ຕອນບ່າຍວັນທີ 13 ພະຈິກນີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມຜູ້ນຳອາຊຽນກັບຈີນ, ຍີ່ປຸ່ນແລະສ ເກົາຫຼີ ຄັ້ງທີ 17 ທີ່ຈັດຂຶ້ນຢູ່ນະຄອນຫຼວງເນປີດໍຂອງມຽນມາ. ຜູ້ນຳຂອງ 10 ປະເທດອາຊຽນ, ຍີ່ປຸ່ນແລະສ ເກົາຫຼີໄດ້ເຂົ້າຮ່ວມກອງປະຊຸມໃນຄັ້ງນີ້.
ໃນເວລາກ່າວຄຳປາໄສໃນກອງປະຊຸມດັ່ງກ່າວນີ້, ທ່ານຫຼີເຄີ້ສຽງໄດ້ມີຂໍ້ສະເໜີ 6 ຂໍ້ກ່ຽວກັບການເພີ່ມທະວີການຮ່ວມມືລະຫວ່າງອາຊຽນກັບຈີນ, ຍີ່ປຸ່ນ, ສ ເກົາຫຼີ ຫຼືອາຊຽນບວກ 3 ຄື ຊຸກຍູ້ຂະບວນການເຊື່ອມໂຍງເຂົ້າເປັນອັນໜຶ່ງອັນດຽວກັນທາງດ້ານເສດຖະກິດຂອງອາຊີຕາເວັນອອກ; ຍົກສູງລະດັບການຮ່ວມມືດ້ານການທະນາຄານໃນພາກພື້ນ; ເຮັດໃຫ້ການເຊື່ອມຈອດກັນໃນພາກພື້ນມີຄວາມແໜ້ນແຟ້ນຍິ່ງຂຶ້ນ; ລົງເລິກການຮ່ວມມືໃນດ້ານຊີວິດການເປັນຢູ່ຂອງປະຊາຊົນ, ຖືການລົບລ້າງຄວາມທຸກຍາກເປັນຂົງເຂດບູລິມະສິດຂອງການຮ່ວມມືລະຫວ່າງອາຊຽນບວກ 3; ເປີດກວ້າງການແລກປ່ຽນດ້ານວັດທະນະທຳສັງຄົມ; ເພີ່ມທະວີການຮ່ວມມືດ້ານສາທາລະນະສຸກ.
ຜູ້ນຳຂອງບັນດາປະເທດທີ່ເຂົ້າຮ່ວມກອງປະຊຸມຢືນຢັນວ່າ, ການຮ່ວມມືລະຫວ່າງອາຊຽນບວກ 3 ໄດ້ເສີມຂະຫຍາຍບົດບາດທີ່ເປັນຊ່ອງທາງຕົ້ນຕໍຂອງການຮ່ວມມືໃນອາຊີຕາເວັນອອກມາໂດຍຕະຫຼອດ, ເຊິ່ງໄດ້ຊຸກຍູ້ການພັດທະນາຂອງພາກພື້ນຢ່າງແຂງແຮງ. ບັນດາປະເທດຄວນຮ່ວມມືກັນຈັດຕັ້ງປະຕິບັດຂໍ້ລິເລີ່ມການຮ່ວມມືແລະແຜນການຮ່ວມມື, ເປີດກວ້າງການຮ່ວມມືດ້ານເສດຖະກິດຕື່ມອີກ, ຊຸກຍູ້ການກໍ່ສ້າງປະຊາຄົມອາຊີຕາເວັນອອກ, ປົກປັກຮັກສາສັນຕິພາບແລະຄວາມຈະເລີນຮຸ່ງເຮືອງຂອງພາກພື້ນໃຫ້ດີກວ່າເກົ່າ.