ວັນທີ 24 ພະຈິກນີ້, ຢູ່ນະຄອນດູໄບຂອງອາຣັບເອມີເຣດ, ທ່ານໂຈ່ວເຫວີນຈົ້ງ, ເລຂາທິການໃຫຍ່ເວທີປຶກສາຫາລືອາຊີໂປອາວກ່າວວ່າ, ປະເທດຕ່າງໆຢູ່ອາຊີຊົມເຊີຍການສ້າງຕັ້ງທະນາຄານລົງທຶນພື້ນຖານໂຄງລ່າງອາຊີໂດຍ ທົ່ວໄປ, ການສ້າງຕັ້ງທະນາຄານແຫ່ງນີ້ມີຜົນດີຕໍ່ການເພີ່ມທະວີການເຊື່ອມຈອດກັນຂອງປະເທດຕ່າງໆຢູ່ອາຊີໃນດ້ານການກໍ່ສ້າງພື້ນຖານໂຄງລ່າງ ແລະບັນລຸຄວາມຈະເລີນຮ່ວມກັນຂອງພາກພື້ນນີ້.
ໃນເວລາເຂົ້າຮ່ວມກອງປະຊຸມກ່ຽວກັບການຮ່ວມມືດ້ານການເງິນຂອງເວທີປຶກສາຫາລືອາຊີໂປອາວໃນມື້ດຽວກັນ, ທ່ານໂຈ່ວເຫວີນຈົ້ງເປີດເຜີຍໃຫ້ຮູ້ວ່າ, ປັດຈຸບັນ, 21 ສະມາຊິກ ເຊັ່ນຈີນ, ອິນເດຍ ແລະສິງກະໂປໄດ້ເຊັນບົດບັນທຶກວ່າດ້ວຍການສ້າງທະນາຄານລົງທຶນພື້ນຖານໂຄງລ່າງອາຊີຢ່າງເປັນທາງການ ແລະວາງແຜນຈະປະຕິບັດວຽກງານດັ່ງກ່າວກ່ອນທ້າຍປີ 2015. ປະເທດທີ່ກ່ຽວຂ້ອງຢູ່ອາຊີລ້ວນແຕ່ມີທ່າທີຊົມເຊີຍຕໍ່ການສ້າງທະນາຄານລົງທຶນພື້ນຖານໂຄງລ່າງອາຊີ.
ທ່ານໂຈ່ວເຫວີນຈົ້ງຊີ້ອອກວ່າ, ການກໍ່ສ້າງພື້ນຖານໂຄງລ່າງຂອງຫຼາຍປະເທດຢູ່ອາຊີກໍາລັງຕົກຢູ່ໃນສະພາບຄວາມຫຍຸ້ງຍາກຍ້ອນການຂາດງົບປະມານ, ການກໍ່ສ້າງທະນາຄານດັ່ງກ່າວຈະມີຜົນດີຕໍ່ການແກ້ໄຂບັນຫານີ້.