ວັນທີ 13 ພະຈິກນີ້, ຢູ່ນະຄອນຫຼວງເນປີດໍຂອງມຽນມາ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສຸດຍອດຈີນ-ອາຊຽນ (10+1). ທ່ານຫຼີເຄີ້ສຽງກັບທ່ານເທນເຊນ ປະທານາທິບໍດີມຽນມາ ໄດ້ຮ່ວມກັນເປັນປະທານຂອງກອງປະຊຸມ, ເຊິ່ງບັນດາຝ່າຍທີ່ຮ່ວມປະຊຸມໄດ້ລົງເລິກປຶກສາຫາລືກ່ຽວກັບການເປີດກວ້າງການຮ່ວມມືລະຫວ່າງຈີນກັບອາຊຽນ, ແລະໄດ້ບັນລຸເຖິງຄວາມຮັບຮູ້ທີ່ເປັນເອກະພາບກັນຢ່າງກວ້າງຂວາງ.
ໃນເວລາປະກອບຄຳຄິດເຫັນ, ທ່ານຫຼີເຄີ້ສຽງກ່າວວ່າ, ລັດຖະບານຈີນໄດ້ຖືເອົາອາຊຽນເປັນທິດທາງບູລິມະສິດໃນການຕ່າງປະເທດກັບປະເທດອ້ອມຂ້າງ, ເດັດດ່ຽວສະໜັບສະໜູນການສ້າງປະຊາຄົມອາຊຽນ, ສະໜັບສະໜູນຖານະນຳພາຂອງອາຊຽນໃນການຮ່ວມມືອາຊີຕາເວັນອອກ, ດຳເນີນການຮ່ວມມືຕົວຈິງກັບປະເທດອາຊຽນໃນທຸກຂົງເຂດ, ເຮັດໃຫ້ຜົນປະໂຫຍດຮ່ວມຂອງສອງຝ່າຍມີຄວາມເລິກເຊິ່ງກວ່າເກົ່າຢ່າງບໍ່ຢຸດຢັ້ງ, ສ້າງປະຊາຄົມຈີນ-ອາຊຽນທີ່ຮ່ວມຊາຕາກຳທີ່ແໜ້ນແຟ້ນກວ່າເກົ່າ. ກ່ຽວກັບເລື່ອງນີ້, ທ່ານຫຼີເຄີ້ສຽງໄດ້ມີຂໍ້ສະເໜີ 6 ຂໍ້ຄື:
ໜຶ່ງ, ຮ່ວມແຮງວາງແຜນຍຸດທະສາດໃຫຍ່ແຫ່ງການພັດທະນາການພົວພັນຈີນ-ອາຊຽນ. ສອງ, ຮ່ວມມືຍົກລະດັບເຂດການຄ້າເສລີຈີນ-ອາຊຽນໃຫ້ສູງຂຶ້ນ. ສາມ, ເລັ່ງລັດການສ້າງຕາຂ່າຍພື້ນຖານແຫ່ງການເຊື່ອມຈອດກັນ. ສີ່, ສ້າງຈຸດເດັ່ນໃນການຮ່ວມມືທາງທະເລຢ່າງພາກພຽນ. ຫ້າ, ດຳເນີນການພົບປະບໍ່ເປັນທາງການລະຫວ່າງລັດຖະມົນຕີປ້ອງກັນປະເທດຂອງຈີນ-ອາຊຽນ, ປຶກສາຫາລືການສ້າງສາຍດ່ວນແຫ່ງການປ້ອງກັນປະເທດຈີນ-ອາຊຽນ. ແລະຫົກ, ຕັ້ງໜ້າເປີດກວ້າງຂົງເຂດໃໝ່ໃນການຮ່ວມມືໃນດ້ານວັດທະນະທຳ, ວິທະຍາສາດເຕັກນິກ,ແລະການອະນຸລັກສິ່ງແວດລ້ອມ.
ທ່ານຫຼີເຄີ້ສຽງກ່າວຕື່ມວ່າ, ການພົວພັນຄູ່ຮ່ວມຍຸດທະສາດຈີນ-ອາຊຽນໄດ້ຜ່ານ "ທົດສະວັດຄຳ" ແລ້ວ, ພວມກ້າວເຂົ້າສູ່ "ທົດສະວັດເພັດພອຍ" ທີ່ມີຈຸດເລີ່ມຕົ້ນທີ່ສູງກວ່າເກົ່າ, ມີເນື້ອໃນກວ້າງຂວາງກວ່າເກົ່າ ແລະມີການຮ່ວມມືເລິກເຊິ່ງກວ່າເກົ່າ.
 |
