ນັກກິລາເປຕັງທີມຊຸດຊາຍຈາກ ກະຊວງປ້ອງກັນປະເທດຫຼືກອງທັບ ໂຊຟອມໄດ້ເຫນືອກວ່າກະຊວງພາຍໃນເມື່ອແຂ່ງລ່ອງສຸດທ້າຍເອົາຊະນະໄປ 13-9, ສ່ວນປະເພດທີມຊຸດຍິງຕົກເປັນຂອງ ກະຊວງປ້ອງກັນຄວາມສະຫງົບ ຫຼື ປກສ, ຫຼັງເອົາຊະນະແຂວງໄຊຍະບູລີໄປແບບບໍ່ເຫັນຝຸ່ນ 13-0.
ການແຂ່ງຂັນເປຕັງໃນງານມະຫາກຳກິລາແຫ່ງຊາດຄັ້ງທີ X ຫຼື ອຸດົມໄຊເກມ, ມາຮອດວັນທີ 14 ທັນວານີ້ ເປັນມື້ສຸດທ້າຍຂອງການແຂ່ງຂັນກິລາປະເພດດັ່ງກ່າວ ໂດຍມີ 2 ລາຍການໃຫ້ຊີງໄຊກັນປະກອບມີ: ຊຸດຕິ້ງ ຍິງ-ຊາຍ ແລະ ທີມຊຸດ ຍິງ-ຊາຍ.
ປະເພດຊຸດຕິ້ງ ຊາຍ ຮອບຊີງຊະນະເລີດເປັນການໂຄຈອນມາພົບກັນລະຫວ່າງ ທ້າວສຸລິກັນ ຈັນທະວົງ ຈາກແຂວງອັດຕະປືທີ່ເອົາຊະນະນັກກິລາຈາກແຂວງວຽງຈັນມາໃນຮອບຮອງຊະນະເລີດ ພົບກັບ ທ້າວ ພູເພັດ ອິນທະວົງ ຈາກແຂວງ ສະຫວັນນະເຂດ ທີ່ເອົາຊະນະນັກກິລາຈາກແຂວງຜົ້ງສາລີ ມາໃນຮອບຮອງ. ຜົນປະກົດວ່າ ທ້າວ ສຸລິກັນ ເອົາຊະນະໄປຢ່າງຂາດລອຍ 34-21 ຄະແນນໄດ້ຄອງຫຼຽນຄຳ, ສ່ວນຫຼຽນທອງ ຕົກເປັນຂອງແຂວງຜົ້ງສາລີ ແລະ ແຂວວຽງຈັນ.
ສ່ວນຄູ່ຊີງເພດຍິງເປັນການພົບກັນລະຫວ່າງ ນາງ ຄູນຄຳ ສຸກສະຫວັດ ຈາກ ປກສ ພົບກັບ ນາງ ສີພະຈັນ ແກ້ວວົງກົດ ຈາກແຂວງຄຳມ່ວນ ເຊິ່ງຄູ່ນີ້ແມ່ນມີສີມືພໍພໍກັນຈົນຈົບເກມການແຂ່ງຂັນສະເຫມີກັນ 33-33 ຄະແນນ ແຕ່ກຳມະການໃຫ້ນັກກິລາຈາກ ປກສ ຊະນະ ເນື່ອງຈາກວ່າໃນໄລຍະຕີຕະຫຼອດເກມແມ່ນມີລູກຈອດສອງລູກ ເຊິ່ງອີງຕາມກະຕິກາແລ້ວ, ຫາກຄະແນນສະເຫມີກັນ ຜູ້ຕີຈອດຫຼາຍລູກກວ່າ ຈະເປັນຝ່າຍຊະນະ ຈຶ່ງສົ່ງຜົນໃຫ້ນັກກິລາ ຈາກ ປກສ ໄດ້ຫຼຽນຄໍາໄປຄອງ, ສ່ວນຫຼຽນທອງຕົກເປັນຂອງແຂວງຈຳປາສັກ ແລະ ສາລະວັນ.
ສ່ວນປະເພດທີມຊຸດຍິງ ເປັນການໂຄຈອນມາພົບກັນລະຫວ່າງ ປກສ ພົບກັບແຂວງໄຊຍະບູລີ ເຊິ່ງ ປກສ ເອົາຊະນະໄປຢ່າງງາມ 13-0 ສົ່ງຜົນໃຫ້ປກສ ຄອງຫຼຽນຄຳ, ສ່ວນຫຼຽນທອງ ຕົກເປັນຂອງແຂວງເຊກອງ ແລະ ສະຫວັນນະເຂດ.
ໃນຂະນະທີ່ທີມຊາຍ ເປັນການພົບກັນລະຫວ່າງ ກອງທັບ ພົບກັບກະຊວງພາຍໃນ ໂດຍກອງທັບຂຶ້ນນຳກ່ອນ 2-0 ແຕ່ລ່ອງຖັດມາ, ກະຊວງພາຍໃນຕີສະເຫມີເປັນ 2-2 ຈາກນັ້ນ ກອງທັບກໍເກັບໄດ້ 6 ຄະແນນເຕັມໃນລ່ອງຖັດມາ ເຮັດໃຫ້ຫນີຫ່າງເປັນ 8-2 ແຕ່ກະຊວງພາຍໃນກໍບໍ່ຍອມງ່າຍໆ ເກັບເພີ່ມລ່ອງລະ 3 ຄະແນນ ໃນ 2 ລ່ອງຖັດມາ ເຮັດໃຫ້ຕີສະເຫມີເປັນ 8-8 ແຕ່ຫນ້າເສຍດາຍໃນລ່ອງຖັດມາ, ກອງທັບສາມາດເກັບ 5 ຄະແນນແຊງເຂົ້າປ້າຍແບບເຫຼືອເຊື່ອ ຈົບເກມ 13-8 ຄອງຫຼຽນຄຳໄດ້ສຳເລັດ, ສ່ວນຫຼຽນທອງ ຕົກເປັນຂອງ ແຂວງວຽງຈັນ ແລະ ປກສ.
