ຕອນບ່າຍວັນທີ 13 ພະຈິກນີ້, ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສຸດຍອດຈີນ—ອາຊຽນ (10+1) ຄັ້ງທີ 17 ຢູ່ ນະຄອນຫຼວງເນປີດໍຂອງມຽນມາ, ໄດ້ລົງເລິກຫາລືກັບຜູ້ນຳ 10 ປະເທດອາຊຽນກ່ຽວກັບການເພີ່ມທະວີການຮ່ວມມືລະຫວ່າງຈີນ—ອາຊຽນຕື່ມ ອີກ, ແລະໄດ້ບັນລຸຄວາມຮັບຮູ້ທີ່ເປັນເອກະສັນກັນຢ່າງກວ້າງຂວາງ.
ທ່ານໂລ້ຢົງຄຸ່ນ, ນັກປາດຂອງສຳນັກຄົ້ນຄວ້າອາຊີໃຕ້ອາຊີອາຄະເນຂອງສະຖາບັນຄົ້ນຄວ້າການພົວພັນສາກົນສະໄໝປະຈຸບັນຈີນເຫັນວ່າ, ຂໍ້ສະເໜີຂອງທ່ານຫຼີເຄີ້ສຽງນາຍົກລັດຖະມົນຕີຈີນກ່ຽວກັບການຕັ້ງໜ້າເຈລະຈາກັບອາຊຽນເພື່ອເຊັນ"ສັນຍາການຮ່ວມມືດ້ວຍໄມຕີຈິດມິດຕະພາບຖານບ້ານໃກ້ເຮືອນຄຽງລະຫວ່າງຈີນ—ປະເທດອາຊຽນ"ແມ່ນຈຸດເດັ່ນໃຫຍ່ທີ່ສຸດຂອງກອງປະຊຸມເທື່ອນີ້. ທ່ານກ່າວວ່າ:
"ນີ້ແມ່ນເອກະສານກົດໝາຍສະບັບໜຶ່ງທີ່ຊຸກຍູ້ການຮ່ວມມືດ້ວຍໄມຕີຈິດມິດຕະພາບຖານບ້ານໃກ້ເຮືອນຄຽງລະຫວ່າງຈີນ—ອາຊຽນທີ່ຈີນສະເໜີອອກ, ເອກະສານດັ່ງກ່າວສາມາດສະໜອງການຮັບປະກັນທີ່ແຂງແຮງໃຫ້ແກ່ການຮ່ວມມືລະຫວ່າງຈີນອາຊຽນໃນຫຼາຍສິບປີຕໍ່ໜ້າ."
ທ່ານຈ່າງຈ້ຽນພິງ, ຫົວໜ້າຫ້ອງການການຮ່ວມມືດ້ານເສດຖະກິດສາກົນສະຖາບັນຄົ້ນຄວ້າເສດຖະກິດຕໍ່ຕ່າງປະເທດຂອງຄະນະກຳມະການພັດ ທະນາແລະການປະຕິຮູບແຫ່ງລັດຈີນເຫັນວ່າ, ຈຸດເດັ່ນໃຫຍ່ທີ່ສຸດຂອງກອງປະຊຸມເທື່ອນີ້ ແມ່ນຢູ່ໃນຂົງເຂດການເຊື່ອມຈອດກັນແລະການສະ ໜັບສະໜູນດ້ານການທະນາຄານ. ຈີນໄດ້ປະກາດໃຫ້ສ້າງກອງທຶນເສັ້ນທາງສາຍໄໝທີ່ມີມູນຄ່າ 40 ຕື້ໂດລາສະຫະລັດ, ແລະຈະເລີ່ມຕົ້ນການຫ້າງຫາທຶນຈຳນວນ 3 ຕື້ໂດລາສະຫະລັດທີ່ເປັນໄລຍະທີສອງຂອງກອງທຶນການລົງທຶນການຮ່ວມມືລະຫວ່າງຈີນ—ອາຊຽນ, ທະນາຄານພັດ ທະນາແຫ່ງຊາດຈີນຍັງຈະຕັ້ງເງິນກູ້ສະເພາະໃນດ້ານພື້ນຖານໂຄງລ່າງຈີນ—ອາຊຽນຈຳນວນ 10 ຕື້ໂດລາສະຫະລັດ. ທ່ານກ່າວວ່າ,
"ຈີນກັບ 10 ປະເທດອາຊຽນລ້ວນແຕ່ຈະກາຍເປັນປະເທດລິເລີ່ມສ້າງທະນາຄານລົງທຶນໃນພື້ນຖານໂຄງລ່າງອາຊີ (AIIB). ໃນເວລາໃຫ້ການສະໜັບສະໜູນດ້ານການທະນາຄານ, ທ່ານຫຼີເຄີ້ສຽງສະເໜີອອກມາວ່າ, ຈີນຈະສະໜອງທຶນ 30 ລ້ານຢວນແກ່ອາຊຽນໃນ 3 ປີຕໍ່ໜ້ານີ້, ເພື່ອ ໃຊ້ໃນການຊຸກຍູ້ການຮ່ວມມືດ້ານເສດຖະກິດເຕັກນິກລະຫວ່າງຈີນ—ອາຊຽນ. ໝາຍຄວາມວ່າ, ລະຫວ່າງຈີນກັບອາຊຽນ, ການສ້າງຄວາມສາມາດແລະການຍົກລະດັບຂອງການຮ່ວມມືດ້ານເສດຖະກິດກັບການເຊື່ອມຈອດກັນດ້ານພື້ນຖານໂຄງລ່າງຈະເກີດມີສະພາບການທີ່ຕ່າງຊ່ວຍຊູຍູ້ໜູນກັນເປັນຢ່າງດີ."
