ວັນທີ 27 ມັງກອນນີ້ ຫຼາຍປະເທດເອີຣົບໄດ້ຈັດກິດຈະກຳ "ວັນລະນຶກສັງຫານໝູ່ສາກົນ"ແລະກິດຈະກຳລະນຶກວັນປົດປ່ອຍຄ້າຍກັກຂັງໂອສວີສຄົບຮອບ 70 ປີ. ທ່ານໂຈອາຮິມ ກ໋ອກ ປະທານາທິບໍດີເຢຍລະມັນຢືນຢັນວ່າ ບໍ່ມີຊາວເຢຍລະມັນຜູ້ໃດແມ່ນບໍ່ມີສ່ວນກ່ຽວພັນກັບຄ້າຍກັກຂັງໂອສວິສ, ການສັງຫານໝູ່ຄັ້ງນັ້ນເປັນພາກສ່ວນໜຶ່ງຂອງປະຫວັດສາດເຢຍລະມັນ. ທ່ານນາງແອັງເຈີລາ ເມີເກວ ນາຍົກລັດຖະ ມົນຕີເຢຍລະມັນກໍໄດ້ຢືນຢັນວ່າ ຊາວເຢຍລະມັນຮູ້ສຶກລະອາຍຢ່າງເລິກເຊິ່ງຕໍ່ທຸກສິ່ງທຸກຢ່າງທີ່ໄດ້ເກີດຂຶ້ນ.
ຕໍ່ກັບເລື່ອງນີ້, ທ່ານນາງຮວ້າຊຸນຊິງ ໂຄສົກກະຊວງການຕ່າງປະເທດຈີນຊີ້ໃຫ້ເຫັນວ່າ ປີນີ້ແມ່ນສົງຄາມຕ້ານຟາຊິດໂລກໄດ້ຮັບໄຊຊະນະຄົບຮອບ 70 ປີ, ຫຼາຍປະເທດພ້ອມດ້ວຍປະຊາຊົນໃນໂລກໄດ້ຈັດກິດຈະກຳທີ່ກ່ຽວຂ້ອງແມ່ນມີຈຸດປະສົງເພື່ອລະນຶກເຖິງຜູ້ປະສົບເຄາະຮ້າຍຈາກສົງຄາມ, ອະທິຖານແລະປາຖະໜາໃຫ້ໂລກມີສັນຕິພາບຖາວອນ, ເພື່ອໃຫ້ຊາວໂລກຖອດຖອນບົດຮຽນປະຫວັດສາດຢ່າງເລິກເຊິ່ງຈາກໄພພິບັດທີ່ບໍ່ເຄີຍມີມາກ່ອນໜ້ານີ້ 70 ປີ, ຫຼີກເວັ້ນບໍ່ໃຫ້ເລື່ອງໂສກນາດຕະກຳໃນປະຫວັດສາດເກີດຂຶ້ນອີກ. ພວກຂ້າພະເຈົ້າສະແດງຄວາມຍ້ອງຍໍຊົມເຊີຍຕໍ່ຜູ້ນຳເຢຍລະມັນທີ່ມີທ່າທີອັນຈິງໃຈຕໍ່ສົງຄາມໂລກຄັ້ງທີສອງ.
 |
