ວັນທີ 10 ທັນວານີ້, ລົດໄຟຖ້ຽວ K9832 ໄດ້ເລີ່ມແລ່ນຈາກສະຖານີລົດໄຟຄຸນມິງແຂວງຢູນນານຈີນ ເພື່ອໄປສູ່ເມືອງເຮີໂຂທີ່ຢູ່ຊາຍແດນຈີນ-ຫວຽດນາມ, ນີ້ເປັນຂີດໝາຍສະແດງໃຫ້ເຫັນວ່າ, ທາງລົດໄຟຈີນ-ຫວຽດນາມສາຍທີສອງຕອນພາຍໃນປະເທດຈີນ, ຄືທາງລົດໄຟລາງມາດຕະຖານແຕ່ນະຄອນຄຸນມິງຫາເມືອງເຮີໂຂ ໄດ້ເປີດການບໍລິການຂົນສົ່ງຜູ້ໂດຍສານໝົດຕອນແລ້ວ.
ທາງລົດໄຟແຕ່ນະຄອນຄຸນມິງແຂວງຢູນນານຜ່ານເມືອງເຮີໂຂໄປເຊື່ອມຕໍ່ກັບຫວຽດນາມນັ້ນ ແມ່ນທາງລົດໄຟສາກົນລະຫວ່າງຈີນກັບຫວຽດນາມສາຍທີສອງ ເຊິ່ງຖັດຈາກສາຍແຕ່ນະຄອນນານນິງເຂດກວາງຊີຜ່ານເມືອງພິງຊຽງໄປເຊື່ອມຕໍ່ກັບຫວຽດນາມທີ່ເປັນສາຍທຳອິດ. ວັນທີ 1 ທັນວາປີນີ້, ທາງລົດໄຟຈີນ-ຫວຽດນາມສາຍທີສອງຕອນສຸດທ້າຍພາຍໃນປະເທດຈີນ ເຊິ່ງເລີ່ມຈາກເມືອງເໝີງຈື້ໄປສູ່ເມືອງເຮີໂຂ ໄດ້ເປີດການບໍລິການຢ່າງເປັນທາງການ, ໂດຍໄດ້ແລ່ນລົດໄຟຂົນສົ່ງສິນຄ້າກ່ອນ. ທາງລົດໄຟແຕ່ເມືອງເໝີງຈື້ໄປຫາເມືອງເຮີໂຂມີຄວາມຍາວທັງໝົດ 140 ກວ່າກິໂລແມັດ.