ໃນຫຼາຍມື້ຜ່ານມານີ້, ອັດຕາແລກປ່ຽນຂອງເງິນຣຸບໄດ້ຕົກຕ່ຳລົງຢ່າງຫຼວງ ຫຼາຍ, ເຮັດໃຫ້ພາຍນອກເປັນຫ່ວງນຳເສດຖະກິດຂອງຣັດເຊຍ. ພາກສ່ວນຕ່າງໆທີ່ກ່ຽວຂ້ອງຂອງຣັດເຊຍໄດ້ໃຊ້ມາດຕະການຢ່າງຮີບດ່ວນ, ເພື່ອວາງມາດຕະການກັບພາກສ່ວນທີ່ກ່ຽວຂ້ອງຮັບມືກັບສະພາບເງິນຣຸບອ່ອນຄ່າລົງຢ່າງຫຼວງຫຼາຍ.
ວັນທີ 17 ທັນວານີ້, ທະນາຄານກາງຣັດເຊຍໄດ້ອອກປະກາດແຈ້ງການ ໂດຍກ່າວວ່າ, ເພື່ອເຮັດໃຫ້ອັດຕາແລກປ່ຽນຂອງເງິນຣຸບມີຄວາມໝັ້ນທ່ຽງ ແລະ ສະໜັບສະໜູນສະຖາບັນການເງິນຣັດເຊຍມີຄວາມໝັ້ນທ່ຽງ, ທະນາຄານກາງຣັດເຊຍຈະໃຫ້ການຊ່ວຍເຫຼືອແກ່ສະຖາບັນການເງິນໃນດ້ານການລະດົມທຶນ. ນອກຈາກນີ້, ທະນາຄານກາງຣັດເຊຍຍັງຈະໃຊ້ມາດຕະການເພື່ອສົ່ງເສີມໃຫ້ສະຖາບັນການເງິນປ່ອຍເງິນກູ້.
ໃນມື້ດຽວກັນ, ກະຊວງການເງິນຣັດເຊຍໄດ້ຕົກລົງຈຳໜ່າຍເງິນຕາຕ່າງປະເທດທີ່ເຫຼືອໃຊ້ຈຳນວນ 7 ຕື້ໂດລາສະຫະລັດໃນຕະຫຼາດ, ເພື່ອກີດກັ້ນບໍ່ໃຫ້ເງິນຣຸບສືບຕໍ່ອ່ອນຄ່າລົງຢ່າງຫຼວງຫຼາຍ. ທ່ານໄຮລ໋ ໂມອີເຊເຢັຟ ອາເລັກຊາເຢັຟ, ລັດຖະມົນຕີຊ່ວຍວ່າການກະຊວງການເງິນຣັດເຊຍ ໄດ້ກ່າວວ່າ: ຖ້າມີຄວາມຈຳເປັນ, ກະຊວງການເງິນຣັດເຊຍຈະຈຳໜ່າຍເງິນໂດລາສະຫະລັດໃນຕະຫຼາດ.
ນອກຈາກນີ້, ວັນທີ 17 ທັນວານີ້, ທ່ານດີມີຕຣີ ແມັດເວເດັຟ, ນາຍົກລັດຖະມົນຕີຣັດເຊຍ ໄດ້ຈັດກອງປະຊຸມ ໂດຍຮຽກຮ້ອງໃຫ້ໃຊ້ມາດຕະການໃນທັນທີເພື່ອເຮັດໃຫ້ຕະຫຼາດເງິນຕາຕ່າງປະເທດມີຄວາມໝັ້ນທ່ຽງ. ໃນກອງປະຊຸມຄັ້ງນີ້, ທ່ານແມັດເວເດັຟ ກ່າວວ່າ: ອົງການລັດ ແລະ ທະນາຄານກາງ ໄດ້ວາງມາດຕະການຕ່າງໆເພື່ອເຮັດໃຫ້ຕະຫຼາດເງິນຕາມີຄວາມໝັ້ນທ່ຽງ, ໃນນັ້ນ, ທ່ານຈະອະນຸມັດບາງມາດຕະການທີ່ຈຳເປັນຈຳນວນໜຶ່ງ. ທ່ານກ່າວຕື່ມວ່າ: ຣັດເຊຍມີເງິນທຶນສຳຮອງຢ່າງພຽງພໍ ແລະ ມີວິທີດ້ານການຕະຫຼາດຫຼາຍໆຢ່າງໃນການຮັບມືກັບການເໜັງຕິງຢ່າງໄວວາຂອງອັດຕາແລກປ່ຽນເງິນຕາ ແລະ ສະພາບເສດຖະກິດທີ່ຂ້ຽວຂາດ.