ໃນກອງປະຊຸມຂ່າວທີ່ຈັດຂຶ້ນໃນວັນທີ 27 ມັງກອນນີ້, ທ່ານນາງຮວ້າຊຸນຢິງ, ໂຄສົກກະຊວງການຕ່າງປະເທດຈີນ ກ່າວວ່າ: ຝ່າຍຈີນຄັດຄ້ານການກະທຳຕັດໄມ້, ຂຸດຄົ້ນບໍ່ແຮ່, ການຄ້າ-ຂາຍສັດປ່າແລະເຄື່ອງປ່າຂອງດົງແບບຜິດກົດໝາຍ, ການລາຍງານຂ່າວຂອງສື່ມວນຊົນທີ່ກ່ຽວຂ້ອງໄດ້ບິດເບືອນຄວາມຈິງ.
ໜັງສືພິມ "ນິວຢອກທາມສ໌" ອາເມລິກາສະບັບວັນທີ 25 ມັງກອນນີ້ໄດ້ພິມບົດນຳ ໂດຍກ່າວວ່າ: ຈີນກຳລັງປຸ້ນສະດົມຊັບພະຍາກອນຂອງມຽນມາ ເຊັ່ນ ໄມ້ດູ່, ສັດປ່າ, ເຄື່ອງປ່າຂອງດົງ ແລະ ແຮ່ທາດ, ຮຽກຮ້ອງໃຫ້ສະກັດກັ້ນການກະທຳແບບນີ້.
ຕໍ່ເລື່ອງນີ້, ທ່ານນາງຮວ້າຊຸນຢິງ ກ່າວວ່າ: ຝ່າຍຈີນໄດ້ສົນໃຈຕໍ່ການລາຍງານຂ່າວຂອງສື່ມວນຊົນທີ່ກ່ຽວຂ້ອງ, ການລາຍງານຂ່າວດັ່ງກ່າວໄດ້ບິດເບືອນຄວາມຈິງ, ໂດຍມີເຈດຕະນາບໍ່ດີທີ່ຢາກຍຸແຍ່ແບ່ງແຍກການພົວພັນໄມຕີຈິດມິດຕະພາບຖານບ້ານໃກ້ເຮືອນຄຽງລະຫວ່າງຈີນກັບປະເທດທີ່ກ່ຽວຂ້ອງ.
ທ່ານນາງຮວ້າຊຸນຢິງ ກ່າວຕື່ມວ່າ: ຈີນຄັດຄ້ານການກະທຳຕັດໄມ້, ຂຸດຄົ້ນບໍ່ແຮ່, ການຄ້າ-ຂາຍສັດປ່າແລະເຄື່ອງປ່າຂອງດົງແບບຜິດກົດໝາຍມາໂດຍຕະຫຼອດ, ພ້ອມທັງສຸມໃສ່ໃນການເພີ່ມທະວີການຮ່ວມມືກັບປະເທດໃກ້ຄຽງ ເຊິ່ງລວມທັງມຽນມາ, ເພື່ອຮ່ວມກັນປາບປາມການເຄື່ອນໄຫວຜິດກົດໝາຍປະເພດນີ້ຢ່າງເຂັ້ມງວດ, ພ້ອມກັນນັ້ນ, ຍາມໃດຈີນກໍຮຽກຮ້ອງໃຫ້ວິສາຫະກິດແລະສ່ວນບຸກຄົນທີ່ໄປຕ່າງປະເທດເພື່ອດຳເນີນການຮ່ວມມືດ້ານເສດຖະກິດການຄ້ານັ້ນຕ້ອງເຄົາລົບກົດໝາຍແລະຂໍ້ກຳນົດຂອງປະເທດນັ້ນ.