ວັນທີ 17 ພະຈິກນີ້, ທ່ານສີຈິ້ນຜິງ ປະທານປະເທດຈີນກັບທ່ານໂທນີ ອາບັອດ ນາຍົກລັດຖະມົນຕີອົສຕຣາລີໄດ້ດຳເນີນການພົບປະເຈລະຈາກັນຢູ່ນະຄອນຫຼວງແຄັນເບີຣາ ຂອງອົສຕຣາລີ, ສອງຝ່າຍໄດ້ຮ່ວມກັນຢືນຢັນການສິ້ນສຸດການເຈລະຈາສັນຍາການຄ້າເສລີຈີນ-ອົສຕຣາລີໃນຕົວຈິງ. ພາຍຫຼັງການພົບປະກັນ, ພາຍໃຕ້ການເປັນສັກຂີພິຍານຂອງຜູ້ນຳສອງປະເທດ, ຜູ້ຕາງໜ້າຂອງສອງປະເທດໄດ້ລົງນາມໃນຖະແຫຼງການວ່າດ້ວຍເຈດຕະນາລົມໃນການສິ້ນສຸດການເຈລະຈາສັນຍາການຄ້າເສລີຈີນ-ອົສຕຣາລີໃນຕົວຈິງ.
ການເຈລະຈາສັນຍາການຄ້າເສລີຈີນ-ອົສຕຣາລີເລີ່ມດຳເນີນຂຶ້ນມາແຕ່ເດືອນເມສາປີ 2005, ເປັນການເຈລະຈາສັນຍາການຄ້າເສລີຮອບ ດ້ານແລະມີລະດັບສູງອີກອັນໜຶ່ງທີ່ຈີນໄດ້ສຳເລັດການເຈລະຈາກັບອົງກອນເສດຖະກິດສຳຄັນໃນພາກພື້ນອາຊີປາຊີຟິກພາຍຫຼັງທີ່ໄດ້ສຳເລັດການເຈລະຈາສັນຍາການຄ້າເສລີຈີນ-ສ ເກົາຫຼີແລ້ວ. ການເຈລະຈາສັນຍາການຄ້າເສລີຈີນ-ອົສຕຣາລີໄດ້ບັນລຸເປົ້າໝາຍທີ່ມີຄວາມຮອບ ດ້ານ, ມີຄຸນນະພາບສູງແລະມີຄວາມດຸນດ່ຽງດ້ານຜົນປະໂຫຍດ, ການເຊັນສັນຍາດັ່ງກ່າວນີ້ຈະເຮັດໃຫ້ເສດຖະກິດຂອງສອງປະເທດບັນລຸການຈຸນເຈືອກັນດ້ານທ່າແຮງ ແລະຕ່າງຝ່າຍຕ່າງໄດ້ຮັບຜົນປະໂຫຍດ, ຊຸກຍູ້ໃຫ້ການພົວພັນດ້ານເສດຖະກິດການຄ້າລະຫວ່າງສອງຝ່າຍຂະຫຍາຍຕົວກ້າວສູ່ລວງເລິກ.
 |
