ຄະນະສິລະປະວັດທະນະທຳແຂວງຢຸນນານ ສປ ຈີນໄດ້ຈັດງານວາງສະແດງສິລະປະວັນນະຄະດີແຂວງຢຸນນານຈີນໃນຕອນຄ່ຳວັນທີ 17 ທັນວານີ້ທີ່ສູນປະຊຸມແຫ່ງຊາດນະຄອນຫຼວງວຽງຈັນ.
ຄະນະສິລະປະວັນນະຄະດີແຂວງຢຸນນານໄດ້ສະແດງລາຍການຕ່າງໆທີ່ມີເອກະລັກວັດທະນະທຳຈີນແລະເອກະລັກສະເພາະຕົວຂອງວັດທະນະທຳຊົນເຜົ່າສ່ວນໜ້ອຍແຂວງຢຸນນານຈີນເປັນຕົ້ນແມ່ນການຟ້ອນລຳທຳເພງ, ກາຍຍະສິນ, ມາຍາກົນ ແລະລາຍການອື່ນໆທີ່ໜ້າປະທັບໃຈຫຼາຍ, ລາຍການຮ້ອງເພງລາວ "ດວງຈຳປາ" ໄດ້ສ້າງບັນຍາກາດມ່ວນຊື່ນຂຶ້ນເຖິງຈຸດສູງສຸດຂອງງານ, ສຸດທ້າຍງານສະແດງສິລະປະວັນນະຄະດີຄັ້ງນີ້ໄດ້ສິ້ນສຸດລົງຢ່າງຈົບງາມດ້ວຍລາຍການຟ້ອນເຜົ່າຮັ້ນຈີນທີ່ມີຊື່ວ່າ ດອກຊ້ອນ.
ທ່ານບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫຼງຂ່າວ, ວັດທະນະທຳແລະທ່ອງທ່ຽວ, ທ່ານນາງເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກຳແລະການຄ້າ, ທ່ານສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ແລະ ທ່ານກ່ວນຮວາປິ່ນ ເອກອັກຄະລັດຖະທູດຈີນປະຈຳລາວພ້ອມດ້ວຍຜູ້ຕາງໜ້າວິສາຫະກິດຈີນແລະລາວ, ມີປະຊາຊົນລວມທັງໝົດ 1000 ກວ່າຄົນໄດ້ເຂົ້າຊົມງານສະແດງສິລະປະວັດທະນະທຳໃນຄັ້ງນີ້.
