ວັນທີ 15 ພະຈິກນີ້, ກອງປະຊຸມສຸດຍອດກຸ່ມຊາວປະເທດ ຫຼື G20 ໄດ້ຈັດຂຶ້ນຢູ່ເມືອງປຣີສປານແຫ່ງອົສຕຣາລີ. ທ່ານສີຈີ້ນຜີງ ປະທານປະເທດຈີນໄດ້ເຂົ້າຮ່ວມກອງປະຊຸມ ແລະ ກ່າວຄຳປາໄສອັນສຳຄັນທີ່ມີຫົວຂໍ້ວ່າ "ຊຸກຍູ້ການພັດທະນາແບບປະດິດສ້າງ, ບັນລຸໃຫ້ມີການເຕີບໂຕຮ່ວມກັນ" ໂດຍລິເລິ່ມໃຫ້ເປັນຄູ່ພັດທະນາທີ່ພ້ອມກັນຊຸກຍູ້ການປະຕິຮູບດ້ານເສດຖະກິດ, ຈັດຕັ້ງປະຕິບັດຍຸດທະສາດການເຕີບໂຕຢ່າງຮອບດ້ານ, ຊຸກຍູ້ໃຫ້ເສດຖະກິດໂລກປ່ຽນຈາກການຟື້ນຟູທີ່ເປັນໄລຍະ ຫັນເປັນການເຕີບໂຕແບບຍືນຍົງ. ທ່ານສີຈີ້ນຜີງກ່າວເນັ້ນວ່າ, ຈີນຈະສືບຕໍ່ຮັກສາທ່ວງທ່າການເຕີບໂຕຂອງເສດຖະກິດ, ປະກອບສ່ວນຫຼາຍກວ່າເກົ່າເຂົ້າໃນການຊຸກຍູ້ເສດຖະກິດໂລກໃຫ້ມີການເຕີບໂຕ.
ຜູ້ນຳສະມາຊິກຕ່າງໆໄດ້ຕີລາຄາສູງຕໍ່ຈີນທີ່ໄດ້ຕັ້ງໜ້າປັບປຸງອົງປະກອບເສດຖະກິດ, ຫັນປ່ຽນຮູບການພັດທະນາເສດຖະກິດ, ເຊື່ອວ່າຈີນລົງເລິກການປະຕິຮູບຢ່າງຮອບດ້ານຈະຊຸກຍູ້ເສດຖະກິດຈີນໃຫ້ພັດທະນາຢ່າງຕໍ່ເນື່ອງ ແລະ ປອດໄສ, ປະກອບສ່ວນຫຼາຍກວ່າເກົ່າເຂົ້າໃນການພັດທະນາຂອງເສດຖະກິດໂລກ.
ມື້ດຽວກັນ, ທ່ານສີຈີ້ນຜີງຍັງໄດ້ເຂົ້າຮ່ວມການປຶກສາຫາລືບໍ່ເປັນທາງການຂອງກອງປະຊຸມສຸດຍອດ G20 ແລະໄດ້ກ່າວຄຳປາໄສກ່ຽວກັບຫົວຂໍ້ການປະຕິຮູບຂອງເສດຖະກິດ.
ພາຍໃຕ້ການຊຸກຍູ້ຂອງຈີນ, ອາເມລິກາ ແລະ ອົສຕຣາລີ, ກອງປະຊຸມໄດ້ຮັບຮອງ "ຖະແຫຼງການປຣີສປານກ່ຽວກັບຜູ້ນຳ G20 ຮັບມືກັບພະຍາດອີໂປລາ" ໂດຍຍ້ອງຍໍບັນດາປະເທດທີ່ໄດ້ປະກອບສ່ວນຢ່າງຫຼວງຫຼາຍ, ຮຽກຮ້ອງໃຫ້ເພິ່ມທະວີການຮ່ວມມືລະຫວ່າງຊາດ, ພ້ອມກັນຮັບມືກັບພະຍາດອີໂປລາ.
