ຕອນບ່າຍວັນທີ 13 ພະຈິກນີ້, ຢູ່ນະຄອນຫຼວງເນປີດໍຂອງມຽນມາ, ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ພົບປະກັບທ່ານນາເຣັນດຣາ ໂມດີ, ນາຍົກລັດຖະມົນຕີອິນເດຍ.
ທ່ານຫຼີເຄີ້ສຽງກ່າວວ່າ, ຈີນແລະອິນເດຍເປັນປະເທດບ້ານໃກ້ເຮືອນຄຽງທີ່ສໍາຄັນຕໍ່ກັນ. ຝ່າຍຈີນຍິນດີຮ່ວມກັບຝ່າຍອິນເດຍເພື່ອກໍາເອົາທິດທາງລວມຂອງການພົວພັນສອງປະເທດໃຫ້ດີ, ໃຫ້ມີໄມຕີຈິດມິດຕະພາບຖານບ້ານໃກ້ເຮືອນຄຽງທີ່ດີ ແລະການຮ່ວມມືແບບຕ່າງຝ່າຍຕ່າງມີຜົນປະໂຫຍດນັ້ນ ກາຍເປັນຫົວຂໍ້ຫຼັກຂອງການພົວພັນສອງຝ່າຍ, ຍົກລະດັບການຮ່ວມມືຕົວຈິງຢ່າງຮອບດ້ານ, ເພີ່ມທະວີການປະສານງານແລະການຮ່ວມມືໃນວຽກງານພາກພື້ນກໍຄືສາກົນ ແລະສ້າງຄວາມສົມບູນພູນສຸກໃຫ້ແກ່ປະຊາຊົນຫຼາຍຕື້ຄົນຂອງສອງປະເທດແລະຂອງພາກພື້ນນີ້. ທ່ານຫຼີເຄີ້ສຽງຍັງໄດ້ເຊື້ອເຊີນທ່ານໂມດີເດີນທາງໄປຢ້ຽມຢາມຈີນໃນໄລຍະຕົ້ນຂອງປີໜ້າ.
ທ່ານໂມດີກ່າວວ່າ, ອິນເດຍແລະຈີນເພີ່ມທະວີການຮ່ວມມື ບໍ່ພຽງແຕ່ສ້າງຄວາມສົມບູນພູນສຸກໃຫ້ແກ່ປະຊາຊົນສອງຊາດເທົ່ານັ້ນ, ຍັງມີຜົນດີຕໍ່ພາກພື້ນແລະຂົງເຂດອື່ນ. ທ່ານຫຼີເຄີ້ສຽງໄດ້ເລືອກເອົາອິນເດຍເປັນປະເທດທໍາອິດໃນການຢ້ຽມຢາມຄັ້ງທໍາອິດຫຼັງຈາກທ່ານໄດ້ຂຶ້ນຮັບຕໍາແໜ່ງ, ສ່ວນທ່ານຫຼີເຄີ້ສຽງກໍເປັນຜູ້ນໍາຕ່າງປະເທດທ່ານທໍາອິດທີ່ສົນທະນາຜ່ານໂທລະສັບກັບຂ້າພະເຈົ້າຫຼັງຈາກຂ້າພະເຈົ້າໄດ້ຂຶ້ນຮັບຕໍາແໜ່ງ, ຝ່າຍອິນເດຍຂໍຂອບໃຈຕໍ່ເລື່ອງນີ້. ຂ້າພະເຈົ້າຍິນດີເດີນທາງໄປຢ້ຽມຢາມຈີນໃນໄວນີ້, ປຶກສາຫາລືກັບຝ່າຍຈີນກ່ຽວກັບການຮ່ວມມື ແລະຊຸກຍູ້ການພົວພັນສອງປະເທດໃຫ້ໄດ້ຮັບຄວາມຄືບໜ້າຫຼາຍກວ່າເກົ່າ.
