ງານແຂ່ງຂັນກິລາແຫ່ງຊາດຄັ້ງທີ X ໄດ້ເປີດຂື້ນໃນວັນທີ 13 ທັນວາ 2014 ຢູ່ແຂວງ ອຸດົມໄຊ, ໂດຍການເຂົ້າຮ່ວມຂອງທ່ານ ຈູມມາລີ ໄຊຍະສອນ ປະທານປະເທດແຫ່ງສປປ ລາວ, ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ທ່ານ ດຣ ພັນຄຳ ວິພາວັນ ຮອງນາຍົກລັດຖະມົນ ຕີ, ລັດຖະມົນຕີວ່າການ ກະຊວງ ສຶກສາທິການ ແລະ ກິລາ ພ້ອມດ້ວຍບັນ ດາແຂກທີ່ືກເຊີນ ແລະ ມວນຊົນຊາວອຸດົມໄຊເຂົ້າຮ່ວມເປັນຈຳນວນຫຼວງ ຫຼາຍ.
ທ່ານ ຄຳຫຼ້າ ລິ້ງນະສອນ ເຈົ້າແຂວງ ອຸດົມໄຊ, ປະທານກຳມະການ ຈັດງານກິລາແຫ່ງຊາດຄັ້ງທີ X ໄດ້ຂື້ນກ່າວລາຍງານການກຽມຄວາມພ້ອມ ຈັດງານມະຫະກຳກິລາແຫ່ງຊາດຄັ້ງທີ X ນີ້ວ່າ: ງານແຂ່ງຂັນກິລາແຫ່ງຊາດ ຄັ້ງທີ X ຫຼື ອຸດົມໄຊເກມ ແມ່ນຖືເປັນຄັ້ງປະຫວັດສາດທີ່ແຂວງ ອຸດົມໄຊ ໄດ້ຮັບກຽດເປັນເຈົ້າພາບ, ເປັນໂອກາດອັນດີ ທີ່ທົ່ວພັກ-ທົ່ວລັດ ແລະ ທົ່ວປວງຊົນລາວທັງຊາດພ້ອມຈິດໃຈເຂົ້າສູ່ການຜັນຂະຫຍາຍມະຕິກອງປະຊຸມ ໃຫຍ່ຄັ້ງທີ 9 ຂອງພັກ, ແລະ ເປັນການສ້າງຂະບວນການຕ້ອນຮັບວັນ ສຳຄັນຂອງຊາດ ເປັນຕົ້ນແມ່ນວັນຊາດ ຄົບຮອບ 39 ປີ, ວັນຄ້າຍວັນເກີດຂອງປະທານໄກສອນພົມວິຫານ ແລະ ອື່ນໆໃຫ້ມີບັນຍາກາດຟົດຟື້ນ.
ພາຍຫຼັງການຂື້ນກ່າວລາຍງານຂອງ ທ່ານ ຄຳຫຼ້າ ລິ້ງນະສອນ ເຈົ້າແຂວງ ອຸດົມໄຊ, ປະທານຈັດງານແຂ່ງຂັນກິລາແຫ່ງຊາດຄັ້ງທີ x ແລ້ວ, ທ່ານ ຈູມມາລີ ໄຊຍະສອນ ປະທານປະເທດ ແຫ່ງສປປ ລາວ ກ່າວວ່າ: ຂໍຊົມເຊີຍ ຄະນະນຳອຳນາດການປົກຄອງແຂວງອຸດົມໄຊ ທີ່ພ້ອມຈິດໃຈເປັນເຈົ້າພາບທີ່ດີໃນການຈັດງານແຂ່ງຂັນກິລາຄັ້ງນີ້, ເຊື່ອວ່າ, ງານກິລາແຫ່ງຊາດຄັ້ງນີ້ ຈະເປັນການໂອບເອື້ອຍອາລີຂອງປວງຊົນລາວທັງຊາດ.
