ວັນທີ 16 ທັນວານີ້, ທາງດ່ວນສອງສາຍຂອງຈີນທີ່ຢູ່ຕາມຊາຍແດນຈີນ-ຫວຽດນາມ ຄື: ແຕ່ເມືອງຈິ້ງຊີ່ໄປຫາເມືອງນ້າໂພ່ ແລະ ແຕ່ເມືອງປ໋າຍເຊີ້ໄປຫາເມືອງຈິ້ງຊີ່ ໄດ້ເລີ່ມເປີດການນຳໃຊ້ໃຫ້ລົດແລ່ນແລ້ວ ເຊິ່ງຄວາມໄວສູງສຸດຕາມການອອກແບບແມ່ນ 100 ກິໂລແມັດຕໍ່ຊົ່ວໂມງ. ຜູ້ຊ່ຽວຊານກ່າວວ່າ, ການເລີ່ມນຳໃຊ້ທາງດ່ວນສອງສາຍນີ້, ໄດ້ເປັນການເພີ່ມຊ່ອງທາງໃໝ່ໃຫ້ແກ່ "ແລວເສດຖະກິດນານນິງຈີນ-ສິງກະໂປ", ການຄົມມະນາຄົມທາງບົກລະຫວ່າງຈີນ-ອາຊຽນໄດ້ນັບມື້ນັບສະດວກ-ສະບາຍຍິ່ງຂຶ້ນ.
ໃນຊຸມປີຜ່ານມານີ້, ຍ້ອນຄວາມເອົາໃຈໃສ່ຈາກການນຳຂັ້ນສູງຂອງຈີນແລະບັນດາປະເທດອາຊຽນ, ປະເທດຕ່າງໆໄດ້ບັນລຸຄວາມຮັບຮູ້ທີ່ເປັນເອກະພາບກັນເປັນກ້າວໆ ໂດຍຖືການຊຸກຍູ້ການກໍ່ສ້າງການຄົມມະນາຄົມທາງບົກເປັນຈຸດສຸມ, ແລະໄດ້ເລັ່ງບາດກ້າວໃນການວາງແຜນ-ກໍ່ສ້າງການຄົມມະນາຄົມທາງບົກທີ່ເຊື່ອມຕໍ່ກັບສອງຝ່າຍ, ທັງໄດ້ເພີ່ມທະວີການຮ່ວມມືດ້ານການຂົນສົ່ງທາງບົກ, ຕາໜ່າງພື້ນຖານໂຄງລ່າງການຄົມມະນາຄົມທາງບົກໄດ້ເລີ່ມຂຶ້ນໃນເບື້ອງຕົ້ນ.
ຕົວເລກຂໍ້ມູນສະຖິຕິສະແດງໃຫ້ເຫັນວ່າ, ໃນສາມໄຕມາດທຳອິດຂອງປີ 2014, ພາຍໃຕ້ສະພາບການຟື້ນຕົວຂອງເສດຖະກິດໂລກຍັງອ່ອນໜ້ອຍ, ມູນຄ່າການຄ້າລະຫວ່າງຈີນ-ອາຊຽນໄດ້ບັນລຸເຖິງ 346 ຕື້ 597 ລ້ານໂດລາສະຫະລັດ, ເຊິ່ງກວມເອົາ 11% ຂອງມູນຄ່າການຄ້າກັບຕ່າງປະເທດຂອງຈີນ, ເພີ່ມຂຶ້ນ 7,5% ເມື່ອທຽບກັບໄລຍະດຽວກັນຂອງປີກາຍ; ນອກຈາກນີ້, ໄຕມາດທີສາມໄດ້ເພີ່ມຂຶ້ນ 9% ເມື່ອທຽບກັບໄຕມາດທີສອງ.