ຕອນແລງວັນທີ21ພະຈິກ2014, ທີ່ຫ້ອງວ່າການລັດຖະບານໄດ້ຈັດພິທີເຊັນສັນຍາຂອບ ລະຫວ່າງລັດຖະບານສປປລາວແລະລັດຖະບານສປຈີນ ວ່າດ້ວຍສປຈີນສະໜອງເງິນກູ້ພິເສດໃຫ້ແກ່ສປປລາວເພື່ອນຳໃຊ້ເຂົ້າໃນໂຄງການພັດທະນາກວມລວມນະຄອນຫຼວງວຽງຈັນ. ໂຄງການດັ່ງກ່າວເປັນໜຶ່ງໃນໂຄງການບູລິມະສິດທີ່ຈຳເປັນຮີບດ່ວນຂອງລັດຖະບານລາວ ເພື່ອຍົກລະດັບພື້ນຖານໂຄງລ່າງໃນເຂດຕົວເມືອງນະຄອນຫຼວງວຽງຈັນ, ປະກອບສ່ວນສ້າງສິ່ງເອື້ອອຳນວຍໃຫ້ແກ່ແຜນງານໃຫຍ່ແລະສຳຄັນຂອງຊາດລາວ, ຄື: ພິທີສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວຄົບຮອບ60ປີ, ພິທີສະຫຼອງການສະຖາປະນາສປປລາວຄົບຮອບ40ປີໃນປີ2015, ກອງປະຊຸມໃຫຍ່ຄັ້ງທີ10ຂອງພັກປະຊາຊົນປະຕິວັດລາວ, ແລະກອງປະຊຸມສຸດຍອດອາຊຽນໃນປີ2016ທີ່ລາວໄດ້ຮັບກຽດເປັນເຈົ້າພາບ.
ໃນພິທີດັ່ງກ່າວ, ທ່ານສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ, ປະທານຄະນະກຳມາທິການຮ່ວມມືລາວ-ຈີນຕາງໜ້າໃຫ້ລັດຖະບານລາວແລະທ່ານກວນຮວາປີງ, ເອກອັກຄະລັດຖະທູດຈີນປະຈຳລາວຕາງໜ້າໃຫ້ລັດຖະບານຈີນເປັນຜູ້ຮ່ວມລົງນາມ.