ຕອນບ່າຍວັນທີ 22 ທັນວານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ພົບປະເຈລະຈາກັບທ່ານປຣະຢຸດ ຈັນໂອຊາ ນາຍົກລັດຖະມົນ ຕີໄທຢູ່ຫໍສະພາປະຊາຊົນທີ່ນະຄອນຫຼວງປັກກິ່ງຂອງຈີນ.
ທ່ານຫຼີເຄີ້ສຽງກ່າວວ່າ, ຈີນຍິນດີຮ່ວມກັບໄທເລີ່ມຕົ້ນການປຶກສາຫາລືບັນຫາລະອຽດເປັນຕົ້ນແມ່ນຮູບແບບການຮ່ວມມືໃຫ້ໄວເທົ່າທີ່ຈະໄວໄດ້, ເລັ່ງລັດກະກຽມໄລຍະຕົ້ນໃຫ້ດີ,ພະຍາຍາມໃຫ້ໂຄງການລົດໄຟເລີ່ມລົງມືກໍ່ສ້າງໂດຍໄວ ເຮັດໃຫ້ສອງຝ່າຍພ້ອມດ້ວຍປະຊາຊົນທີ່ຢູ່ ລຽບຕາມເສັ້ນທາງລົດໄຟໄດ້ຮັບຜົນປະໂຫຍດໂດຍໄວ.
ທ່ານຫຼີເຄີ້ສຽງຊີ້ໃຫ້ເຫັນວ່າ, ຫວັງໃຫ້ສອງຝ່າຍຈະກຳແໜ້ນທິດທາງລວມແຫ່ງການຂະຫຍາຍຕົວຂອງສາຍພົວພັນສອງຝ່າຍ, ຍົກສູງຂະໜາດແລະລະດັບການຮ່ວມມື, ຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ໄດ້ຮັບການພັດທະນາໃໝ່, ຊຸກຍູ້ໃຫ້ນຳໃຊ້ເງິນຕາປະເທດໃຜລາວເປັນເງິນຕາຊຳລະສະສາງການຄ້າແລະການລົງທຶນລະຫວ່າງສອງປະເທດ; ເປີດກວ້າງການຮ່ວມມືໃນດ້ານວັດທະນະທຳ,ວິທະຍາສາດເຕັກໂນໂລຊີ, ການທ່ອງທ່ຽວແລະຂົງເຂດອື່ນໆ, ຫວັງໃຫ້ຝ່າຍໄທອຳນວຍການສະໜັບສະໜູນແລະຄວາມສະດວກໃຫ້ແກ່ວິສາຫະກິດຈີນໃນການເຂົ້າຮ່ວມການສຳຫຼວດຂຸດຄົ້ນແລະພັດທະນາຊັບພະຍາກອນແຮ່ໂປຕາສ(potash).
ທ່ານປຣະຢຸດກ່າວວ່າ, ການຮ່ວມມືໄທ-ຈີນມີຜົນດີຕໍ່ການພັດທະນາຂອງໄທ, ຝ່າຍໄທເດັດດ່ຽວສຸມກຳລັງເຂົ້າໃນການຍົກລະດັບສາຍພົວພັນລະຫວ່າງສອງປະເທດໃຫ້ສູງຂຶ້ນ, ຍິນດີຮ່ວມກັບຝ່າຍຈີນເລັ່ງລັດປະຕິບັດສັນຍາການຮ່ວມມືທາງລົດໄຟ,ການຄ້າຜະລິດຕະພັນກະສິກຳແລະອື່ນໆ, ເພີ່ມທະວີການຮ່ວມມືໃນຂົງເຂດເສດຖະກິດການຄ້າ,ການທະນາຄານ, ການລົງທຶນແລະວັດທະນະທຳເປັນຕົ້ນ. ທັງນີ້ເພື່ອນຳເອົາຜົນປະໂຫຍດມາສູ່ປະຊາຊົນສອງຊາດໃຫ້ຫຼາຍຂຶ້ນກວ່າເກົ່າ. ຝ່າຍໄທຍິນດີຕ້ອນຮັບວິສາຫະກິດຈີນໄປລົງທຶນແລະສ້າງຕັ້ງໂຮງງານຢູ່ໄທ. ຈີນໄດ້ເສີມຂະຫຍາຍບົດບາດສຳຄັນເຂົ້າໃນການສົ່ງເສີມສັນຕິພາບ,ສະເຖຍລະພາບແລະການພັດທະນາຂອງພາກພື້ນ, ຝ່າຍໄທຍິນດີປະສານສົມທົບກັບຝ່າຍຈີນຢ່າງໃກ້ຊິດ, ຊຸກຍູ້ການພົວພັນຈີນ-ອາຊຽນແລະການຮ່ວມມືໃນພາກພື້ນໃຫ້ກ້າວຂຶ້ນສູ່ລະດັບໃໝ່.
ຫຼັງການພົບປະເຈລະຈາ, ນາຍົກລັດຖະມົນຕີທັງສອງປະເທດໄດ້ຮ່ວມກັນເປັນສັກຂີພິຍານໃຫ້ແກ່ການລົງລາຍເຊັນໃນເອກະສານຮ່ວມມືສອງຝ່າຍໃນຂົງເຂດການທະນາຄານ, ຊົນລະປະທານແລະອື່ນໆ.
