ນອາຊາຕາເວັນອອກ ແລະການປົກປັກຮັກສາສັນຕິພາບແລະສະເຖຍລະພາບຂອງພາກພື້ນ.
ຂ່າວແຈ້ງວ່າ, ໃນກອງປະຊຸມສຸດຍອດອາຊີຕາເວັນອອກ, ທ່ານລີເຄີ້ສຽງຈະສຸມໃສ່ບັນລະຍາຍຫຼັກການແລະຫຼັກໝັ້ນກ່ຽວກັບທິດທາງພັດທະນາຂອງກອງປະຊຸມ, ເນັ້ນໜັກໃຫ້ຍຶດໝັ້ນຫຼັກການທີ່ກຳນົດໄວ້ ຄື: ນຳພາໂດຍອາຊຽນ, ປຶກສາຫາລືເປັນເອກະສັນກັນແລະພິຈາລະເຖິງຄວາມເຫັນຂອງຝ່າຍຕ່າງໆ, ວາງແຜນການພັດທະນາໃນອະນາຄົດຂອງກອງປະຊຸມຕາມຫຼັກວິທະຍາສາດ.
ກອງປະຊຸມຜູ້ນໍາອາຊຽນ+3 ຄືອາຊຽນກັບຈີນ, ຍີ່ປຸ່ນແລະສ.ເກົາຫຼີທີ່ຈະຈັດຂຶ້ນໃນວັນທີ13ພະຈິກນີ້, ຈະສຸມໃສ່ການເພີ່ມທະວີການປະສານງານກັນດ້ານນະໂຍບາຍເສດຖະກິດການເງິນມະຫາພາກ, ສືບຕໍ່ລົງເລິກການຮ່ວມມືໃນຂົງເຂດການເງິນ, ຄວາມປອດໄພດ້ານອາຫານແລະຂົງເຂດອື່ນໆ, ຊຸກຍູ້ການສ້າງລະບົບ ການຄ້າເສລີອາຊີແລະລະບົບການລົງທຶນແລະຫ້າງຕາທຶນ.ຫຼັງຈາກກອງປະຊຸມຕ່າງໆສິ້ນສຸດລົງແລ້ວ, ທ່ານລີເຄີ້ສຽງຈະຢ້ຽມຢາມມຽນມາຢ່າງເປັນທາງການ. ເມື່ອເວົ້າເຖິງການຢ້ຽມຢາມເທື່ອນີ້, ທ່ານລີເຄີ້ສຽງກ່າວວ່າ, ຫວັງວ່າຜ່ານການຢ້ຽມຢາມເທື່ອນີ້, ເພີ່ມຄວາມໄວ້ເນື້ອເຊື່ອໃຈກັນທາງການເມືອງຕື່ມອີກ, ເຕົ້າໂຮມຄວາມເຫັນທີ່ເປັນເອກະພາບກັນທາງການເມືອງກ່ຽວກັບການພັດທະນາມິດຕະພາບຖານບ້ານໃກ້ເຮືອນຄຽງລະຫວ່າງຈີນກັບມຽນມາ, ຊຸກຍູ້ໃຫ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນ-ມຽນມາກ້າວຂຶ້ນສູ່ລະດັບໃໝ່.
 |
