ແຂວງ ອຸດົມໄຊຕັ້ງຢູ່ທິດເໜືອຂອງປະເທດລາວ ແລະ ເປັນຈຸດໃຈກາງຂອງພາກເໜືອ, ຫ່າງຈາກນະຄອນຫຼວງວຽງຈັນ 583 ກມ, ມີເນື້ອທີ່ 15,370 ຕາແມັດ, ແຂວງ ອຸດົມໄຊປະກອບມີ 7 ເມືອງຄື: ເມືອງໄຊ, ເມືອງຫຼາ, ເມືອງງາ, ເມືອງຮຸນ ແລະ ເມືອງປາກແບງ, ເນື້ອທີ່ກວມເອົາ 85% ເນື້ອທີ່ພູພຽງ ແລະ ທົ່ງພຽງ 15%, ພົນລະເມືອງ 3 ແສນກວ່າຄົນ,ປະກອບດ້ວຍ 12 ເຜົ່າຊົນຄື: ກຶມມຸ, ລາວ, ມົ້ງ, ພູນ້ອຍ, ໄຕ, ລະເມດ, ອາຄາດ ບິດ, ຫໍ້, ແລນແຕນ, ກົງສາດ, ພູຊາງ ແລະ ຢັ້ງ.
ແຂວງ ອຸດົມໄຊ ໄດ້ເປັນເຈົ້າພາບຈັດງານແຂ່ງຂັນກິລາແຫ່ງຊາດຄັ້ງທີ 10 ຊຶ່ງໄດ້ເລີ່ມເປີດການແຂ່ງຂັນແຕ່ວັນທີ 13 ຫາ 21 ທັນວາ 2014, ເປັນຄັ້ງປະຫວັດສາດຂອງແຂວງ ອຸດົມໄຊ ທີ່ໄດ້ ຈັດງານກິລາແຫ່ງຊາດ ແລະ ເປັນງານທີ່ສຳຄັນທີ່ສຸດລະດັບຊາດ, ຊຶ່ງປະຊາຊົນກໍມີຄວາມເອກອ້າງໃຈ ແລະ ພ້ອມໃຈກັນເປັນເຈົ້າພາບທີ່ດີ, ພ້ອມດຽວກັນໃນການຈັດງານຄັ້ງນີ້, ກໍໄດ້ຊ່ວຍຍົກໃຫ້ບົດບາດ ຂອງແຂວງ ອຸດົມໄຊ ໄດ້ພົ້ນເດັ່ນຂື້ນ ໂດຍສະເພາະແມ່ນເລື່ອງການທ່ອງທ່ຽວ, ທີ່ໄດ້ໂຄສະນາໃຫ້ ແຂກທີ່ເຂົ້າຮ່ວມງານກິລາທັງພາຍໃນ ແລະ ຕ່າງປະເທດໄດ້ເຫັນ, ໃນມື້ວັນທີ 15 ທັນວາ, ພາຍຫຼັງ ການເກັບກຳຂ່າວການແຂ່ງຂັນກິລາສຳເລັດ, ນັກຂ່າວ CRI ທ້າວ ສຸກສົມປອງ ຫຼວງໄຊ ແລະ ນັກຂ່າວຈາກສຳນັກຂ່າວສານປະເທດລາວ, ໄດ້ມີໂອກາດໄປເກັບກຳຖ່າຍພາບບັນຍາກາດ ແລະ ຄວາມສວຍງາມຂອງເທດສະບານແຂວງ ອຸດົມໄຊ ໂດຍມີທ່ານ ຮອງຫົວໜ້າໂຄສະນາອົບຮົມແຂວງ ອຸດົມໄຊ ເປັນຜູ້ນຳພາ ແລະ ແນະນຳສະຖານທີ່ ຈຸດຖ່າຍພາບທີ່ສວຍງາມ, ຊຶ່ງຢູ່ຕຶກຫໍວັດທະນະທຳມູນເຊື້ອຂອງແຂວງ, ທ່ານ ຮອງຫົວໜ້າໂຄສະນາອົບຮົມແຂວງ ອຸດົມໄຊ ໄດ້ພານັກຂ່າວຂື້ນໄປຊັ້ນສອງ ຂອງຕຶກຫໍມູນເຊື້ອແຂວງ ອຸດົມໄຊ, ແລະ ນັ້ນເອງເປັນບ່ອນທີ່ສູງທີ່ສຸດຂອງແຂວງ ອຸດົມໄຊ, ເມື່ອໄດ້ຂື້ນໄປແລ້ວ, ແລະຫຼຽວລົງມາກໍຈະແນມເຫັນຕົວເມືອງເທດສະບານຂອງແຂວງ ອຸດົມໄຊ ໄດ້ຢ່າງຊັດເຈນ, ແລະ ເຫັນທິວທັດທີ່ສວຍງາມ, ບໍ່ວ່າຈະເປັນຫົວທາງ, ສະຖານທີ່ສຳຄັນຄື: ຫ້ອງການປົກຄອງແຂວງ, ຕະຫຼາດ ແລະ ອື່ນໆ ຊຶ່ງນັກຂ່າວກໍມີຄວາມປະທັບໃຈ ແລະ ໄດ້ເກັບກຳຖ່າຍພາບ, ທິວທັດ ເທດສະບານແຂວງ ອຸດົມໄຊ ສ່ວນໃຫຍ່ຈະມີພູຜາອ້ອມຮອບ, ເພາະເນື້ອທີ່ສ່ວນໃຫຍ່ແມ່ນຈະເປັນພູ ພຽງ, ສະນັ້ນ ການວາງໂຄງສ້າງ, ການພັດທະນາແຂວງ ອຸດົມໄຊ ຈຶ່ງມີຄວາມສຳຄັນ, ເພາະໃນອານາຄົດ ແຂວງ ດັ່ງກ່າວຈະຖືວ່າເປັນອີກຈຸດຍຸດທະສາດໜຶ່ງທາງດ້ານການທ່ອງທ່ຽວ, ເປັນຈຸດໃຈກາງທາງພາກເໜືອຂອງລາວ, ແລະ ເປັນຈຸດເຊື່ອມຕໍ່ການທ່ອງທ່ຽວລະຫວ່າງປະເທດ.
ທ່ານ ຫົວໜ້າພະແນກຖະແຫຼງຂ່າວວັດທະນະທຳ ແລະ ທ່ອງທ່ຽວ ແຂວງ ອຸດົມໄຊ ໄດ້ໃຫ້ສຳພາດຕໍ່ນັກຂ່າວ CRI ໃຫ້ຮູ້ວ່າ: ແຂວງ ອຸດົມໄຊ ມີສະຖານທີ່ທ່ອງທ່ຽວຫຼາຍກວ່າ 50 ແຫ່ງ, ສ່ວນໃຫຍ່ແມ່ນ ສະຖານທີ່ທ່ອງທ່ຽວທາງທຳມະຊາດ, ວັດທະນະທຳ ເຊັ່ນ: ຕາດນໍ້າກັດເປັນຕາດທີ່ສວຍງາມ, ທີ່ເປັນເອກະລັກສະເພາະ, ເຊິ່ງຫ່າງຈາກເທດສະບານແຂວງປະມານ 20 ກິໂລແມັດ, ຢູ່ເຂດບ້ານ ກັດ ແລະ ບ້ານ ແຟນ ເມືອງ ໄຊ, ແຂວງ ອຸດົມໄຊ, ມີເນື້ອທີ່ເກືອບ 20 ພັນເຮັກຕາ, ແຕ່ລະປີຈະມີນັກທ່ອງທ່ຽວເຂົ້າມາທ່ຽວຈຳນວນຫຼາຍ, ທັງນີ້ກໍຍ້ອນສະຖານທີ່ດັ່ງກ່າວມີທຳມະຊາດອັນອຸດົມສົມບູນ, ສວຍງາມກົມກືນກັບນໍ້າຕົກຕາດທີ່ໂອບລ້ອມດ້ວຍທຳມະຊາດ, ປ່າໄມ້ອາຍຸນັບຮ້ອຍປີ,
ສະເພາະເມືອງຫຼາ, ແມ່່ນເມືອງທ່ອງທ່ຽວທີ່ມີວັດ, ຊົນເຜົ່າ, ເຊິ່ງເປັນວັດທະນະທຳທີ່ຊາວລາວ ແລະ ຊາວແຂວງອຸດົມໄຊໃຫ້ຄວາມເຄົາລົບ, ແຕ່ລະມື້ມີປະຊາຊົນ ແລະ ນັກທ່ອງທ່ຽວເຂົ້າມາທ່ຽວຊົມ 50 ເຖິງ 100 ຄົນ, ຊາວບ້ານຫຼາຍຮ້ອຍຄົນ, ນອກນັ້ນ, ພວກເຮົາຍັງໄດ້ເອົາໃຈໃສ່ໃນການທ້ອງທ່ຽວທາງດ້ານວັດທະນະທຳຊົນເຜົ່າ, ເພາະເມືອງນີ້ມີຫຼາຍຊົນເຜົ່າ, ເປັນຕົ້ນ, ເຜົ່າອາຄ່າ ຊິ່ງມີວິທີຊີວິດຢູ່ເທິງພູສູງ, ເມື່ອຂື້ນໄປເທິງພູສູງຈະເຫັນທັດສະນີຍະພາບທີ່ສວຍງາມ ທະເລໝອກຂອງພາບວິວທີວທັດທຳມະຊາດຢູ່ເທິງພູສູງ
