ວັນທີ 17 ທັນວານີ້, ຢູ່ນະຄອນຫຼວງຕັສເກັນຂອງອຸສເບກີສະຖານ, ຄະນະກຳມະການປະຕິບັດງານການຕ້ານການກໍ່ການຮ້າຍເຂດອົງການຮ່ວມມືຊຽງໄຮຫຼື SCO ໄດ້ອອກຖະແຫຼງການ, ໂດຍໄດ້ກ່າວປະນາມຢ່າງຮຸນແຮງຕໍ່ເຫດການຫຼອນໂຈມຕີແບບກໍ່ການຮ້າຍທີ່ເກີດຂຶ້ນຢູ່ເປຊາວາ ທາງພາກຕາເວັນຕົກສຽງເໜືອຂອງປາກີສະຖານໃນວັນທີ 16 ທັນວານີ້.
ຖະແຫຼງການຂຽນວ່າ, ຄະນະກຳມະການປະຕິບັດງານການຕ້ານການກໍ່ການຮ້າຍເຂດ SCO ໄດ້ໃຫ້ຄວາມສຳຄັນຫຼາຍຕໍ່ສະຖານະການຂອງປະເທດດັ່ງກ່າວ, ຍິນດີໃຫ້ການສະໜັບສະໜູນທຸກຮູບແບບແກ່ປາກີສະຖານໃນການ ໂຈມຕີລັດທິກໍ່ການຮ້າຍ, ລັດທິແບ່ງແຍກແລະລັດທິຫົວຮຸນແຮງ. ຄະນະກຳມະການໄດ້ກ່າວປະນາມຢ່າງຮຸນແຮງຕໍ່ການກະທຳຮຸນແຮງກໍ່ການຮ້າຍທີ່ແນໃສ່ປະຊາຊົນໂດຍສະເພາະແມ່ນຜູ້ທີ່ມີອາຍຸບໍ່ເຖິງກະສຽນຂອງພວກລັດທິກໍ່ການຮ້າຍ, ໄດ້ສະແດງຄວາມເຫັນໃຈຕໍ່ຄອບຄົວຂອງຜູ້ເສຍຊີວິດໃນເຫດການກໍ່ການຮ້າຍໃນຄັ້ງນີ້.
ຕອນເຊົ້າວັນທີ 16 ທັນວານີ້ຕາມເວລາທ້ອງຖິ່ນ, ກຸ່ມປະກອບອາວຸດທີ່ແຕ່ງຕົວເປັນທະຫານກຸ່ມໜຶ່ງໄດ້ຫຼອນໂຈມຕີໂຮງຮຽນລູກຫຼານທະຫານແຫ່ງໜຶ່ງຢູ່ເປຊາວາຂອງປາກີສະຖານ, ເຮັດໃຫ້ 141 ຄົນເສຍຊີວິດ, ໃນນັ້ນ, ລວມທັງນັກຮຽນ 132 ຄົນແລະຄູ 9 ຄົນ. ກຸ່ມຕາລີບັນຂອງປາກີສະຖານໄດ້ປະກາດວ່າໄດ້ກໍ່ເຫດຫຼອນໂຈມຕີໃນຄັ້ງນີ້.
 |