ທ່ານຈ່າງຈ້ຽນພິງເຫັນວ່າ, ຂໍ້ສະເໜີຂອງທ່ານຫຼີເຄີ້ສຽງຄືການຮ່ວມກັນຍົກລະດັບເຂດການຄ້າເສລີຈີນ—ອາຊຽນ, ພະຍາຍາມສຳເລັດການເຈລະຈາກ່ຽວກັບການຍົກລະດັບຂອງເຂດການຄ້າເສລີກ່ອນທ້າຍປີ 2015 ກໍ່ແມ່ນຈຸດເດັ່ນໃໝ່ອີກຈຸດໜຶ່ງ.ເຊິ່ງຈະມີຜົນດີຕໍ່ການສ້າງເປັນຂອບການເຈລະຈາການພົວພັນຄູ່ຮ່ວມເສດຖະກິດຮອບດ້ານໃນພາກພື້ນຫຼື RCEP ທີ່ນຳພາໂດຍອາຊຽນ, ແລະກໍ່ມີຜົນດີຕໍ່ການສ້າງເຂດການຄ້າເສລີອາຊີປາຊິຟິກ.
ທ່ານໂລ້ຢົງຄຸ່ນກ່າວວ່າ, ທ່ານຫຼີເຄີ້ສຽງນາຍົກລັດຖະມົນຕີຈີນໄດ້ໃຫ້ຂໍ້ສະເໜີວ່າ, ຈະກຳນົດເອົາປີ 2015 ເປັນປີແຫ່ງການຮ່ວມມືທາງທະເລຈີນ-ອາຊຽນ, ເພີ່ມທະວີການສົນທະນາແລະການຮ່ວມມືກັນລະຫວ່າງອົງການປະຕິບັດກົດໝາຍທາງທະເລຕື່ມອີກເພື່ອສ້າງຕັ້ງສູນການຮ່ວມມືທາງທະເລ. ທ່ານໂລ້ຢົງຄຸ່ນເຫັນວ່າ, ສຳລັບການຮ່ວມມືທາງທະເລເອງ, ກໍ່ເປັນການປະດິດສ້າງແບບໃໝ່ອັນໜຶ່ງໃນການພົວພັນລະຫວ່າງຈີນ-ອາຊຽນ.
"ແຕ່ກ່ອນ, ມີບາງປະເທດມັກປັ້ນຂ່າວກ່ຽວກັບອັນທີ່ວ່າ"ຄວາມຂັດແຍ້ງທາງທະເລເລື້ອຍໆ, ແຕ່ວ່າຜ່ານຈາກກອງປະຊຸມສຸດຍອດຈີນ-ອາຊຽນຄັ້ງນີ້ແລ້ວເຫັນໄດ້ວ່າ, ຜູ້ນຳຂອງພວກຂ້າພະເຈົ້າພວມຊຸກຍູ້ການຮ່ວມມືທາງທະເລໃນທາງບວກ."
ທ່ານໂລ້ຢົງຄຸ່ນຍັງເຫັນວ່າ, ການທີ່ທ່ານຫຼີເຄີ້ສຽງສະເໜີໃຫ້ຈັດການພົບປະບໍ່ເປັນທາງການລະຫວ່າງລັດຖະມົນຕີປ້ອງກັນປະເທດຈີນ-ອາຊຽນໃຫ້ດີໃນປີໜ້າແລະຄົ້ນຄວ້າຫາລືກັນໃນການສ້າງໂທລະສັບສາຍດ່ວນດ້ານປ້ອງກັນປະເທດຈີນ-ອາຊຽນນັ້ນ, ກໍແມ່ນຈຸດເດັ່ນຈຸດໜຶ່ງ. ທ່ານກ່າວວ່າ,
"ໃນຮອບ 20 ປີທີ່ຜ່ານມາ, ຈຸດເດັ່ນຂອງການຮ່ວມມືລະຫວ່າງຈີນ-ອາຊຽນແມ່ນໃນດ້ານເສດຖະກິດ, ປະຈຸບັນພວກເຮົາ ມີເຂດການຄ້າເສລີຈີນ-ອາຊຽນແລ້ວ, ຍອດມູນຄ່າການຄ້າສອງຝ່າຍໄດ້ບັນລຸເຖິງປະມານ 450 ຕື້ໂດລາ, ແຕ່ຢູ່ເບື້ອງຫຼັງຂອງເສດຖະກິດທີ່ມີຂະໜາດໃຫຍ່ປານນີ້, ພວກ ເຮົາຍັງຂາດການຮັບປະກັນທາງຄວາມປອດໄພຢູ່. ປະຈຸບັນ, ຜ່ານການພົບປະບໍ່ເປັນທາງການລະຫວ່າງລັດຖະມົນຕີປ້ອງກັນປະເທດຈີນ-ອາຊຽນແລະການສ້າງຕັ້ງໂທລະສັບສາຍດ່ວນດ້ານປ້ອງກັນປະເທດຈີນ-ອາຊຽນ, ການຮ່ວມມືດ້ານເສດຖະກິດແລະການເມຶອງລະຫວ່າງຈີນ-ອາຊຽນ ຈະມີການຮັບປະກັນຕື່ມອີກ, ເຊິ່ງສາມາດຊຸກຍູ້ຄວາມໄວ້ເນື້ອເຊື່ອໃຈເຊິ່ງກັນແລະກັນລະຫວ່າງຈີນ-ອາຊຽນ."
