ວັນທີ 13 ພະຈິກນີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ກ່າວຢູ່ນະຄອນຫຼວງເນປີດໍຂອງມຽນມາວ່າ, ຈີນຈະຊຸກຍູ້ການຮ່ວມມືທາງທະເລກັບປະເທດອາຊີຕາເວັນອອກ, ຖືເອົາກິດຈະກຳປີຮ່ວມມືທາງທະເລຈີນ-ອາຊຽນໃນປີໜ້າເປັນໂອກາດ, ເພີ່ມທະວີການສົນທະນາແລະການຮ່ວມມືລະຫວ່າງອົງການປະຕິບັດກົດໝາຍທາງທະເລ, ແລະປະຕິບັດໂຄງການທີ່ກ່ຽວຂ້ອງກັບກອງທຶນຮ່ວມມືທາງທະເລຈີນ-ອາຊຽນໃຫ້ດີ.
ໃນເວລາເຂົ້າຮ່ວມກອງປະຊຸມສຸດຍອດອາຊີຕາເວັນອອກຄັ້ງທີ 9, ທ່ານຫຼີເຄີ້ສຽງຊີ້ອອກວ່າ, ຂໍກະແຈຂອງການພັດທະນາການຮ່ວມມືອາຊີຕາເວັນອອກ ແມ່ນຊຸກຍູ້ເສດຖະກິດໃຫ້ເຊື່ອມໂຍງເຂົ້າກັນ, ເພື່ອໃຫ້ບັນລຸເລື່ອງນີ້, ຄວນຊຸກຍູ້ການຮ່ວມມືໃນຂົງເຂດຈຸດສຸມ; ຊຸກຍູ້ການຄ້າແລະການລົງທຶນໃນອາຊີຕາເວັນອອກໃຫ້ມີຄວາມສະດວກ, ສຳເລັດການເຈລະຈາກ່ຽວກັບສັນຍາເຂດການຄ້າເສລີທີ່ກ່ຽວຂ້ອງໂດຍໄວ, ສະໜັບສະໜູນການເລີ່ມຕົ້ນຂະບວນການເຂດການຄ້າເສລີອາຊີປາຊິຟິກ; ເພີ່ມທະວີການຮ່ວມມືໃນການຫຼຸດຜ່ອນຄວາມທຸກຍາກຢູ່ອາຊີຕາເວັນອອກ, ຝ່າຍຈີນຍິນດີສືບຕໍ່ໃຫ້ການຊ່ວຍເຫຼືອໂດຍບໍ່ຄິດຄ່າຕອບແທນແກ່ປະເທດດ້ອຍພັດທະນາຂອງອາຊຽນ, ສະໜັບສະໜູນ "ຂໍ້ລິເລີ່ມກ່ຽວກັບການຮ່ວມມືເພື່ອຫຼຸດຜ່ອນຄວາມທຸກຍາກຂອງອາຊີຕາເວັນອອກ", ປະຕິບັດແຜນການຊຸກຍູ້ການຫຼຸດຜ່ອນຄວາມທຸກຍາກຢູ່ຊົນນະບົດ; ຊຸກຍູ້ການຮ່ວມມືທາງທະເລຂອງອາຊີຕາເວັນອອກ.