ທ້າວ ອໍາຄາ ວົງພະຈັນ ນັກກີລາກາລາເຕ້ໂດ ປະເພດຟ້ອນກະຕະຈາກນະຄອນຫຼວງວຽງຈັນ ຍາດໄດ້ຫຼຽນຄໍາຟ້ອນກະຕະດ່ຽວຊາຍໄດ້ສໍາເລັດ ຫຼັງຈາກສາມາດເອົາຊະນະ ທ້າວ ຄໍາປັນຍາ ໄຊຍະວົງ ຈາກແຂວງຊຽງຂວາງ ໄປດ້ວຍ 3-0 ຄະແນນ ໃນມື້ເປີດສາກການແຂ່ງຂັນມື້ທໍາອິດເມື່ອວັນທີ 18 ທັນວາ.
ວັນທີ 18 ທັນວານີ້, ໄດ້ມີການຊີງໄຊກາລາເຕ້ໂດ ປະເພດຟ້ອນກະຕະທັງສອງປະເພດຄື: ຊາຍດ່ຽວ ແລະ ຍິງດ່ຽວ ເຊິ່ງການແຂ່ງຂັນຊາຍດ່ຽວ ມີຕົວແທນຈາກ 6 ພາກສ່ວນເຂົ້າຮ່ວມຄື ນະຄອນຫຼວງ, ແຂວງຄໍາມ່ວນ, ຊຽງຂວາງ, ຈໍາປາສັກ, ກະຊວງປ້ອງກັນຄວາມສະຫງົບ ແລະ ເຈົ້າພາບແຂວງອຸດົມໄຊ. ມີການຊີງໄຊທັງໝົດ 12 ຫຼຽນຄໍາ, 12 ຫຼຽນເງິນ ແລະ 24 ຫຼຽນທອງ ຈາກ 12 ລາຍການ ປະກອບດ້ວຍ ຟ້ອນກະຕະມີ 2 ລາຍການ ແລະ ປະເພດຕໍ່ສູ້ 10 ລາຍການ.
ຜົນການແຂ່ງຂັນ: ຟ້ອນກະຕະຊາຍດ່ຽວ ຕົວແທນຈາກນະຄອນຫຼວງ ຄື ທ້າວ ອໍາຄາ ວົງພະຈັນ ເຈົ້າຂອງຫຼຽນຄໍາໃນກີລາຊີເກມ ຄັ້ງທີ 25 ແລະ ກີລາມະຫາວິທະຍາໄລອາຊຽນ, ລວມທັງເຈົ້າຂອງຫຼຽນທອງງານມະຫາກໍາກີລາແຫ່ງຊາດຄັ້ງທີ 9 ສະແດງຜົນງານໄດ້ຢ່າງໂດດເດັ່ນ. ໃນຮອບຊີງຊະນະເລີດ ທ້າວ ອໍາຄາ ລົງແຂ່ງກັບ ຄໍາປັນຍາ ຈາກແຂວງຊຽງຂວາງ ສາມາດຟ້ອນໄດ້ສົມບູນເໜືອກວ່າ ແລະ ເອົາຊະນະໄປໄດ້ 3-0 ຄະແນນ ຍາດໄດ້ຫຼຽນຄໍາປະເພດຟ້ອນກະຕະຊາຍດ່ຽວມາຄອງໄດ້ສໍາເລັດ. ຫຼຽນເງິນທ້າວ ຄໍາປັນຍາ ແລະ ຫຼຽນທອງຮ່ວມ ທ້າວ ລໍາມະວິນ ຈາກອຸດົມໄຊ ແລະ ທ້າວ ສຸລິໄຊ ຈາກຈໍາປາສັກ.
ສ່ວນປະເພດຍິງດ່ຽວ: ຫຼຽນຄໍາ ນາງ ທະວີພອນ ຈາກຈໍາປາສັກ ຊະນະ ນາງ ເທບສຸດາ ຈາກແຂວງອຸດົມໄຊ ໄປດ້ວຍຄະແນນ 2-1 ສ່ວນຫຼຽນທອງຮ່ວມ ນາງ ອ້ອຍໃຈ ຈາກກະຊວງປ້ອງກັນຄວາມສະຫງົບ ແລະ ນາງ ວິໄລພອນ ຈາກແຂວງສາລະວັນ.