ທີມເຕະບານກະຊວງປ້ອງກັນປະເທດ (ກອງທັບ) ບືນອຸປະສັກຂັ້ນສຸດທ້າຍກ່ອນເຂົ້າສູ່ຮອບ 8 ທີມ ໂດຍການເອົາຊະນະນັກກີລາຈາກແຂວງບໍ່ແກ້ວ ຂະນະທີ່ ທີມນະຄອນຫຼວງວຽງຈັນ (ນ.ວ) ເຖິງແມ່ນຈະເສຍໃຫ້ ຈຳປາສັກ ແຕ່ກໍ່ຜ່ານເຂົ້າຮອບໃນຖານະເປັນທີມອັນດັບ 3 ທີ່ມີຄະແນນດີຮອງຈາກ ຫຼວງນ້ຳທາ.
ການແຂ່ງຂັນ ນັດສຸດທ້າຍຂອງ ສາຍ ກ ໃນງານມະຫະກຳກີລາແຫ່ງຊາດ ຄັ້ງທີ X ໃນວັນທີ 15 ທັນວາ ເປັນການລົງສະໜາມຂອງສອງຄູ່ດ້ວຍກັນ ກອງທັບ ລົງສະໜາມ ພົບກັບ ບໍ່ແກ້ວ ແລະ ຈຳປາສັກ ພົບກັບ ນ.ວ ຜົນຂອງການແຂ່ງຂັນນັດນີ້ແມ່ນມີຄວາມສຳຄັນຕໍ່ກັບທັງສອງທີມ ກໍ່ຄື ກອງ ທັບ ແລະ ນ.ວ ເພື່ອຜ່ານເຂົ້າໄປຫຼິ້ນໃນຮອບຕໍ່ໄປ.
ສ່ວນຜົນການແຂ່ງຂັນຄູ່ທີ 1 ກອງທັບ ເລີ່ມເກມການແຂ່ງຂັນໄດ້ດີ ໃນເຄິ່ງເວລາທຳອິດ ສາ ມາດຍິງປະຕູຂື້ນນຳ 4-1 ແຕ່ກໍ່ຍັງເປີດໂອກາດໃຫ້ກັບບໍ່ແກ້ວ ຍິງປະຕູໄລ່ຂື້ນມາເປັນ 4-2 ກ່ອນໝົດເຄິ່ງເວລາທີ 1 ແລະ ເລີ່ມເຄິ່ງເວລາທີ 2 ບໍ່ແກ້ວ ພະຍາຍາມບຸກເຕັມທີ່ ແຕ່ຍັງບໍ່ສາມາດຍິງປະຕູໄດ້ ກອງທັບກໍ່ບໍ່ໜິ້ງເສີຍ ຫຼິ້ນທັງຮັບ ທັງບຸກ ຈົນມີໂອກາດຍິງປະຕູຂື້ນຕື່ມ ກ່ອນໝົດເວລາ ກອງທັບເອົາຊະນະ ບໍ່ແກ້ວ 5-2.
ສຳລັບຜົນການແຂ່ງຂັນລະຫວ່າງ ຈຳປາສັກ ແລະ ນ.ວ ບໍ່ຮູ້ວ່າເປັນໂຊກດີ ຫຼື ໂຊກຮ້າຍຂອງ ນ.ວ ທີ່ໃນນັດສຸດທ້າຍຕ້ອງມາລົງສະນາມພົບກັບທີມທີ່ເປັນອັນດັບ 1 ຂອງສາຍ ພໍແຕ່ເລີ່ມການແຂ່ງຂັນເຄິ່ງເວລາທຳອິດ ຈຳປາສັກກໍ່ສາມາດຍິງປະຕູຂື້ນນຳ 1-0 ສ່ວນ 45 ນາທີສຸດທ້ຍຂອງການແຂ່ງຂັນ ທັງສອງບໍ່ສາມາດຍິງປະຕູກັນໄດ້ ຈົບກນແຂ່ງຂັນ ຈຳປາສັກ ຊະນະ ນ.ວ 1-0.
ຜົນການແຂ່ງຂັນໃນນັດສຸດທ້າຍຂອງ ສາຍ ກ ສົ່ງຜົນໃຫ້ ຈຳປາສັກ ເປັນອັນດັບ 1 ຂອງສາຍ ຜ່ານເຂົ້າໄປພົບກັບ ຄຳມ່ວນ ເປັນອັນດັບ 2 ຂອງ ສາຍ ຄ ກອງທັບ ຜ່ານເຂົ້າຮອບເປັນອັນດັບ 2 ຂອງສາຍເຂົ້າໄປພົບກັບ ອັດຕະປື ທີ່ເປັນອັນດັບ 1 ຂອງ ສາຍ ຄ ສ່ວນ ນ.ວ ອັນດັບ 3 ທີ່ມີຄະແນນດີຂອງສາຍ ຈະລົງສະໜາມພົບກັບ ສະຫວັນນະເຂດ ອັນດັບ 1 ຂອງ ສາຍ ຂ ສວນເຈົ້າພາບ ອຸດົມໄຊ ເປັນອັນດັບ 2 ຂອງ ສາຍ ຂ ຈະລົງສະໜາມພົບກັບ ຫຼວງນ້ຳທາ ອັນດັບ 3 ຂອງສາຍ ຄ ເຊິ່ງການແຂ່ງຂັນຮອບ 8 ທີມ ແມ່ນຈະລົງແຂ່ງຂັນໃນຕອນບ່າຍຂອງມື້ວັນທີ 16 ທັນວາ ນີີ້ ທີ່ສະໜາມກີລາແຂວງ ໂດຍຈະລົງສະໜາມທັງ 4 ຄູ່ ເລີ່ມແຕ່ເວລາ 13:30 ເປັນຕົ້ນໄປ.