ວັນທີ 14 ພະຈິກນີ້, ຢູ່ນະຄອນຫຼວງເນປີດໍ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະເຈລະຈາກັບທ່ານເທນເຊນ ປະທານາທິບໍດີມຽນມາ, ເຊິ່ງໃນການພົບປະກັນເທື່ອນີ້, ສອງຝ່າຍໄດ້ແລກປ່ຽນຄວາມເຫັນແລະໄດ້ບັນລຸຄວາມຮັບຮູ້ທີ່ເປັນເອກະພາບກັນຢ່າງກວ້າງຂວາງກ່ຽວກັບການຊຸກຍູ້ການພົວພັນຈີນ-ມຽນມາຕື່ມອີກ ແລະລົງເລິກການຮ່ວມມືທາງຍຸດທະສາດຮອບດ້ານລະຫວ່າງສອງປະເທດ.
ທ່ານຫຼີເຄີ້ສຽງກ່າວວ່າ, ຝ່າຍຈີນເດັດດ່ຽວສະໜັບສະໜູນມຽນມາເພື່ອສືບຕໍ່ກ້າວເດີນໄປຕາມເສັ້ນທາງພັດທະນາທີ່ສອດຄ່ອງກັບສະພາບຂອງປະເທດຕົນ, ບັນລຸສະເຖຍລະພາບແລະການພັດທະນາຢ່າງຍືນຍົງ, ຈີນຍິນດີຮ່ວມກັບມຽນມາ, ຍຶດໝັ້ນໂດຍຖືໜັກສະພາບລວມແຫ່ງການພົວພັນມິດຕະພາບຈີນ-ມຽນມາແລະຜົນປະໂຫຍດພື້ນຖານຂອງປະຊາຊົນສອງຊາດ, ໄວ້ເນື້ອເຊື່ອໃຈກັນ, ຊ່ວຍເຫຼືອເຊິ່ງກັນແລະກັນ, ເຮັດໃຫ້ຕ່າງຝ່າຍຕ່າງໄດ້ຮັບຜົນປະໂຫຍດ, ສືບທອດປະຫວັດສາດແລະພັດທະນາອະນາຄົດ, ຍົກລະດັບການຮ່ວມມືທາງຍຸດທະສາດຈີນ-ມຽນມາໃຫ້ສູງຂຶ້ນຢ່າງຮອບດ້ານ, ສອງປະເທດຈະເປັນເພື່ອນບ້ານທີ່ດີ, ເພື່ອນມິດທີ່ດີ ແລະຄູ່ຮ່ວມທີ່ດີຈົນເທົ່າໃດໆ.
ທ່ານເທນເຊນກ່າວວ່າ, ຝ່າຍມຽນມາຍິນດີຖືການຢ້ຽມຢາມຂອງທ່ານຫຼີເຄີ້ສຽງເປັນໂອກາດທີ່ເອື້ອອຳນວຍ, ຮ່ວມກັບຝ່າຍຈີນເພີ່ມທະວີການແລກປ່ຽນແລະການຮ່ວມມືຕື່ມອີກ, ສະໜັບສະໜູນແລະຈະຕັ້ງໜ້າເຂົ້າຮ່ວມການສ້າງແລວເສດຖະກິດຈີນ-ອິນເດຍ-ມຽນມາ, "ແລວເສດຖະກິດເສັ້ນທາງສາຍໄໝ", "ເສັ້ນທາງສາຍໄໝທາງທະເລສະຕະວັດທີ 21" ແລະ ທະນາຄານລົງທຶນພື້ນຖານໂຄງລ່າງອາຊີ, ດຳເນີນການຮ່ວມມືໃນໂຄງການໃຫຍ່, ດຳເນີນການແລກປ່ຽນທາງດ້ານວັດທະນະທຳຢ່າງໃກ້ຊິດ, ແລະຊຸກຍູ້ການພົວພັນລະຫວ່າງສອງປະເທດໃຫ້ໄດ້ຮັບການພັດທະນາໃໝ່.